మంచిర్యాల, వెలుగు: రానున్న అసెంబ్లీ ఎన్నికలు సజావుగా జరిగేలా ఏర్పాట్లు చేయాలని రామగుండం పోలీస్ కమిషనర్‌ రెమా రాజేశ్వరి అన్నారు. గురువారం కమిషనరేట్ లో మంచిర్యాల, పెద్దపల్లి డీసీపీలు సుధీర్ రాంనాథ్ కేకన్, వైభవ్ గైక్వాడ్, నిర్మల్, కుమ్రంభీం ఆసిఫాబాద్, జగిత్యాల, భూపాలపల్లి జయశంకర్ఎస్పీలు ప్రవీణ్ కుమార్, సురేశ్ కుమార్, ఏ.భాస్కర్, పి.కరుణాకర్, కరీంనగర్ రూరల్ ఏసీపీ టి.కరుణాకర్ రావుతో పాటు పోలీసు అధికారులతో ఇంటర్ డిస్ట్రిక్ట్ బార్డర్ రివ్యూ మీటింగ్ నిర్వహించారు.
అంతర్ జిల్లా సరిహద్దు చెక్పోస్టుల ఏర్పాటుకు ప్రాంతాలను గుర్తించాలని, సరిహద్దు ప్రాంతాల్లో మావోయిస్టుల కదలికలపై నిఘా పెంచాలని, జాయింట్కూంబింగ్ ఆపరేషన్, ఏరియా డామినేషన్స్, కమ్యూనిటీ కాంటాక్ట్ ప్రోగ్రాంల నిర్వహణకు ప్లాన్ రెడీ చేయాలని సూచించారు. ఉమ్మడి అసెంబ్లీ నియోజకవర్గాల్లో ఓటింగ్ యంత్రాల రవాణా బందోబస్తుపై చర్చించారు. మాదక ద్రవ్యాలు, అక్రమ మద్యం, ఆయుధాలను నియంత్రించాలన్నారు. వీవీఐపీలు, వీఐపీల టూర్ల సందర్భంగా పటిష్ట బందోబస్తు ఏర్పాటు చేయాలన్నారు. ఎన్నికల సమయంలో నేరాలకు పాల్పడిన వ్యక్తులను బైండోవర్ చేయడంలో అధికారుల పరస్పర సహకారం ఉండాలన్నారు.
