- మెదక్జిల్లా రామాయంపేటలో ఘటన
- ఆలస్యంగా వెలుగులోకి..
రామాయంపేట, వెలుగు : మెదక్ జిల్లా రామాయంపేటలోని సోషల్ వెల్ఫేర్ గర్ల్స్ రెసిడెన్షియల్స్కూల్లో స్టూడెంట్స్ను ఎలుకలు కరిచాయి. ఈ విషయం గురువారం ఆలస్యంగా వెలుగులోకి వచ్చింది. పట్టణ శివారులోని కాళ్లగడ్డ ప్రాంతంలో టీజీ రెసిడెన్షియల్ స్కూల్ ఉంది. ఇక్కడ ఐదో తరగతి నుంచి ఇంటర్ వరకు 600 మంది స్టూడెంట్స్ చదువుతున్నారు. మూడు రోజుల కింద హాస్టల్లో స్టూడెంట్స్ నిద్రిస్తున్న సమయంలో 9 మందిని ఎలుకలు కరిచాయి.ఈ విషయాన్ని స్టూడెంట్స్.. రెసిడెన్షియల్ స్టాఫ్కు తెలపగా వారు విషయాన్ని బయటకు రానివ్వలేదు.
బుధవారం పేరెంట్స్ స్కూల్కు రావడంతో విషయం బయటపడింది. దీంతో వారు సిబ్బందిపై ఆగ్రహం వ్యక్తం చేయడంతో ట్రీట్ మెంట్ కోసం స్థానిక ప్రభుత్వ దవాఖానకు తరలించి ట్రీట్ మెంట్ చేయించారు. దీనిపై ఇన్చార్జి ప్రిన్సిపాల్పద్మ వివరణ కోరగా ‘హాస్టల్గదిలో ఒకటే ఎలుక ఉంది. దాన్ని పట్టుకోవడానికి ప్రయత్నిస్తున్నాం. పిల్లలకు ఇప్పటికే రెండు డోసుల టీకాలు వేయించాం’ అని బదులిచ్చారు. అయితే, హాస్టల్ ప్రాంగణంలోని చెత్త, అపరిశుభ్రత వల్లే ఎలుకలు చేరుతున్నాయని తెలుస్తోంది.
