హైదరాబాద్ లో వర్షం ( ఏప్రిల్ 3 సాయంత్రం 5.30 గంటలకు) మళ్లీ మొదలైంది. రెండు గంటల సమయంలో అరగంట పాటు పడి విధ్వంసం సృష్టించింది. అకాల వర్షాలు జనాన్ని అతలాకుతలం చేసింది. కొద్దిసేపు ఆగిన వర్షం మళ్లీ మొదలైంది. ఇప్పటికే హైదరాబాద్ రహదారులన్నీ జలమయమయ్యాయి. వాహనదారులు ఇబ్బంది పడుతున్నారు. అనేక చోట్ల ట్రాఫిక్ స్థంభించిపోయింది. అత్యవసరమైతేనే తప్ప బయటకు రావద్దని అధికారులు హెచ్చరికలు జారీ చేస్తున్నారు.
వాతావరణ శాఖ హెచ్చరించినట్లుగానే హైదరాబాద్ లోని అనేక ప్రాంతాల్లో వర్షం కురిసింది . ఎంతగా అంటే అరగంట నుంచి కుండ పోత వర్షం పడి.. ఖైరతాబాద్ వద్ద ఓ భారీ వృక్షం కూలింది. ఛాదర్ ఘాట్ వద్ద ట్రాఫిక్ నరకాన్ని చూపిస్తుంది. నగర వ్యాప్తంగా లోతట్టు ప్రాంతాలన్నీ జలమయమయ్యాయి. అనేక చోట్ల డ్రైనేజీ నీరు ఉప్పొంగి రహదారులపై పొంగి పొరలుతూ దుర్వాసన వెదజల్లుతుంది. దీంతో ప్రజలు అనేక ఇబ్బందులు పడుతున్నారు. లోతట్టు ప్రాంతాల ప్రజలు అప్రమత్తంగా ఉండాలని జీహెచ్ఎంసీ అధికారులు హెచ్చరించారు. మ్యాన్‌హోల్స్ మూతలను ఎవరూ తొందరపడి తెరవద్దంటూ అధికారులు ఆదేశించారు. పోలీసులు కూడా రోడ్లపైనే ఉండి ట్రాఫిక్ ను క్రమబద్దీకరిస్తున్నారు. రహదారులన్నీ చెరువులను తలపిస్తున్నాయి.
హైదరాబాద్ లోని జూబ్లీహిల్స్, మాదాపూర్, కొండాపూర్, కూకట్‌పల్లి, సరూర్ నగర్, దిల్‌సుఖ్ నగర్, ఎల్‌బి నగర్.,. ఇతర ప్రాంతాల్లో భారీ వర్షం కురిసింది. ఈరోజు ( ఏప్రిల్ 3) మధ్యాహ్నం వరకు కొంత ఎండ కాచినప్పటికీ 2 గంటలకు భారీగా వర్షం భారీగా పడుతుండటంతో ప్రజలు ఇబ్బందులు పడుతున్నారు. గత కొద్ది రోజుల పాటు తెరిపించిన వానలు మళ్లీ మొదలయ్యే సరికి ప్రజలు అనేక రకాలుగా ఇబ్బందులకు గురవుతున్నారు. హైదరాబాద్ లో వర్షం పడితే పరిస్థితి మామూలుగా ఉండదు. అకాల వర్షానికి దోమలు కూడా విజృంభిస్తుండటంతో విషజ్వరాలు ప్రబలుతాయని జనాలలు భయపడుతున్నారు. అత్యవసరమైతే తప్ప బయటకు రావద్దని అధికారులు హెచ్చరిక జారీ చేశారు.
