- ఫార్ములా ఈ రేస్ కేసులో నెల గడుస్తున్నా ఫైల్ పెండింగ్
- ఏసీబీ ప్రాసిక్యూషన్కు గవర్నర్అనుమతి కోరిన ప్రభుత్వం
- సీఎం కామెంట్స్తో మరోసారి చర్చ
- పర్మిషన్ రాకున్నా కస్టడీలోకి తీసుకుని
- విచారించే యోచనలో సర్కారు!
హైదరాబాద్, వెలుగు: ఫార్ములా ఈ రేస్ కేసులో మాజీ మంత్రి కేటీఆర్ ప్రాసిక్యూషన్పై రాజ్భవన్ సైలెన్స్ మెయింటెయిన్ చేస్తున్నది. దీంతో ఈ కేసు ఎటు మలుపు తిరుగుతుందోననే సందిగ్ధం నెలకొన్నది. నెల కిందట ప్రాసిక్యూషన్ కోసం గవర్నర్ అనుమతి కోరుతూ రాష్ట్ర ప్రభుత్వం లేఖ పంపింది. సీఎం రేవంత్ కూడా తన సోదరుడి కుమారుడి వివాహ ఆహ్వాన పత్రికను ఇచ్చేందుకు గవర్నర్ జిష్ణుదేవ్ వర్మను ప్రత్యేకంగా కలిసిన సందర్భంలోనూ ఈ అంశాన్ని ప్రస్తావించినట్టు తెలిసింది. అయినప్పటికీ గవర్నర్ ఇంకా నిర్ణయం తీసుకోలేదు. ఆ తర్వాత గవర్నర్ ఢిల్లీ వెళ్లి వచ్చారు.
ఈ సందర్భంగా ఆయన అటార్నీ జనరల్ నుంచి న్యాయ సలహా తీసుకున్నారనే చర్చ జరిగింది.అదే సమయంలో కేటీఆర్ పై ప్రాసిక్యూషన్ పర్మిషన్కు సంబంధించిన ఫైల్ను గవర్నర్ ప్రత్యేకంగా చూస్తున్నారంటూ రాజ్భవన్వర్గాలు పేర్కొంటున్నాయి. ఒకవైపు కేటీఆర్ ను అరెస్ట్ చేయాల్సిందేనని కేంద్ర హోంశాఖ సహాయమంత్రి బండి సంజయ్ డిమాండ్ చేస్తుండగా.. మరోవైపు గవర్నర్ పర్మిషన్ రాకుండా కేంద్రంలోని బీజేపీ పెద్దలతో పైరవీ చేసుకుంటున్నారని కాంగ్రెస్ నుంచి సీఎం రేవంత్ రెడ్డి, మంత్రులు ఆరోపిస్తున్నారు. ఇటీవల 2 సార్లు ఢిల్లీ పర్యటనకు వెళ్లిన సీఎం రేవంత్ రెడ్డి ఇదే అంశాన్ని ప్రస్తావించారు.
అంతకుముందు గవర్నర్ దగ్గర కేటీఆర్ ప్రాసిక్యూషన్కు సంబంధించిన అనుమతి పెండింగ్లో ఉందని తెలిపారు. మొన్నటి పర్యటన కంటే ముందు నిర్వహించిన ప్రెస్మీట్లో గవర్నర్ అనుమతి ఇవ్వకుండా కేసు నుంచి తప్పించుకునేందుకు కేటీఆర్ ఢిల్లీ వెళ్లి ప్రధాని మోదీ కాళ్లు పట్టుకుంటున్నారని ఆరోపించారు. దీంతో ఫార్ములా ఈ రేస్ కేసులో రాష్ట్ర ప్రభుత్వం ఎలా ముందుకు వెళ్తుందనేది సర్వత్రా ఉత్కంఠ రేపుతున్నది. ఒకవేళ గవర్నర్ అనుమతి రాకపోతే ముందుకు వెళ్తే న్యాయపరంగా ఎలాంటి చిక్కులు వస్తాయి ? దానికి ప్రభుత్వం ఎలా సిద్ధంగా ఉండాలనే దానిపైనా ఆరా తీస్తున్నది.
పర్మిషన్ రాకున్నా కస్టడీలోకి!
గవర్నర్ అనుమతి నిర్ణయంపై ఇంకా కొంతకాలం చూసి.. తదుపరి చర్యలు తీసుకోవాలని రాష్ట్ర ప్రభుత్వం భావిస్తున్నట్టు తెలిసింది. ‘‘ఒకవేళ గవర్నర్ నుంచి అనుమతి వస్తే దానికి తగ్గట్టుగా ముందుకు వెళ్తారు. పర్మిషన్ రాకుంటే కేటీఆర్ను అదుపులోకి తీసుకొని విచారించే అవకాశం ఉన్నది’’ అని సెక్రటేరియెట్లోని ఉన్నతాధికారి ఒకరు 'వెలుగు'కు తెలిపారు. ఏపీలో గత ప్రభుత్వం చంద్రబాబు నాయుడును అరెస్ట్ చేసిందని, గవర్నర్ అనుమతి లేకుండా చేయడంపై సుప్రీంకోర్టు కూడా ప్రత్యేక విచారణ చేపట్టిందని ఆ అధికారి వివరించారు.
అయితే ఒకసారి అదుపులోకి తీసుకొని అవినీతి జరిగిందని, ప్రభుత్వ సొమ్ము దుర్వినియోగం జరిగిందని నిరూపించగలిగితే కోర్టులనుంచి కూడా ఎలాంటి ఇబ్బంది ఉండబోదని అనుకుంటున్నట్టు తెలిపారు. ఎఫ్ఐఆర్లో పేరు నమోదు చేయకున్నా.. కస్టడీకి తీసుకొని విచారణ చేసి.. నేరుగా చార్జ్షీట్లోనే పేరును చేర్చేందుకు అవకాశం ఉన్నది. దీంతో ఈ రకంగాను ప్రభుత్వం ముందుకు వెళ్లే అవకాశం ఉన్నట్టు తెలుస్తున్నది. ఇతర రాష్ట్రాల్లో ఇలాంటి కేసుల్లో ఎలా ముందుకు వెళ్లారనే దానిపై కూడా స్టడీ చేస్తున్నారు.
