మహబూబ్నగర్, వెలుగు :కాంగ్రెస్ పార్టీలో ‘భారత్ జోడో’ యాత్ర జోష్ కనిపిస్తోంది. ఏఐసీసీ నేత రాహుల్గాంధీ చేపట్టిన పాద యాత్ర ఆదివారం కర్నాటక నుంచి నారాయణపేట జిల్లా కృష్ణా మండలంలోని టైరోడ్డు బ్రిడ్జి మీదుగా రాష్ట్రంలోకి ఎంటర్‌ కానుంది. ఈ మేరకు టీపీసీసీ ఆధ్వర్యంలో పార్టీ నేతలు అన్ని ఏర్పాట్లను పూర్తి చేశారు. ఇప్పటికే రాష్ట్ర స్థాయిలో లీడర్లు పలుమార్లు రూట్‌‌మ్యాప్‌‌ను పరిశీలించి...కేడర్‌‌‌‌కు దిశానిర్దేశం చేశారు. శనివారం పీసీసీ చీఫ్ రేవంత్రెడ్డి టై రోడ్డు వద్ద ఏర్పాట్లను పరిశీలించారు.
ఉమ్మడి పాలమూరులో 134 కిలోమీటర్లు
మక్తల్, దేవరకద్ర, మహబూబ్నగర్, జడ్చర్ల, షాద్నగర్ నియోజకవర్గాల మీదుగా దాదాపు 134 కిలోమీటర్ల మేర రాహుల్ గాంధీ పాదయాత్ర కొనసాగనుంది. యాత్ర మొదటి రోజు కృష్ణా బ్రిడ్జి మీదుగా మక్తల్ చేరుకొని... సబ్ స్టేషన్ వద్ద నైట్హాల్ట్ చేయనున్నారు. దీపావళి కావడంతో 24, 25, 26వ తేదీల్లో యాత్రకు బ్రేక్ ఇవ్వనున్నారు. తిరిగి 27న మక్తల్ నుంచి యాత్ర మొదలు పెట్టి మరికల్, మన్యంకొండ, మహబూబ్నగర్ , జడ్చర్ల, బాలానగర్‌ మీదుగా 30న రంగారెడ్డి జిల్లాలోని శంషాబాద్‌‌లో అడుగు పెట్టనున్నారు.
యాత్ర సక్సెస్ చేసేందుకు కార్యాచరణ
రాహుల్ గాంధీ యాత్ర సక్సెస్ చేసేందుకు లీడర్లు ముందస్తు కార్యాచరణ చేపట్టారు. రెండు వారాలుగా యాత్ర వెళ్లే మార్గాల్లో రాష్ట్ర కాంగ్రెస్ వ్యవహారాల ఇన్చార్జి మాణిక్కం ఠాగూర్, పీసీసీ చీఫ్ రేవంత్రెడ్డి, సీనియర్లు హన్మంత్‌‌రావు, చిన్నారెడ్డి, మల్లు భట్టి విక్రమార్క, మల్లు రవి పర్యటించారు. జన సమీకరణ బాధ్యతలను మక్తల్, దేవరకద్ర, మహబూబ్నగర్, జడ్చర్ల, షాద్నగర్ నియోజకవర్గాలకు చెందిన లీడర్లు కె.ప్రశాంత్రెడ్డి, జి.మధుసూదన్రెడ్డి, ఒబదేల్లా కొత్వాల్, సంజీవ్ ముదిరాజ్, జనుంపల్లి అనిరుధ్రెడ్డి, ఎర్రశేఖర్, వీర్లపల్లి శంకర్‌‌‌‌కు అప్పగించారు. స్థానిక సమస్యలు, అధికార పార్టీ ఆగడాలపై నోట్ ప్రిపేర్ చేసి రాహుల్ గాంధీకి ఇవ్వనున్నట్లు తెలిసింది. దీనిపైనే ఆయన మీటింగుల్లో మాట్లాడనున్నట్లు సమాచారం.
413 మందితో బందోబస్తు
మక్తల్, వెలుగు: రాహుల్ గాంధీ భారత్ జోడో యాత్రకు 413 మంది పోలీసులతో బందోబస్తు ఏర్పాటు చేసినట్లు ఎస్పీ వెంకటేశ్వర్లు చెప్పారు. శనివారం కృష్ణా మండల కేంద్రంలోని బసవేశ్వర ఫంక్షన్ హాల్లో పోలీస్ అధికారులు, సిబ్బందితో మీటింగ్ పెట్టారు. ఈ సందర్భంగా ఆయన మాట్లాడుతూ నలుగురు డీఎస్పీలు, 13 మంది సీఐలు, 34 మంది ఎస్సై, ఏఎస్సైలు, 96 మంది హెడ్కానిస్టేబుల్స్‌, 219 మంది కానిస్టేబుల్స్‌, 46 మంది హోంగార్డులు, నాలుగు రూప్ పార్టీలు, నాలుగు బీడీ టీంలు మొత్తం 413 మందితో బందోబస్తు ఏర్పాటు చేశామన్నారు. మొత్తం ఆరు సెక్టార్లుగా విభజించామని, ప్రతి సెక్టార్‌‌‌‌కు డీఎస్పీ ఇన్‌‌చార్జిగా ఉంటారని చెప్పారు. ట్రాఫిక్ డైవర్షన్ పాయింట్స్ ఏర్పాటు చేసి వెహికిల్స్‌ మళ్లించాలని సూచించారు. ఈ మీటింగ్‌‌లో అడిషనల్ ఎస్పీ భరత్, డీఎస్పీలు సత్యనారాయణ, వెంకటేశ్వరరావు పాల్గొన్నారు.
పూర్వ వైభవంపై ఆశలు
ఉమ్మడి జిల్లా కాంగ్రెస్కు కంచుకోటగా ఉండేది. 2004లో జరిగిన ఎన్నికల్లో 14 నియోజకవర్గాల్లో దాదాపు 10 మంది ఎమ్మెల్యేలుగా గెలుపొందారు. 2009 ఎన్నికల్లో ముగ్గురు, 2014లో ఐదుగురు విజయం సాధించారు. ఆ తర్వాత 2018లో జరిగిన ఎన్నికల్లో ఒకేఒక్క స్థానంలో విజయం సాధించినా.. ఆ ఎమ్మెల్యే టీఆర్‌‌‌‌ఎస్‌‌లో చేరారు. దీంతో కాంగ్రెస్ పార్టీకి ఒక్క ఎమ్మెల్యే కూడా లేకుండా పోయారు. ప్రస్తుతం రాహుల్ గాంధీ పర్యటిస్తుండడంతో పూర్వవైభవం వస్తుందని పార్టీ నేతలు ధీమాతో ఉన్నారు.
