ఖానాపూర్ : ఎమ్మెల్యేల కొనుగోళ్లు, డబ్బులు, మద్యం పంపిణీ లాంటి అక్రమాలతో మునుగోడులో గెలుపు కోసం ప్రయత్నిస్తున్న టీఆర్ఎస్, బీజేపీలను అక్కడి ఓటర్లు బహిష్కరించాలని వైఎస్సార్టీపీ రాష్ట్ర అధ్యక్షురాలు షర్మిల పిలుపునిచ్చారు. గురువారం నిర్మల్ జిల్లా ఖానాపూర్ లో పాదయాత్ర సందర్భంగా ఏర్పాటు చేసిన బహిరంగ సభనుద్దేశించి ఆమె మాట్లాడారు. నలుగురు టీఆర్ఎస్ ఎమ్మెల్యేలను బీజేపీ కొనుగోలు చేయాలని చూసిందని, టీఆర్ఎస్ ఎమ్మెల్యే ఫామ్ హౌజ్లోనే ఈ తతంగం నడిపించినట్లు ఆరోపణలు చేసుకుంటున్నారని, ఇదంతా ఓ డ్రామా లా కనిపిస్తున్నదని విమర్శించారు. ఈ అంశాన్ని రెండు పార్టీలు రాజకీయంగా లబ్ధి పొందేందుకు ప్రయత్నిస్తున్నాయన్నారు. 100 కోట్లతో టీఆర్ఎస్ ఎమ్మెల్యేలను కొనాలని చూశారని ఆ పార్టీ ఆరోపిస్తుండగా, తమ ప్రమేయం లేదని బీజేపీ అనడం హాస్యాస్పదమన్నారు. ఎఫ్ఐఆర్ లో బీజేపీ నేతల పేర్లు పెట్టారని, టీఆర్ఎస్ ఎమ్మెల్యేలపై ఎందుకు కేసు పెట్టలేదని ప్రశ్నించారు.
ప్రభుత్వ డిగ్రీ కాలేజీ ఏర్పాటు చేయడం లేదు
ఖానాపూర్ ఎమ్మెల్యే రేఖా నాయక్ అవినీతి, అక్రమాలపై విచారణ జరపాలని షర్మిల డిమాండ్ చేశారు. అన్ని వ్యవహారాల్లో ఎమ్మెల్యే కమీషన్ డిమాండ్ చేస్తున్నారని ఆరోపించారు. చివరికి గుడిలో కొబ్బరికాయ కొట్టాలన్న కమీషన్ కావాలట కదా.. అని ఆమె అక్కడి వాళ్లను ప్రశ్నించారు. సబ్సిడీ కింద 2 రైస్ మిల్లులు సొంతంగా ఏర్పాటు చేసుకున్నారని ఆరోపించారు. తన సొంత కాలేజీలకు నష్టం జరుగుతుందన్న భావనతో ప్రభుత్వ డిగ్రీ కాలేజీ ఏర్పాటు చేయడం లేదన్నారు.
మీ ఎమ్మెల్యేలు నిజాయితీపరులైతే..సీబీఐ దర్యాప్తు చేయించండి
హైదరాబాద్ : ఎమ్మెల్యేల కొనుగోలు అంశంపై ఎవరూ మాట్లాడొద్దని మంత్రి కేటీఆర్ చేసిన ట్వీట్కు వైఎస్సార్టీపీ రాష్ట్ర అధ్యక్షురాలు షర్మిల స్పందించారు. ‘మీ ఎమ్మెల్యేలు నిర్దోషులైతే, మీకు అంత నమ్మకమే ఉంటే, మీ ఎమ్మెల్యేలు, మీరు నిజాయితీ పరులైతే వెంటనే సీబీఐతో దర్యాప్తు జరిపించండి’ అని ఆమె ట్వీట్ చేశారు. తెలంగాణ ఆత్మగౌరవాన్ని అమ్మాలనుకున్నది ఎవరో, కొనాలనున్నది ఎవరో తేల్చాలని డిమాండ్ చేశారు. ‘మౌనం అర్ధాంగీకారం చిన్నదొర.. మీరు సీబీఐ ఎంక్వైరీ వేయకుంటే తప్పు అంగీకరించినట్టే’ అంటూ ట్వీట్ చేశారు.
