ఢిల్లీ నుంచి విమానంలో వచ్చి ఏటీఎం చోరీ

• జులాయిసినిమాను తలపించేలా 4 నిమిషాల్లో రూ.29.69 లక్షలు లూటీ
• ఏటీఎంలు ఓపెన్​ చేయడంపై యూట్యూబ్ వీడియోలతో అవగాహన
• 10 మంది దొంగల్లో ఐదుగురు అరెస్ట్ 
• వివరాలు వెల్లడించిన రాచకొండ సీపీ సుధీర్ బాబు

ఎల్బీనగర్, వెలుగు: రంగారెడ్డి జిల్లా రావిర్యాలలో ఈ నెల 2న జరిగిన ఎస్ బీఐ ఏటీఎం చోరీ కేసును రాచకొండ పోలీసులు ట్రెస్ చేశారు. కేవలం 4 నిమిషాల్లో రూ.29.29 లక్షలు లూటీ చేసిన 10 మందిలో ఐదుగురిని పట్టుకున్నారు. రాచకొండ సీపీ సుధీర్ బాబు బుధవారం ఎల్బీనగర్ క్యాంప్ ఆఫీసులో వివరాలు వెల్లడించారు. రాజస్థాన్​కు చెందిన రాహుల్ అలియాస్ రాహుల్ ఖాన్(25) పహాడీ షరీఫ్​లో ఉంటూ జేసీబీ మెకానిక్ గా పనిచేస్తున్నాడు.

ఇతను ఏటీఎంల చోరీలో ఆరితేరాడు. రూరల్​ఏరియాల్లోని ఏటీఎంలను టార్గెట్​చేస్తూ చోరీలకు పాల్పడుతున్నాడు. పఠాన్​చెరులో ఉండే పాత నేరస్తుడు రాజస్థాన్ కు చెందిన ముస్తాఖీం ఖాన్(28)తో కలిసి రావిర్యాలలోని ఎస్​బీఐ ఏటీఎం చోరీకి స్కెచ్​వేశాడు. రాజస్థాన్ కు చెందిన షారుఖ్​బషీర్​ఖాన్(25), రఫీక్ ఖాన్(25), జహుల్ బద్దన్ ఖాన్, వాహిద్ ఖాన్(18), షకీల్ ఖాన్, ఫర్వేజ్, హర్యానాకు చెందిన సుద్బిన్ ఖాన్(28), బిహార్ కు చెందిన మహ్మద్ సర్ఫరాజ్(28)ను కలుపుకున్నాడు. అప్పటికే ఢిల్లీలో ఉన్న షారుఖ్​బషీర్​ఖాన్, ముస్తాఖీ ఖాన్, సుద్బిన్​ఖాన్, రఫీక్ కు ఫైట్​టికెట్లు బుక్​చేసి సిటీకి రప్పించాడు. అంతా కలిసి ఈ నెల2న రావిర్యాలలో రెక్కీ నిర్వహించారు. అర్ధరాత్రి తర్వాత 1.55 గంటలకు గ్యాస్​కట్టర్, ఇతర సామాగ్రితో ఏటీఎంలోకి ఎంటరయ్యారు. గ్యాస్​కట్టర్ తో ఏటీఎం కొల్లగొట్టి రూ.29.69లక్షలు ఎత్తుకెళ్లారు.

ఐదు స్పెషల్​ టీమ్స్​తో గాలింపు.. 

బ్యాంక్​డీఎం శ్రీవాణి ఫిర్యాదుతో కేసు నమోదు చేసిన రాచకొండ పోలీసులు ఐదు స్పెషల్​టీమ్స్​తో గాలింపు చేపట్టారు. చోరీ టైంలో రాజస్థాన్ కు చెందిన కారును వినియోగించారని గుర్తించి సీసీ ఫుటేజీల ఆధారంగా కారు మూవెంట్స్​పై నిఘా పెట్టారు. రాహుల్ ఖాన్, ముస్తాఖీం ఖాన్, షకీల్ ఖాన్, వాహిద్ ఖాన్, షారుఖ్ బషీర్ ఖాన్ ను అదుపులోకి తీసుకున్నారు. రాహుల్ ఖాన్ గతంలో వేర్వేరు రాష్ట్రాల్లో ఏటీఎంల చోరీకి పాల్పడినట్లు సీపీ తెలిపారు. హైదరాబాద్ తోపాటు ఒడిశాలో గ్యాస్ కట్టర్ తో ఏటీఎంలను కొల్లగొట్టాడని వెల్లడించారు. నిందితుల్లో ఒకరు సీసీ కెమెరాలకు బ్లాక్ కలర్​స్ప్రే చేస్తే, మరొకరు అలారం వైర్లను కట్ చేస్తారని, రాహుల్ ఖాన్, రఫీక్​ఖాన్ గ్యాస్ కట్టింగ్ లో ఆరితేరారని చెప్పారు. ఏటీఎం ఎలా ఓపెన్​చేయాలో యూట్యూబ్ లో చూసి నేర్చుకున్నారని తెలిపారు. 23 రోజుల్లో నిందితులను అరెస్టు చేసినట్లు సీపీ సుధీర్ బాబు తెలిపారు.

ఊరు దాటితే.. భారీ మొత్తంలో కొల్లగొట్టాల్సిందే

రావిర్యాల ఏటీఎం చోరీ అనంతరం నిందితులు దారిలో మైలర్ దేవ్ పల్లిలోని ఏటీఎం చోరీకి యత్నించారు. అక్కడ మంటలు రావడంతో ఓపెన్​చేయలేకపోయారు. తర్వాత రోడ్డు మార్గంలో రాజస్థాన్ కు వెళ్లిపోయారు. నిందితులంతా హర్యానాలోని మేవాట్ ప్రాంత దొంగల ముఠాగా  తేలింది. ఒక్కసారి ఊరు దాటితే భారీగా డబ్బు దోచుకున్నాకే తిరిగి ఇంటికి వెళ్తారు. తుపాకులు, కత్తులు, గొడళ్లతో చోరీలకు పాల్పడుతూ అడ్డువచ్చినవారిని హతమార్చడానికి కూడా వెనుకాడరని పోలీసులు గుర్తించారు.