న్యూఢిల్లీ: పీకల్లోతున్న అప్పుల వల్ల దివాలా తీసిన ‘ఫ్యూచర్ రిటైల్’ను కొనడానికి కంపెనీలు క్యూ కడుతున్నాయి. రిలయన్స్ రిటైల్, డబ్ల్యుహెచ్ స్మిత్, గోర్డాన్ బ్రదర్స్ నేతృత్వంలోని అంతర్జాతీయ కన్సార్టియం, జేసీ ఫ్లవర్స్, జిందాల్ పవర్ వంటి 49 కంపెనీలు ఎక్స్ప్రెషన్ ఆఫ్ ఇంట్రెస్ట్స్(ఈఓఐలు)లను దాఖలు చేశాయి. మొదటి రౌండ్లో తగినన్ని ఈఓఐలు రాకపోవడంతో రెండో రౌండ్ నిర్వహించారు. తాజా ఈఓఐలు ఈనెల ఏడున అందాయి.ఈఓఐలను అందించిన వారిలో కొన్ని స్క్రాప్ డీలర్ సంస్థలు, హర్ష వర్ధన్ రెడ్డి వంటి కొంతమంది వ్యక్తిగత పెట్టుబడిదారులు ఉన్నారు.
అదానీ గ్రూపు కూడా బరిలో ఉందని నేషనల్ మీడియా పేర్కొంది. అదానీతో కలిసి ఏప్రిల్ మూన్ రిటైల్ పేరుతో జాయింట్ వెంచర్ఏర్పాటు చేసిన ఫ్లెమింగో గ్రూప్ ఈఓఐ దాఖలు చేసింది. ఈ విషయమై అడిగిన ప్రశ్నలకు రిలయన్స్ రిటైల్, డబ్ల్యూహెచ్ స్మిత్ ఇంకా స్పందించలేదు. జేసీ ఫ్లవర్స్, హర్ష వర్ధన్ రెడ్డి కూడా అందుబాటులోకి రాలేదు. ఫ్యూచర్ రిటైల్కు దాదాపు రూ. 21 వేల కోట్ల అప్పు ఉంది. ఇది బిగ్ బజార్ బ్రాండ్ కింద సూపర్ మార్కెట్లను, స్టోర్లను నడిపేది.
ఫ్యూచర్ రిటైల్ను దక్కించుకోవడానికి రిలయన్స్ ఇండస్ట్రీస్ కంపెనీని రూ. 24,713 కోట్లతో బేరం కుదుర్చుకున్నా, న్యాయపరమైన సమస్యల కారణంగా ఆ డీల్ రద్దయింది. ఫ్యూచర్ కూపన్స్లో ఇది వరకే తమకు వాటా ఉన్నందున రిటైల్విభాగం కూడా తనకే దక్కాలని అమెజాన్న్యాయపోరాటం చేసింది.
