శంషాబాద్, వెలుగు: ఆలయాలపై దాడులు జరుగుతుంటే రాష్ట్ర ప్రభుత్వం కనీసం స్పందించట్లేదని వీహెచ్పీ జాతీయ అధికార ప్రతినిధి రావినూతల శశిధర్ అన్నారు. శంషాబాద్ మండల పరిధిలోని జూకల్లో విగ్రహాల ధ్వంసమైన ప్రాంతాన్ని సోమవారం ఆయన పరిశీలించారు. ఇవి ఆలయాల మీద జరుగుతున్న దాడులు కావని, భారతదేశ సంస్కృతి, ప్రజలపై జరుగుతున్న దాడులని అభివర్ణించారు.
దేశవ్యాప్తంగా ఈ ఏడాదిలో ఇప్పటివరకు 543 దేవాలయాలపై ఒక ప్రణాళికబద్ధంగా దాడులు జరిగాయన్నారు. హిందువుల సహనాన్ని పరీక్షించవద్దని, దాడుల వెనుక ఉన్న ముఖ్య నిందితులను వెంటనే పట్టుకొని, కఠినంగా శిక్షించాలని డిమాండ్ చేశారు. కార్యక్రమంలో వీహెచ్పీ శంషాబాద్ అధ్యక్షుడు వివేకా గుప్త, ఉపాధ్యక్షుడు నర్సింహ గౌడ్, చుక్కపూరి రాజు కార్యదర్శులు సురేశ్ చారి, దూడల సందీప్ గౌడ్ తదితరులు పాల్గొన్నారు.
