బెల్లంపల్లి, వెలుగు: సంక్షేమ గురుకుల విద్యాలయాల సంస్థ ఆధ్వర్యంలో బెల్లంపల్లి పట్టణంలోని తెలంగాణ సాంఘిక సంక్షేమ బాలుర గురుకుల పాఠశాల, సీఓఈ(సెంటర్ ఆఫ్ ఎక్సలెన్సీ)లో ఈ నెల 13 నుంచి 16వ తేదీ వరకు గురుకుల జోనల్ స్థాయి క్రీడా పోటీలు జరుగుతాయని సంక్షేమ గురుకుల స్పోర్ట్స్ ఆఫీసర్ డా.జె.రామలక్ష్మణ్ తెలిపారు.
మంగళవారం ఆయన సీఓఈను సందర్శించి క్రీడలకు సంబంధించిన ఏర్పాట్ల గురించి గేమ్స్ మీట్ ఓవరాల్ ఇన్చార్జ్ ప్రసాద్, జిల్లా సమన్వయ అధికారి కొప్పుల స్వరూపరాణి, ప్రిన్సిపాల్ ఐనాల సైదులును అడిగి తెలుసుకున్నారు. అండర్ 14, 17, 19 విభాగాల్లో కబడ్డీ, ఫుట్బాల్, హ్యాండ్ బాల్, వాలీబాల్, బ్యాడ్మింటన్, టెన్నికాయిట్, ఖోఖో, చెస్, క్యారమ్స్, రన్నింగ్, షాట్ పుట్, డిస్కస్ త్రో, లాంగ్ జంప్, హై జంప్ వంటి క్రీడలు నాలుగు రోజుల పాటు జరుగుతాయని తెలిపారు. గురుకులాల ప్రిన్సిపాల్స్ ఊటూరి సంతోష్, ఎస్.స్వరూప పాల్గొన్నారు.
