- అప్పు చేసి కూలీలకు 12.5 లక్షలు ఇచ్చిన రాజేశ్
- పని చేయకుండా పారిపోయిన కార్మికులు
- డబ్బులు చెల్లించాలని అప్పులోళ్ల ఒత్తిళ్లు
- భూమి అమ్మి కడదామంటే అడ్డం పడిన ‘ధరణి’
- నిజామాబాద్ జిల్లాలో విషాదం
నిజామాబాద్, వెలుగు : జిల్లాలోని జక్రాన్పల్లి మండలం అర్గుల్గ్రామానికి చెందిన కుంట రాజేశ్అలియాస్ ఇటుకబట్టీ రాజేశ్(47) అప్పులిచ్చిన వారి వేధింపులు భరించలేక గురువారం పురుగుల మందుతాగి ఆత్యహత్య చేసుకున్నాడు. చనిపోవడానికి ముందు ఏడుస్తూ సెల్ఫోన్లో వాయిస్ రికార్డు చేయగా పోలీసులు ఫోన్ను స్వాధీనం చేసుకున్నారు. అందులోని వివరాల ప్రకారం...ఇటుక బట్టీ బిజినెస్కోసం రాజేశ్ తెలిసిన వారి దగ్గరి నుంచి రూ.12.5 లక్షల అప్పు తెచ్చాడు.
డబ్బులన్నీ లేబర్లకు ఇవ్వగా వారు పని చేయకుండా మోసం చేసి వెళ్లిపోయారు. దీంతో మూడేండ్ల నుంచి నెలకు రూ.60 వేల వడ్డీ కడుతున్నాడు. డబ్బులు అడ్జస్ట్ కాకపోవడంతో ప్రతి రోజు10 మంది ఫోన్లు చేసి అప్పు చెల్లించాలని ఒత్తిడి చేస్తున్నారు. దీంతో తిండి, నిద్ర లేక వేదన అనుభవించాడు. ఉన్న ఎకరం భూమి అమ్మి బాకీ తీరుద్దామంటే ధరణిలో అధిక విస్తీర్ణం నమోదైనందున (ఆర్ఎస్ఆర్వేరియేషన్) సమస్య వచ్చి అమ్ముకోలేకపోయాడు.
చావు తప్ప మరో మార్గం కనిపించకే సూసైడ్ చేసుకుంటున్నట్లు తెలిపాడు. వీలైతే తన ఎకరం అమ్మి డబ్బులు సర్దుబాటు చేసుకోవాలని, తన భార్య లలిత సంతకం పెడుతుందన్నారు. అమ్మడానికి వీలుకానట్లయితే అప్పులిచ్చిన వాళ్లంతా కలిసి భూమిని పంచుకోవాలన్నాడు. గ్రామంలో ఉన్న చిన్న కూనిళ్లు, చిన్న ప్లాట్తన ఇద్దరు కొడుకులకు వదిలేయాలని దండం పెట్టి.. కాళ్లు మొక్కుతున్నట్లు వేడుకున్నాడు. ఎవరితోనూ తప్పుగా మాట్లాడలేదని, జీవితం బాగుండాలని ఆశించి ఇటుక బట్టీ పెట్టానని, లేబర్ల కారణంగా నష్టపోయానన్నాడు. బాకీవాళ్ల టార్చర్ భరించలేక జీవితాన్ని ముగించుకుంటున్నట్లు పేర్కొన్నాడు.
