ఐపీఎల్ 18లో భాగంగా పంజాబ్ కింగ్స్తో జరుగుతోన్న మ్యాచులో రాజస్థాన్ రాయల్స్ బ్యాటర్స్ రాణించారు. పంజాబ్ బౌలర్లను ధీటుగా ఎదుర్కొని భారీ స్కోర్ చేశారు. లీగులో ఫామ్ లేమితో సతమతమవుతోన్న యంగ్ బ్యాటర్ యశస్వీ జైశ్వాల్ ఈ మ్యాచులో తిరిగి టచ్లోకి వచ్చాడు. పంజాబ్ బౌలర్లను సమర్థవంతంగా ఎదుర్కొని 67 పరుగులు చేశాడు. ఆర్ఆర్ కెప్టెన్ శాంసన్ 38 పరుగులతో ఆకట్టుకోగా.. చివర్లో రియాన్ పరాగ్ (43) చెలరేగి ఆడాడు. దీంతో రాజస్థాన్ నిర్ణీత 20 ఓవర్లలో 4 వికెట్ల నష్టానికి 205 పరుగుల భారీ స్కోర్ చేసింది.
ఈ మ్యాచులో టాస్ ఓడి తొలుత బ్యాటింగ్కు దిగిన రాజస్థాన్ రాయల్స్కు ఆదిరిపోయే ఆరంభం దక్కింది. ఓపెనర్స్ యశస్వీ జైశ్వాల్, కెప్టెన్ సంజు శాంసన్ అద్భుతంగా రాణించారు. దీంతో ఆర్ఆర్ వికెట్ నష్టపోకుండా పవర్ ప్లేలో53 పరుగులు చేసింది. 26 బంతులు ఎదుర్కొన్న శాంసన్ 6 ఫోర్లు బాది 38 పరుగులు చేశాడు. వేగంగా ఆడే క్రమంలో ఫెర్గ్యూసన్ బౌలింగ్లో క్యాచ్ ఔట్ అయ్యాడు.
శాంసన్ ఔట్ అయిన మరో ఎండ్లో ఆచూతూచీ ఆడిన జైశ్వాల్ హాఫ్ సెంచరీ కంప్లీట్ చేసుకున్నాడు. ఈ క్రమంలోనే 67 పరుగుల వద్ద భారీ షాట్ ఆడబోయి ఫెర్గ్యూసన్ బౌలింగ్లో క్లీన్ బౌల్డ్ అయ్యాడు. చివర్లో రియాన్ పరాగ్ (43 నాటౌట్), హెట్మేయర్ (20), దృవ్ జురెల్ (13 నాటౌట్) రాణించడంతో ఆర్ఆర్ 205 పరుగల భారీ స్కోర్ చేసింది. పంజాబ్ బౌలర్లలో ఫెర్గ్యూసన్ 2, మార్కో జాన్సెన్, అర్షదీప్ సింగ్ చెరో వికెట్ తీశారు. అనంతరం 206 పరుగల భారీ లక్ష్యంతో పంజాబ్ ఛేదనకు దిగింది.
