- మీ ఇంటి దావతే అయితే మీ బావ కేటీఆర్ రాలేదా?
- రాజ్ పాకాలను ప్రశ్నించిన పోలీసులు
- పార్టీకి వచ్చిన ప్రముఖులెవరు.. ఫారిన్ మందు ఎక్కడి నుంచి తెచ్చిన్రు?
- తప్పు చేయకపోతే దావత్ నుంచి ఎందుకు పారిపోయినవ్
- ఆరా తీసిన పోలీసులు.. తెలియదు, గుర్తులేదన్న రాజ్!
- ఫామ్హౌస్లో సీన్ రీక్రియేషన్
చేవెళ్ల, వెలుగు : జన్వాడ ఫామ్హౌస్ పార్టీ కేసు విచారణ ఊపందుకుంది. దావత్ జరిగిన తర్వాత కనిపించకుండా పోయిన కేటీఆర్ బామ్మర్ది, ఏ1 రాజ్ పాకాల బుధవారం మోకిల పోలీస్ స్టేషన్ లో విచారణకు హాజరయ్యాడు. రాజ్ పాకాల ఇచ్చిన ఈ పార్టీలో పాల్గొన్న విజయ్ మద్దూరికి డ్రగ్స్ (కొకైన్) పాజిటివ్ అని తేలడంతో.. కొకైన్ను ఎక్కడి నుంచి తెచ్చారనే దానిపై పోలీసులు ఫోకస్ పెట్టారు. ఇదే అంశంపై రాజ్ పాకాలను ప్రశ్నించినట్లు తెలిసింది. దావత్ నుంచి ఎందుకు పారిపోయావని, రెండు రోజులు ఎక్కడ ఉన్నావని ఆరా తీసినట్లు సమాచారం.
‘‘ఫామ్హౌస్లో జరిగింది మీ ఇంటి దావతే అయితే మీ బావ కేటీఆర్ రాలేదా? లేకపోతే ముందే ఆయన వచ్చి వెళ్లిపోయారా? పోలీస్ రైడ్ అవుతుందని తెలిసి వెళ్లిపోయారా?” అని రాజ్ పాకాలను ప్రశ్నించినట్లు తెలిసింది. పార్టీకి వచ్చిన ప్రముఖులెవరని, విదేశీ మద్యం ఎక్కడి నుంచి తెచ్చారని, ఎంత తెచ్చారని కూడా ప్రశ్నించినట్లు సమాచారం. వీటిలో కొన్ని ప్రశ్నలకు తెలియదని.. మరికొన్ని ప్రశ్నలకు గుర్తులేదని రాజ్ చెప్పినట్లు తెలిసింది. తనను అరెస్ట్చేయకుండా ఆదేశాలు ఇవ్వాలని రెండు రోజుల కింద రాజ్ పాకాల హైకోర్టును ఆశ్రయించడంతో కోర్టు పర్మిషన్ ఇచ్చింది.
బుధవారం 12 గంటల వరకే పోలీసుల ముందు హాజరుకావాలని ఆదేశించింది. దీంతో ఆయన బుధవారం మధ్యాహ్నం 12 గంటల 15 నిమిషాలకు తన న్యాయవాదులతో కలిసి రంగారెడ్డి జిల్లా సైబరాబాద్కమిషనరేట్పరిధిలోని మోకిల పోలీస్స్టేషన్ కు వచ్చారు. నార్సింగి ఏసీపీ రమణ గౌడ్, మోకిల సీఐ వీరబాబు, శంకర్ పల్లి సీఐ శ్రీనివాస్ గౌడ్, నార్సింగి డీఐ శ్రీనివాస్ గౌడ్ సమక్షంలో రాజ్ పాకాల విచారణ కొనసాగింది. అంతకుముందే ఆయన సెల్ ఫోన్ను పోలీసులు స్వాధీనం చేసుకొని సీజ్ చేశారు.
పార్టీకి ఎవరెవరు వచ్చారు?
