నిజామాబాద్‌ జిల్లాలో స్కూళ్లలో రిపేర్లు స్పీడప్ 

•  వారంలో పూర్తి చేసేలా టార్గెట్
• మంచినీరు, టాయిలెట్స్​ నిర్మాణాలకు ప్రయారిటీ..తర్వాత కరెంట్​ ఇతర ఫెసిలిటీస్​​
•  రెడీగా రూ.39.38 కోట్ల నిధులు
•  నిత్యం పర్యవేక్షిస్తున్న కలెక్టర్ రాజీవ్​గాంధీ

నిజామాబాద్​, వెలుగు: అమ్మ ఆదర్శ పాఠశాల రిపేరింగ్​ పనులు స్పీడ్​ అయ్యాయి.  ఇందు కోసం గవర్నమెంట్​ విడుదల చేసిన రూ.39.38 కోట్ల ఫండ్​ మొత్తం వినియోగించేలా కలెక్టర్​ రాజీవ్ ​గాంధీ హనుమంతు శ్రద్ధ చూపుతున్నారు. పార్లమెంట్​ ఎలక్షన్​ డ్యూటీ కారణంగా పర్యవేక్షించలేకపోయారు.  పనుల వేగాన్ని ఈ పది రోజుల్లో గణనీయంగా పెంచారు. స్కూల్స్​లో బోధన గాడిన పడే సరికి క్లాస్​ రూమ్స్​లో ఎక్కడా పనులు అసంపూర్తిగా ఉండరాదని ఆదేశాలు జారీ చేశారు.

పురోగతిలో ప్రగతి

స్కూల్​ మేనేజ్​మెంట్​ కమిటీల స్థానంలో కాంగ్రెస్​ గవర్నమెంట్​ బడుల పర్యవేక్షణను మహిళా సంఘాలకు అప్పగించింది. పాలిటిక్స్ లేని సూపర్​వైజింగ్​ ఉండాలనే యోచనతో మహిళలకే ఆ బాధ్యత అప్పగించింది.  ​చివరకు స్కూల్స్​ రిపేర్లు, సౌకర్యాల కోసం విడుదల చేసిన రూ.39.38 కోట్ల పనులు వారికే ఇచ్చింది. పనులు పూర్తి చేశాకే బిల్స్​ వచ్చే విధానం అమలులో ఉండడంతో పెట్టుబడి డబ్బులేక పనులు చేయడానికి మహిళా సంఘాలు ముందుకు రాలేదు.  అయితే పనులు చేయకుండా డబ్బులు ఇస్తే దుర్వినియోగం అయ్యే  చాన్స్​ ఉందని భావించారు.

ఈ ఇబ్బందిని అధిగమించేందుకు  ప్రతి మండలంలో అమ్మ ఆదర్శ పాఠశాలల కింద చేపట్టే పనుల తాలూకు మొత్తం విలువలో 10 శాతం సొమ్మును కలెక్టర్ రాజీవ్​గాంధీ ఎంపీడీవోల అకౌంట్​లో పెట్టారు. విలేజ్​ మహిళా సంఘాలను నేరుగా మానిటరింగ్​ చేసే ఎంపీడీవోల వద్ద అడ్వాన్స్​గా కొంత డబ్బు పెట్టడం కలిసొచ్చింది. దీంతో అంతటా పనులు స్పీడయ్యాయి.   పార్లమెంట్​ ఎన్నికల పోలింగ్​ ముగిసిన రెండో రోజు నుంచే కలెక్టర్​ అమ్మ ఆదర్శ పాఠశాలల పనుల పర్యవేక్షణ మొదలుపెట్టారు. 

ఇప్పుడు కౌంటింగ్​ తదితర అన్ని వ్యవహారాలు ముగిసినందున టోటల్​ ఫోకస్​ ఆ పనులపై కేంద్రీకరించారు. స్కూల్స్​ రీఓపెన్​ అయ్యే 12వ తేదీకి అన్నీ కంప్లీట్​ కావాలని టార్గెట్​ విధించుకోగా 80 శాతం ముగిశాయి. మిగితా 20 శాతాన్ని  వారంలో పూర్తి చేయాలనే లక్ష్యంతో ముందుకు వెళుతున్నారు.  ఎంపిక చేసిన స్కూల్స్​లో నీటి వసతికి టాప్​ ప్రయారిటీ ఇస్తున్నారు.  తర్వాత మరుగుదొడ్లు, మూత్రశాలల సంఖ్యను పెంచడాన్ని సెకెండ్​ ప్రయారిటీగా తీసుకున్నారు.   కాంగ్రెస్​ పార్టీ ఎమ్మెల్యేలు సుదర్శన్​రెడ్డి,  డాక్టర్ భూపతిరెడ్డి కూడా నిత్యం వీటిని పర్యవేక్షిస్తున్నారు. 

సౌలత్ లేని స్కూళ్లు 739

జిల్లాలో ప్రైమరీ స్కూల్స్​ 789, అప్పర్​ ప్రైమరీ 137, హైస్కూల్స్​ 269  కలిపి మొత్తం 1,195 బడులలో ఉన్నాయి. వీటిలో 1.12 లక్షల మంది విద్యార్థులు చదువుకుంటున్నారు.  తాగునీరు,  మరుగుదొడ్లు,  మూత్రశాలలు, కరెంట్​ సౌలత్​లేని బడులు 739 ఉన్నట్లు ఇంజినీరింగ్​ శాఖ ద్వారా కన్ఫర్మ్​ చేసుకున్న కాంగ్రెస్​ గవర్నమెంట్​ వాటిని సమకూర్చడానికి మార్చ్​ నెలలో రూ.39.38 కోట్ల ఫండ్స్​ తక్షణం అందించింది. ఎండాకాలం సెలవులలో పనులు కంప్లీట్​ చేయాలనుకొని  ​షురూ చేశారు. అమ్మ ఆదర్శ పాఠశాలలుగా కొత్త విద్యా సంవత్సరానికి  రెడీ చేయాలని యోచించారు. అయితే పార్లమెంట్​ ఎలక్షన్​ రావడం, ఆఫీసర్లంతా వాటి  హడావిడిలో ముగినిపోవడంతో బడి పనులు వెనుకబడ్డాయి.