వెలుగు బిజినెస్ డెస్క్: క్రెడిట్ కార్డులు జారీ చేసేందుకు దేశంలోని కొన్ని పెద్ద నాన్బ్యాంకింగ్ ఫైనాన్షియల్ కంపెనీలకు అనుమతి రానుంది. బలమైన కొన్ని ఎన్బీఎఫ్సీలకు కఠినమైన కండిషన్లతో అనుమతి ఇవ్వాలని రిజర్వ్ బ్యాంక్ ఆఫ్ ఇండియా (ఆర్బీఐ) నిర్ణయించినట్లు సమాచారం. మన దేశ జనాభాలో మూడు, నాలుగు శాతం మందికి మాత్రమే క్రెడిట్ కార్డులున్నాయి. బ్యాంకులు కూడా ప్రైమ్, సూపర్ ప్రైమ్ కస్టమర్లకు మాత్రమే క్రెడిట్ కార్డులు ఇస్తున్నాయి. దీంతో చాలా మంది ఈ అర్హతను పొందలేకపోతున్నారు. అలా మిగిలిన వారికి క్రెడిట్ కార్డులు ఇవ్వాలనేది కొన్ని ఎన్బీఎఫ్సీలు, ఫిన్టెక్ కంపెనీల ఆలోచన. ఈ దిశలో కొన్ని గైడ్లైన్స్ రూపొందించేందుకు ఆర్బీఐ ప్రయత్నాలు మొదలు పెట్టింది. ఎన్బీఎఫ్సీలకు కనీస నెట్వర్త్ రూల్ తేవాలని ఆలోచిస్తోంది. దేశంలో ఎన్బీఎఫ్సీగా రిజిస్ట్రేషన్ పొందాలంటే మరీ ఎక్కువ క్యాపిటల్ అవసరం లేదని, కాబట్టి అన్ని ఎన్బీఎఫ్సీలకు క్రెడిట్ కార్డులు జారీ చేసేందుకు అనుమతి దొరకదని సంబంధిత వర్గాలు వెల్లడించాయి.
ఆర్బీఐ చొరవ...
క్రెడిట్ కార్డుల జారీకి కొన్ని ఎన్బీఎఫ్సీలతో రిజర్వ్ బ్యాంక్ ఆఫ్ ఇండియా చర్చలు జరుపుతున్న విషయాన్ని మొదట బిజినెస్ స్టాండర్డ్ వెలుగులోకి తెచ్చింది. కనీస నెట్వర్త్ రూల్తోపాటు, తగినంత లిక్విడిటీ ఉండాలనే నిబంధననూ ఆర్బీఐ అమలు చేసే అవకాశం ఉన్నట్లు తెలుస్తోంది. అంతేకాకుండా, ఐటీ ఇన్ఫ్రాస్ట్రక్చర్, సైబర్ సెక్యూరిటీ ఏర్పాట్లు కూడా పటిష్టంగా ఉండేలా చూడాలనుకుంటోంది. ఎందుకంటే, ఇప్పుడు క్రెడిట్ కార్డులను డిజిటల్గా కూడా జారీ చేయొచ్చు. మన దేశంలో 15 పెద్ద ఎన్బీఎఫ్సీలు ఉన్నాయి. వీటన్నింటినీ రెగ్యులర్గా ఆర్బీఐనే మానిటర్ చేస్తోంది. వాటిలో కొన్ని క్రెడిట్ కార్డుల జారీకి అర్హత పొందుతాయని భావిస్తున్నారు. ఎన్బీఎఫ్సీ నెట్వర్త్ బేసిస్ మీద క్రెడిట్ లిమిట్ను కూడా రిజర్వ్ బ్యాంకే నిర్ణయించేలా రూల్ ఉండొచ్చని సంబంధిత వర్గాలు తెలిపాయి. ఇండియాలో ఇప్పటిదాకా రెండు ఎన్బీఎఫ్సీలు ( ఎస్బీఐ కార్డ్స్, బాబ్ కార్డ్లు) మాత్రమే క్రెడిట్ కార్డులు ఇస్తున్నాయి. ఈ రెండూ ప్రభుత్వ రంగంలోవే.
ఫిన్టెక్ కంపెనీలకు మరింత ఛాన్స్...