విచారణలో భాగంగా రాజ్ పాకాలకు పోలీసులు పలు ప్రశ్నలు వేశారు. విజయ్ మద్దూరి ఇచ్చిన స్టేట్మెంట్ ఆధారంగానే విచారణ కొనసాగినట్టు తెలిసింది. ‘‘ఫామ్ హౌస్ పార్టీకి ఎవరెవరు హాజరయ్యారు? అందులో మీ స్నేహితులు ఎంతమంది ఉన్నారు.. బంధువులు ఎంతమంది ఉన్నారు.. విజయ్మద్దూరికి డ్రగ్స్ఇచ్చారా? మీరే ఇచ్చారని ఆయన చెప్తున్నారు.. దానికి మీ సమాధానం ఏమిటి? ఆ డ్రగ్స్ఎక్కడి నుంచి తెచ్చారు?
ఇచ్చిన వారి పేరేంటి? తప్పు చేయకపోతే దావత్ నుంచి ఎందుకు పారిపోయావ్?’’ అని ప్రశ్నించినట్టు సమాచారం. గతంలో జరిగిన పార్టీలపైనా ఆరా తీసినట్లు తెలిసింది. విజయ్ప్రస్తుతం ఎక్కడున్నాడని ప్రశ్నించగా.. అక్కడే ఉన్న అతడి న్యాయవాదులు కాంటినెంటల్హాస్పిటల్లో చికిత్స పొందుతున్నారని చెప్పారు.
డిజిటల్లాకర్లో బెడ్రూంల తాళాలు!
పోలీస్స్టేషన్లో రాజ్పాకాల విచారణ పూర్తయిన తర్వాత అతడ్ని మధ్యాహ్నం 3 గంటల 19 నిమిషాలకు జన్వాడలోని ఫామ్ హౌస్ కు తీసుకువెళ్లారు. అక్కడ సీన్రీక్రియేషన్చేశారు. పార్టీకి ఎవరెవరు వచ్చారు? ఎక్కడెక్కడ కూర్చున్నారు? ఎక్కడ ఏం చేశారు.. లాంటి వివరాలను రాజ్ను అడిగి తెలుసుకున్నారు. ఫామ్హౌస్లో నాలుగు బెడ్రూంలు ఉండగా, అన్నింటినీ తనిఖీ చేశారు. ప్రతి బెడ్రూం తాళాలు డిజిటల్లాకర్లోని అల్యూమినియం బాక్స్లో భద్రపరిచి ఉండగా.. దాన్ని కోడ్తో రాజ్ పాకాల ఓపెన్చేసి తాళాలు తీసిచ్చాడు. నాలుగు బెడ్ రూమ్స్లోకి వెళ్లిన పోలీసులు కప్బోర్డులను చెక్చేశారు.
అక్కడున్న కొన్ని ఫైల్స్పరిశీలించారు. ఈ సందర్భంగా కొన్ని పత్రాలను స్వాధీనం చేసుకున్నట్టు తెలుస్తున్నది. సాయంత్రం 4.30 గంటల వరకు సోదాలు చేసి ఫామ్ హౌస్ నుంచి మళ్లీ పోలీస్స్టేషన్కు రాజ్ పాకాలకు పోలీసులు తీసుకువెళ్లారు. క్రాస్చెక్చేయడానికి మళ్లీ అవే ప్రశ్నలతో పాటు కొత్త ప్రశ్నలు అడిగారు. కొన్ని ప్రశ్నలకు తెలియదని.. మరికొన్ని ప్రశ్నలకు గుర్తులేదని రాజ్ చెప్పిన్నట్లు సమాచారం.
తాను ప్రతి విచారణకు హాజరవుతానని హామీ ఇవ్వడంతో రాత్రి 8 గంటల తర్వాత రాజ్ పాకాలకు బీఎన్ఎస్ఎస్ 35(3) క్లాజ్ ప్రకారం నోటీసులు ఇచ్చి పంపించారు. ఎప్పుడు విచారణకు పిలిచినా రావాలని తేల్చిచెప్పారు. కాగా, సాయంత్రం 5 గంటల తర్వాత రాజ్ పాకాల సోదరుడు శైలేంద్ర మోకిల పోలీస్ స్టేషన్ కు వచ్చాడు. అతడ్ని కూడా ఫామ్హౌస్లో జరిగిన పార్టీ గురించి ప్రశ్నించినట్టు తెలిసింది.
