తెలుగులో ప్రముఖ హీరో సుధీర్ బాబు హీరోగా నటించిన "శివ మనసులో శృతి" సినిమాతో హీరోయిన్ గా పరిచయమైంది స్టార్ హీరోయిన్ రేజీనా కసాండ్ర. ఆ తర్వాత వరుసగా తెలుగు సినిమాల్లో ఆఫర్లు దక్కించుకుంటూ రవితేజ, మంచు మనోజ్, సాయి దుర్గ తేజ్, సందీప్ కిషన్, నారా రోహిత్, అడివి శేష్ తదితర స్టార్ హీరోలతో కలసి నటించి మెప్పించింది.
ప్రస్తుతం రేజీనా నార్త్, సౌత్ అంటూ హిందీ, మలయాళం, తమిళ్, హిందీ ఇలా భాషతో సంబంధం లేకుండా అన్ని పరిశ్రమల్లో హీరోయిన్ గా ఆఫర్లు దక్కించుకుంటోంది. ఇటీవలే రేజీనా బాలీవుడ్ సినీ ఇండస్ట్రీలో తన సినీ ప్రయాణం గురించి పలు ఆసక్తికర విషయాలను ఆడియన్స్ తో పంచుకుంది.
ఇందులో భాగంగా తాను బాలీవుడ్ లో కెరీర్ మొదలు పెట్టిన కొత్తలో ఆఫర్ల విషయంలో ఇబ్బందులు ఎదుర్కున్నానని తెలిపింది. అలాగే బాలీవుడ్ లో రాణించాలంటే కచ్చితంగా హిందీ భాష వచ్చి ఉండాలని లేదంటే ఆఫర్లు దక్కించుకోవడం కష్టమని చెప్పుకొచ్చింది.
ఇక బాలీవుడ్ సినిమాల్లో నటించాలంటే ముంబైలో ఉండాలని లేదంటే ప్రమోషన్స్ సమయంలో ఇబ్బందవుతుందని, కాబట్టి బాలీవుడ్ లో నిలదొక్కుకోవాలనుకునేవారు ముంబై నగరంలో స్టే చేయడం మంచిదని అభిప్రాయం వ్యక్తం చేసింది. చిన్నప్పుడు తన తల్లి బలవంతంతో హిందీ నేర్చుకున్నానని దీంతో అప్పుడు నేర్చుకున్న హిందీ భాష ఇప్పుడు తనకి బాగా ఉపయోగపడిందని తెలిపింది.
ఇక ఇతర సినీ పరిశ్రమలలో మాదిరిగా కాకుండా హిందీ సినీ పరిశ్రమలో పోటీ చాలా ఎక్కువగా ఉంటుందని తెలిపింది. అలాగే తాను కష్టపడి పని చేస్తానుతప్ప పని కోసం తనని తాను అమ్ముకోను అంటూ సంచలన వ్యాఖ్యలు చేసింది. ఇక తనకి ముంబైలో సినిమా ఆఫర్లకి సంబంధించిన టీం ఉందని దాంతో అప్పుడప్పుడూ కేవలం సినిమా ఆడిషన్స్ కి వెళ్లొస్తానని అంతేతప్ప ముంబైలో ఉండనని తెలిపింది.
ఈ విషయం ఇలా ఉండగా రేజీనా ప్రస్తుతం హిందీలో ప్రముఖహీరో నవాజుద్దీన్ సిద్ధిఖీ హీరోగా నటిస్తున్న సెక్షన్ 108 సినిమాలో హీరోయిన్ గా నటిస్తోంది. అలాగే తెలుగు, తమిళ్ భాషలలో తెరకెక్కుతున్న మరో 4 సినిమాల్లో నటిస్తూ బిజిబిజీగా గడుపుతోంది.
