- స్టూడెంట్లు తమ భవిష్యత్ను నాశనం చేసుకోవద్దు
గోదావరిఖని, వెలుగు : స్టూడెంట్లు ర్యాగింగ్, ఈవ్ టీజింగ్కు పాల్పడి తమ భవిష్యత్ను నాశనం చేసుకోవద్దని రామగుండం పోలీస్ కమిషనర్ ఎం.శ్రీనివాసులు హెచ్చరించారు. రామగుండం మెడికల్ కాలేజీలో జూనియర్లపై సీనియర్లు ర్యాగింగ్కు పాల్పడిన ఘటన నేపథ్యంలో గురువారం కాలేజీ లో అవగాహన కల్పించారు. ఈ సందర్భంగా 'ర్యాగింగ్ నేరం' అనే పోస్టర్ ఆవిష్కరించి స్టూడెంట్లతో ప్రతిజ్ఞ చేయించారు. అనంతరం సీపీ మాట్లాడుతూ విద్యార్థులకు కాలేజీ క్యాంపస్ జీవితం కీలకమని, వారు ఉన్నతంగా చదవడానికి, ఎదగడానికి దానిని ఉపయోగించుకోవాలన్నారు.
సీనియర్లు జూనియర్ విద్యార్థులకు గైడ్ లాగా బ్రదర్ లాగా ఉండాలని సూచించారు. ర్యాగింగ్ రహిత క్యాంపస్ గా మార్చడానికి విద్యార్థులు కృషి చేయాలని కోరారు. భవిష్యత్తులో ఎవరైనా ర్యాగింగ్, ఈవ్ టీజింగ్ లాంటి చర్యలకు పాల్పడితే చట్టపరంగా చర్యలు తీసుకుంటామని హెచ్చరించారు. కాలేజీలో స్పెషల్ పోలీస్ టీమ్ను ఏర్పాటు చేస్తామని ప్రకటించారు.
కాగా రాబోయే రోజుల్లో రామగుండం కమిషనరేట్ ఆధ్వర్యంలో అన్ని విద్యా సంస్థలలో ర్యాగింగ్ వ్యతిరేక అవగాహన కార్యక్రమాలు నిర్వహిస్తామన్నారు. ఈ కార్యక్రమంలో పెద్దపల్లి డీసీపీ డాక్టర్ ఎం.చేతన, కాలేజీ ప్రిన్సిపాల్ డాక్టర్ హిమబిందు సింగ్, పెద్దపల్లి కోర్టు పబ్లిక్ ప్రాసిక్యూటర్ ఎం.జ్యోతి, లీగల్ ఎయిడ్ కౌన్సిల్ మెంబర్ నుచ్చు శ్రీనివాస్, సీడీపీఓ కమాలాకర్, ఇన్స్పెక్టర్లు ప్రమోద్రావు, ప్రవీణ్కుమార్, పాల్గొన్నారు.
