ఆమ్​ ఆద్మీ పార్టీ ఓటమికి కారణాలెన్నో : లిక్కర్​ స్కామ్​ నుంచి శీష్​ మహల్ దాకా..!

• ఆమ్​ ఆద్మీ పార్టీ ఓటమికి కారణాలెన్నో
• అవినీతిపై పోరాడేందుకు వచ్చి.. అదే ఊబిలో చిక్కుకుని..!
• ఆగమైన కేజ్రీవాల్​ అండ్​ కో
• లిక్కర్​ స్కామ్​తో మొదలైన వ్యతిరేకత
• అధికార నివాసానికి రూ.33 కోట్లతో రిపేర్లపై దుమారం

న్యూఢిల్లీ: ‘‘ఇప్పుడున్న పార్టీలన్నీ అవినీతి ఊబిలో కూరుకుపోయాయి. సామాన్యుడ్ని ఏ పార్టీ కూడా పట్టించుకోవడం లేదు. అవినీతిపై పోరాడేందుకు, సామాన్యుడికి సేవ చేసేందుకే మేం పార్టీ పెడ్తున్నం’’... ఇదీ 2012 నవంబర్​ 26న అర్వింద్​ కేజ్రీవాల్​ చెప్పిన మాట. చెప్పినట్టుగా ఆ రోజు పార్టీని ప్రకటించారు. సామాన్యుడి పేరుతోనే తన పార్టీకి ‘ఆమ్​ ఆద్మీ పార్టీ (ఆప్​)’గా నామకరణం చేశారు. అవినీతి పార్టీలను ఊడ్చేస్తామంటూ ‘చీపురు కట్ట’ సింబల్​తో ముందుకు వచ్చారు. అనంతరం ఢిల్లీ అసెంబ్లీ ఎన్నికల్లో వరుసగా గెలిచి మూడుసార్లు ముఖ్యమంత్రి పదవిని చేపట్టారు. 

కేజ్రీవాల్​ పార్టీ పెట్టిన కొత్తలో క్యాండిడేట్​ ఎవరనేది కూడా చూడకుండా మద్దతు ప్రకటించిన ఓటర్లే.. ఇప్పుడు కేజ్రీ‘వాల్’ను కూల్చేశారు. ‘ఇక చాలు’ అంటూ ఇంటికి సాగనంపారు. తాను సామాన్యుడ్ని అంటూ ‘మఫ్లర్​ మ్యాన్’​గా జనాల్లో తిరిగిన కేజ్రీవాల్​ ప్రస్తుతం ఎమ్మెల్యేగా కూడా గెలవకపోవడానికి, ఆ పార్టీ అధికారాన్ని కోల్పోవడానికి అనేక కారణాలు ఉన్నాయి. ఏ అవినీతికి వ్యతిరేకంగా పోరాటం అంటూ ముందుకు వచ్చాడో.. అదే అవినీతి ఆరోపణల్లో కేజ్రీవాల్​ కూరుకుపోవడాన్ని ఓటర్లు సహించలేకపోయారు. ‘‘చెప్పింది ఒకటి.. చేస్తున్నది ఒకటి’’ అంటూ ఎన్నికల్లో ఆప్​పై తిరగబడ్డారు.  లిక్కర్​ స్కామ్​ మొదలు శీష్​ మహల్​ వరకు అనేక అవినీతి ఆరోపణలు కేజ్రీవాల్​ను చుట్టుముట్టాయి. చివరికి అవి ఆయన పార్టీని ఢిల్లీ గద్దె నుంచి దించాయి. 

అన్నా హజారేతో కలిసి నడిచి..!

2011లో ఢిల్లీ జంతర్​మంతర్​ వేదికగా సామాజిక ఉద్యమకారుడు అన్నా హజారే చేపట్టిన ‘జన్​లోక్​పాల్​’ ఉద్యమంతో అర్వింద్​ కేజ్రీవాల్​ పేరు బయటకు వచ్చింది. అన్నా హజారేకు సపోర్ట్​గా ఆ ఉద్యమంలో కేజ్రీవాల్​ విస్తృతంగా పాల్గొన్నారు. ఐఆర్​ఎస్ ఆఫీసర్​ అయిన ఆయన..  2012 నవంబర్​లో తాను రాజకీయ పార్టీ పెడ్తున్నట్లు ప్రకటించారు. అవినీతిపై పోరాడేందుకు, సామాన్యులకు అందుబాటులో ఉండేందుకు తాను ఆమ్​ ఆద్మీ పార్టీని స్థాపిస్తున్నట్లు చెప్పారు.  2013 ఢిల్లీ అసెంబ్లీ ఎన్నికల్లో కాంగ్రెస్​తో కలిసి ప్రభుత్వాన్ని ఏర్పాటు చేసి సీఎం అయిన కేజ్రీవాల్​.. ఆ తర్వాత పొత్తులు కుదరక 49 రోజులకే రాజీనామా చేశారు. 2015 ఎన్నికల్లో 70 సీట్లకు గాను 67 సీట్లు, 2020 అసెంబ్లీ ఎన్నికల్లో 62 సీట్ల భారీ మెజార్టీతో ఆప్​ గెలిచి.. కేజ్రీవాల్​మళ్లీ సీఎంగా బాధ్యతలు చేపట్టారు. సీఎంగా మొదట్లో హెల్త్​, ఎడ్యుకేషన్​ సెక్టార్​పై ఆయన ​ ఫోకస్​ పెట్టారు. స్కూళ్లను తీర్చిదిద్దారు. మొహల్లా క్లినిక్స్​ ఏర్పాటు చేశారు.