కాంటినెంటల్ హాస్పిటల్లో మద్దూరి
చేవెళ్ల : జన్వాడ ఫాంహౌస్లో పార్టీ రోజు డ్రగ్స్ తీసుకున్న విజయ్ మద్దూరి బుధవారం కాంటినెంటల్ హాస్పిటల్లో ఉన్నట్టు తెలిసింది. ఫాంహౌస్లో ఘటన జరిగిన తెల్లవారే విజయ్ను పోలీసులు అదుపులోకి తీసుకుని విచారించారు. అందులో రాజ్ పాకాల కొకైన్ ఇస్తేనే వాడానని చెప్పడంతో మోకిలా పోలీసులు ఎఫ్ఐఆర్ నమోదు చేసి నోటీసు ఇచ్చి పంపించారు. ఎప్పుడు విచారణకు రమ్మని పిలిచినా హాజరుకావాలని కోరారు. అదుపులోకి తీసుకున్నప్పుడు విజయ్ వేరే మహిళ ఫోన్ ఇవ్వడం, కాంటాక్ట్ నంబర్ అడిగితే మరో మహిళది ఇవ్వడంతో కాంటాక్ట్ కాలేకపోయారు.
విచారణకు రావాలని ఫోన్ చేస్తే వేరే మహిళ ఫోన్ లిఫ్ట్ చేయగా అసలు విషయం గుర్తించారు. ఆ ఫోన్ కోసం మంగళవారం రాయదుర్గంలోని విజయ్ మద్దూరి విల్లాలో సోదాలు చేశారు. కానీ ఫోన్ దొరకలేదు. ఎవరి ఫోన్ అయితే ఇచ్చాడో ఆ మహిళ స్టేట్మెంట్ కూడా రికార్డు చేసుకున్నారు. బుధవారం విజయ్..రాజ్తో పాటు మోకిలా పోలీసుల ఎదుట హాజరు కావాల్సి ఉండగా రాలేదు. దీంతో అతడు ఎందుకు రాలేదని రాజ్ను ప్రశ్నించగా కాంటినెంటల్ హాస్పిటల్లో అనారోగ్యంతో చికిత్స పొందుతున్నాడని రాజ్ వెంట వచ్చిన అడ్వొకేట్లు చెప్పారు. దానికి సంబంధించిన మెడికల్ రిపోర్ట్స్ అందజేశారు. దీంతో త్వరలోనే విజయ్ను విచారణకు పిలుస్తామని పోలీసులు చెప్పారు.
ఎవరికో పాజిటివ్ వస్తే నాకేం సంబంధం
మా ఫామ్ హౌస్ లో జరిగింది కుటుంబ ఫంక్షన్. విజయ్ మద్దూరి నేను డ్రగ్స్ఇచ్చానని ఎలాటి స్టేట్ మెంట్ ఇయ్యలేదు. ఎవరికో డ్రగ్స్పాజిటివ్ వస్తే నాకేం సంబంధం? ఈ ఘటనలో మా కుటుంబం డిస్టర్బ్ అయింది. ఫ్యామిలీ పార్టీలు చేసువద్దా? కావాలనే ఇష్యూను పెద్దదిగా చిత్రీకరిస్తున్నరు. పోలీసుల విచారణకు సహకరించా. అన్ని ప్రశ్నలకు సమాదానం ఇచ్చా.
- రాజ్ పాకాల, నిందితుడు
మరోసారి విచారణకు పిలుస్తాం
కేసు దర్యాప్తులో ఉంది. అవసరమైతే రాజ్ పాకాలను మరోసారి విచారణకు పిలుస్తాం. విచారణకు సహకరిస్తున్నాడు. ఇంకా విచారణ కొనసాగుతూనే ఉంటుంది. విజయ్ మద్దూరి హాజరుకావాల్సి ఉండే. రాలేదు.
- నార్సింగి ఏసీపీ రమణ గౌడ్
