- మొదటి ఏడాది 1,200 వ్యాగన్ల తయారీ
- 2025 వరకు మ్యానుఫ్యాక్చరింగ్ స్టార్ట్
- భవిష్యత్తులో కోచ్ లు కూడా తయారు చేయొచ్చు
- రైల్వే జీఎం అరుణ్ కుమార్ జైన్
కాజీపేట, వెలుగు: ప్రధాని మోదీ ఈ నెల 8న కాజీపేటలో శంకుస్థాపన చేయనున్న వ్యాగన్ తయారీ వర్క్ షాపును రూ.521 కోట్లతో 160 ఎకరాల్లో ఏర్పాటు చేయనున్నామని సౌత్ సెంట్రల్ రైల్వే జీఎం అరుణ్ కుమార్ జైన్ వెల్లడించారు. తెలంగాణలో ఇదే ఫస్ట్ వ్యాగన్ మ్యానుఫ్యాక్చరింగ్ యూనిట్ అని తెలిపారు. ఈ యూనిట్ నుంచి నెలకు 200 చొప్పున మొదటి ఏడాది 1,200, తర్వాత ఏడాది నుంచి 2,400 వ్యాగన్లు తయారు చేస్తారని చెప్పారు. భవిష్యత్తులో ఇందులోనే కోచ్లు కూడా తయారు చేసే అవకాశం ఉంటుందని తెలిపారు. గురువారం కాజీపేట మండలం అయోధ్యపురంలో ప్రధాని శంకుస్థాపన చేయనున్న పీరియాడికల్ ఓవర్ హాలింగ్ వర్క్షాప్, వ్యాగన్ మ్యానుఫ్యాక్చరింగ్ యూనిట్ స్థలాన్ని రైల్ వికాస్ నిగమ్ లిమిటెడ్ (ఆర్వీఎన్ఎల్) చీఫ్ ప్రాజెక్ట్ మేనేజర్ మున్నా కుమార్, ఇతర ఆఫీసర్లతో కలిసి జీఎం పరిశీలించారు. యానిమేషన్ వీడియో ద్వారా యూనిట్ వివరాలు వెల్లడించారు.
అనంతరం ఆయన మీడియాతో మాట్లాడారు. ఇది భారత రైల్వేకే కాకుండా తెలంగాణ ప్రజలకు కూడా ప్రతిష్టాత్మకమైన ప్రాజెక్ట్ అన్నారు. ఈ ప్రాంత సమగ్రాభివృద్ధికి, హనుమకొండ ప్రాంతంలో కొత్త పారిశ్రామిక డెవలప్మెంట్కు దోహదపడుతుందన్నారు. మొదట కాజీపేటలో నెలకు 200 వ్యాగన్ల పీరియాడిక్ ఓవర్ హాలింగ్(పీవోహెచ్) చేపట్టేందుకు వ్యాగన్ రిపేర్ వర్క్ షాప్ మంజూరైందన్నారు. ఆ తర్వాత రైల్వే వ్యాగన్ల అవసరాలు పెరగడం, స్థానికంగా పరిశ్రమను ప్రోత్సహించడం, ఇతర విన్నపాలను పరిగణనలోకి తీసుకుని వ్యాగన్ తయారీ యూనిట్ గా అప్గ్రేడ్ చేసినట్లు తెలిపారు. మోదీ ప్రారంభించిన ఆత్మనిర్భర్ భారత్ కార్యక్రమాన్ని ముందుకు తీసుకెళ్లడంలో ఈ యూనిట్ కీలకంగా పనిచేస్తుందన్నారు. అనంతరం కాజీపేట రైల్వే డివిజన్ డిమాండ్ పై స్పందిస్తూ.. అదంతా పాలసీ మ్యాటర్ అని, దీనిపై కేంద్రం నిర్ణయం తీసుకోవాలన్నారు. ఈ సమావేశంలో డివిజనల్ రైల్వే మేనేజర్ ఏకే గుప్తా, ఇతర ఆఫీసర్లు పాల్గొన్నారు.
కోచ్ ఫ్యాక్టరీ ఏర్పాటు చేయాలి: ఎమ్మెల్యే ఆరూరి
కాజీపేటలో వ్యాగన్ మ్యాన్ఫ్యాక్చరింగ్ యూనిట్తో పాటు కోచ్ ఫ్యాక్టరీని కూడా ఏర్పాటు చేసేలా చర్యలు తీసుకోవాలని వర్ధన్నపేట ఎమ్మెల్యే ఆరూరి రమేశ్ జీఎం అరుణ్ కుమార్ జైన్ ను కోరారు. ఇప్పుడు ఏర్పాటు చేస్తున్న పరిశ్రమ కోసం భూములు కోల్పోయిన రైతు కుటుంబాలు, స్థానిక యువతకు ఉద్యోగావకాశాలు కల్పించాలని వినతి పత్రం అందించారు.