మూడోసారి సీఎం అయ్యాక..!

మూడోసారి సీఎంగా బాధ్యత చేపట్టాక కేజ్రీవాల్​ తీరు వివాదాస్పదమవుతూ వచ్చింది. ఏ అవినీతికి వ్యతిరేకంగా పోరాటం చేశారో.. అదే అవినీతి ఆరోపణలు ఆయనను చుట్టుముట్టాయి. ముఖ్యంగా ఢిల్లీ లిక్కర్​ స్కామ్ ​దేశవ్యాప్తంగా సంచలనం రేపింది. ఈ స్కామ్​లో ఏకంగా సీఎం హోదాలో ఉన్న కేజ్రీవాలే కీలక సూత్రధారిగా జైలుకు కూడా వెళ్లివచ్చారు. ఈ వ్యవహారం ఆయన చరిష్మాను దెబ్బకొట్టింది.  సీఎం అధికారిక నివాసానికి రూ. 33 కోట్లతో రిపేర్లు చేయించుకోవడం అగ్గికి ఆజ్యం పోసినట్లయింది. రిపేర్ల వ్యవహారాన్ని కాగ్​ తన రిపోర్ట్​లో బయటపెట్టింది. 2020లో  రూ.7.91 కోట్ల అంచనాలతో రిపేర్లను ప్రారంభించి.. 2022 నాటికి రూ.33 కోట్లు ఖర్చు చేశారని తేల్చిచెప్పింది. 

సామాన్యుల సీఎంగా చెప్పుకునే వ్యక్తి తన ‘శీష్​ మహల్​ (అద్దాల మేడ)’ కోసం ఇట్ల కోట్లాది రూపాయల ప్రజాధనాన్ని వృథా చేశారని ప్రధాని మోదీ సహా ప్రతిపక్షాలు భగ్గుమన్నాయి. ప్రజలు కూడా కేజ్రీవాల్​కు వ్యతిరేకంగా నిరసనలు చేపట్టారు. పైగా ఢిల్లీలో ఎయిర్​ పొల్యూషన్​ కట్టడికి ఆప్​ సర్కార్​ తగిన చర్యలు చేపట్టడం లేదని.. రోడ్లు, రవాణా వంటి మౌలిక సదుపాయాల కల్పనను కూడా గాలికి వదిలేసిందంటూ జనంలో వ్యతిరేకత తీవ్రమైంది. అవినీతి ఆరోపణలకు తోడు ఢిల్లీలో మౌలిక వసతులు లోపించడం, వాయికాలుష్యాన్ని కట్టడి చేయకపోవడం.. ఇట్ల అనేక కారణాలు ఆమ్​ ఆద్మీ పార్టీ ఓటమికి కారణాలయ్యాయి. ‘‘మోదీ..! మీరు ఈ జన్మలో మమ్మల్ని ఓడించలేరు. మరు జన్మలో కూడా మీకు సాధ్యం కాదు’’ అంటూ చెప్పిన కేజ్రీవాలే ప్రస్తుత ఎన్నికల్లో బీజేపీ అభ్యర్థి పర్వేశ్​ సాహిబ్​ సింగ్​ వర్మ చేతిలో ఓటమిని చవిచూడాల్సి వచ్చింది.

లిక్కర్ స్కాంలో అరెస్ట్ అయినోళ్లంతా ఓడారు

న్యూఢిల్లీ, వెలుగు: ఢిల్లీ లిక్కర్ స్కాంలో అరెస్ట్ అయిన కేజ్రీవాల్, సిసోడియా, సత్యేంద్ర జైన్ లు ఈ ఎన్నికల్లో ఓటమి చవిచూసారు. ఈ స్కాంతో నేతలు పదవుల్ని కోల్పోయి, జైలు జీవితం గడిపారు. అయితే ఎన్నికల్లో దీన్ని సానుభూతిగా మార్చుకునే ప్రయత్నం చేసినా.. ప్రజలు విశ్వసించలేదు. తన నిర్దోషిత్వాన్ని చాటుకునేందకు సీఎం పదవికి రాజీనామా చేస్తున్నట్లు ఎన్నికల ముందు కేజ్రీవాల్ వెల్లడించారు. అయితే, ఈ సానుభూతి మాటలను న్యూఢిల్లీ ప్రజలు పక్కన పెట్టారు. న్యూఢిల్లీ నుంచి కేజ్రీవాల్, జంగ్ పురా నుంచి సిసోడియా, షత్పుర పుర నుంచి సత్యేంద్ర జైన్ లు పోటీ చేసి ఓడారు. దీన్ని బట్టి చూస్తే ఈ ఎన్నికల్లో లిక్కర్ స్కాం ఎఫెక్ట్ ఎంతలా పని చేసిందో అర్థమవుతోంది.