నల్లగొండ: వచ్చే నెల (అక్టోబర్)లో అర్హులకు కొత్త రేషన్ కార్డ్లు, ఇందిరమ్మ ఇళ్లు అందజేస్తామని మంత్రి కోమటిరెడ్డి వెంకట్ రెడ్డి అన్నారు. మంగళవారం నల్లగొండ జిల్లా మిర్యాలగూడ బైపాస్ రోడ్డులో నూతనంగా నిర్మించనున్న నాలుగు ఫ్లైఓవర్లకు ఆయన భూమిపూజ చేశారు. అనంతరం మిర్యాలగూడ రైస్ మిల్లర్స్ అసోసియేషన్ ఆధ్వర్యంలో మహబూబాబాద్ జిల్లా వరద బాధిత కుటుంబాలకు 30 టన్నుల బియ్యం పంపుతోన్న వాహనాన్ని జెండా ఊపి ప్రారంభించారు.
ఈ సందర్భంగా కోమటిరెడ్డి మాట్లాడుతూ.. కాంగ్రెస్ పార్టీ అధికారంలో వచ్చాక ప్రజలకు అనేక సంక్షేమ పథకాలు అందుతున్నాయని.. భవిష్యత్లో మరిన్నీ అభివృద్ధి కార్యక్రమాలు చేపడతామన్నారు. మిర్యాలగూడలో అనేక ప్రమాదాలు జరుగుతున్నా.. గత బీఆర్ఎస్ ప్రభుత్వం పట్టించుకోలేదని తీవ్ర ఆగ్రహం వ్యక్తం చేసిన మంత్రి.. ప్రమాదాలు నివారించడానికి మేం అధికారంలోకి రాగానే నాలుగు కొత్త ఫ్లైఓవర్లు నిర్మిస్తున్నామని తెలిపారు.
ప్రమాదకరంగా ఉన్న సర్కిల్లలో ప్లైఓవర్లు త్వరిత గతిన పూర్తి చేసి ప్రమాదాలను అరికడతామని అన్నారు. యాదాద్రి ధర్మల్ ప్లాంట్ను ఆరు, ఏడు నెలల్లో పూర్తి చేస్తామని అన్నారు. ఎస్ఎల్బీసీ సొరంగ మార్గాన్ని మాజీ సీఎం కేసీఆర్పట్టించుకోలేదని.. దానిని కూడా కాంగ్రెస్ హయాంలోనే పూర్తి చేస్తామని పేర్కొన్నారు. ఓడిపోయిన మిర్యాలగూడ ఎమ్మెల్యే మళ్ళీ సర్పంచ్గా కూడా గెలవలేడని ఈ సందర్భంగా మంత్రి ఎద్దేవా చేశారు. రాబోయే కాలంలో మరిన్ని అభివృద్ది కార్యక్రమాలు జరగాలంటే.. స్థానిక సంస్థల ఎన్నికల్లో మళ్ళీ కాంగ్రెస్ను భారీ మెజారిటీతో గెలిపించాలని విజ్ఞప్తి చేశారు.
