- పలు జిల్లాలకు ఎల్లో అలర్ట్ జారీ చేసిన వాతావరణ శాఖ
- గంటకు 40 కిలోమీటర్ల వేగంతో ఈదురుగాలులు వీచే అవకాశం
- హైదరాబాద్ సిటీలో మోస్తరు వర్షాలు పడే చాన్స్
- వర్షాల ప్రభావంతో భారీగా తగ్గిన టెంపరేచర్లు.. 40 డిగ్రీలలోపే నమోదు
హైదరాబాద్, వెలుగు : రాష్ట్రంలో మరో వారం పాటు వర్షాలు పడనున్నాయి. పలు జిల్లాల్లో మోస్తరు నుంచి భారీ వర్షాలు కురిసే అవకాశం ఉందని వాతావరణ శాఖ తెలిపింది. శుక్రవారం విడుదల చేసిన బులెటిన్లో పలు జిల్లాలకు ఎల్లో అలర్ట్ జారీ చేసింది. ప్రస్తుతం మధ్యప్రదేశ్లో కొనసాగుతున్న ఉపరితల ఆవర్తనం అలాగే ఉందని, కొత్తగా రాయలసీమ, తమిళనాడు ప్రాంతాల్లోనూ మరో ఆవర్తనం ఏర్పడుతున్నదని తెలిపింది.
వాటి ప్రభావంతో జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ, జనగామ, యాదాద్రి భువనగిరి, రంగారెడ్డి, నాగర్కర్నూల్, వనపర్తి, జోగులాంబ గద్వాల, నారాయణపేట, మంచిర్యాల, కరీంనగర్, పెద్దపల్లి జిల్లాల్లో మోస్తరు నుంచి భారీ వర్షాలు కురిసే అవకాశం ఉందన్న వాతావరణ శాఖ.. ఆయా జిల్లాలకు ఎల్లో అలర్ట్ను ఇష్యూ చేసింది. హైదరాబాద్ సిటీలోనూ మోస్తరు వర్షాలు పడే అవకాశమున్నట్టు తెలిపింది. రాష్ట్రంలో గంటకు 40 కిలోమీటర్ల వేగంతో ఈదురుగాలులు వీచే అవకాశం ఉన్నదని పేర్కొన్నది.
తగ్గిన టెంపరేచర్లు..
రాష్ట్రంలో శుక్రవారం జయశంకర్ భూపాలపల్లి, ములుగు, నాగర్కర్నూల్, పెద్దపల్లి, రాజన్న సిరిసిల్ల, సిద్దిపేట, హనుమకొండ, వనపర్తి, సూర్యాపేట, ఖమ్మం, కామారెడ్డి, కరీంనగర్, జగిత్యాల మంచిర్యాల, ఆసిఫాబాద్, గద్వాల జిల్లాల్లో తేలికపాటి నుంచి మోస్తరు వర్షాలు కురిశాయి. నాగర్కర్నూల్ జిల్లా పెంట్లవెల్లిలో 6.8 సెంటీమీటర్ల వర్షపాతం నమోదైంది. జయశంకర్ భూపాలపల్లి జిల్లా చేల్పూరులో 5.3, కుమ్రంభీం ఆసిఫాబాద్ జిల్లా సిర్పూర్లో 5.1, సిద్దిపేటలో 4.8, జోగుళాంబ గద్వాల జిల్లా అలంపూర్లో 4.6, కరీంనగర్ జిల్లా వెంకెపల్లిలో 4.5 సెంటీమీటర్ల చొప్పున వర్షపాతం నమోదైంది. మిగతా ప్రాంతాల్లో తేలికపాటి వర్షాలు కురిశాయి. వర్షాల ఎఫెక్ట్తో రాష్ట్రంలో టెంపరేచర్లు భారీగా తగ్గాయి. ఉష్ణోగ్రతలు 40 డిగ్రీల కిందకు దిగొచ్చాయి. అత్యధికంగా ఆదిలాబాద్ జిల్లాలో 39.8 డిగ్రీల టెంపరేచర్ నమోదైంది. నిజామాబాద్ జిల్లా వాయల్పూర్లో 38.8, నిర్మల్ జిల్లా లింగాపూర్, నాగర్కర్నూల్ జిల్లా పెద్దకొత్తపల్లిలో 38.5, మంచిర్యాల జిల్లా కాశీపేటలో 38 డిగ్రీల చొప్పున ఉష్ణోగ్రతలు రికార్డయ్యాయి. మిగతా జిల్లాల్లో 37 డిగ్రీల కన్నా తక్కువగానే నమోదయ్యాయి. హైదరాబాద్, రంగారెడ్డి, మేడ్చల్ మల్కాజిగిరి, యాదాద్రి భువనగిరి జిల్లాల్లో 35 డిగ్రీల మేర టెంపరేచర్లు రికార్డయ్యాయి.