స్లైస్, యూని, లేజీపే వంటి ఫిన్టెక్ కంపెనీలు ఎన్బీఎఫ్సీ లైసెన్సులు తీసుకుని, బ్యాంకుల సాయంతో దేశంలో ప్రి పెయిడ్ కార్డులను అందిస్తున్నాయి. ఇలాంటి కంపెనీలకు ఆర్బీఐ అనుమతి దొరికితే క్రెడిట్ కార్డుల జారీ వాటికి సులభమవుతుంది. చాలా మంది కస్టమర్లను ఫార్మల్ క్రెడిట్లోకి తేవడానికి ఎన్బీఎఫ్సీలకు మెరుగైన అవకాశాలున్నాయని పరిశ్రమ వర్గాలు పేర్కొంటున్నాయి. అలాంటి కస్టమర్లకు బ్యాంకుల నుంచి నేరుగా అప్పులు పొందడానికి తగిన అర్హతలు ఉండటం లేదని వివరించింది. ఈ ఏడాదే ఇది జరిగితే డిజిటైజేషన్ మరింత ఊపందుకుంటుందని ఒక ఫిన్టెక్ కంపెనీ ప్రతినిధి చెప్పారు. ఇటీవల కాలంలో పుట్టుకొచ్చిన అన్ని ఫిన్టెక్ కంపెనీలూ ఆర్బీఐ పెట్టే రూల్స్కింద అర్హత పొందలేవు. సరయిన పద్ధతిలో అప్పులు ఇవ్వకపోతే మూడు, నాలుగేళ్లలోనే బకాయిలు తడిసి మోపడవుతాయి. అందుకే పటిష్టమైన బాలెన్స్షీట్లున్న ఎన్బీఎఫ్సీలకే తప్ప స్టార్టప్ కంపెనీలకు అది సాధ్యం కాదని ఆ ప్రతినిధి పేర్కొన్నారు. ఏదేమైనప్పటికీ, క్రెడిట్ కార్డుల జారీకి ఎన్బీఎఫ్సీలకు అనుమతిస్తే, చాలా ఫిన్టెక్ కంపెనీలూ తమ అవకాశాలను మెరుగుపరుచుకుని, మార్కెట్లో విస్తరిస్తాయని ఆయన అభిప్రాయపడ్డారు. బ్యాంకులతోనే కాకుండా, ఎన్బీఎఫ్సీలతోనూ ఒప్పందాలు కుదుర్చుకుని ఫిన్టెక్ కంపెనీలు క్రెడిట్ కార్డులను ఆఫర్ చేసే వీలు కలుగుతుందని పేర్కొన్నారు.
6.7 కోట్ల క్రెడిట్ కార్డులున్నాయ్..
మన దేశంలో నవంబర్ 2021 నాటికి మొత్తం 6.7 కోట్ల క్రెడిట్ కార్డులు జారీ అయినట్లు డేటా చెబుతోంది. డెబిట్ కార్డులు మాత్రం ఏకంగా 93.4 కోట్లు. క్రెడిట్ బ్యూరోల వద్ద దేశంలోని 55 కోట్ల మంది కస్టమర్ల హిస్టరీ అందుబాటులో ఉందని జనవరి 2022 మంత్లీ బులెటిన్లో ఆర్బీఐ వెల్లడించింది. తమ మార్కెట్ను విస్తరించుకునే టార్గెట్తో చాలా ఫిన్టెక్ కంపెనీలు సబ్–ప్రైమ్ కస్టమర్లతో పాటు, కొత్తగా క్రెడిట్ మార్కెట్లోకి వచ్చే వారికి రకరకాల మోడల్స్లో అప్పులు ఇస్తున్నాయి. బై నౌ పే లేటర్ (బీఎన్పీఎల్), ఈఎంఐలు, ప్రీపెయిడ్ కార్డులు, లేదా తమ బిల్లులను మూడు లేదా ఎక్కువ ఇన్స్టాల్మెంట్లలో చెల్లించేలా ఈ ఫిన్టెక్ కంపెనీలు అప్పులు అందిస్తున్నాయి. దేశంలో మరింత ఎక్కువ మందికి అప్పులు దొరకాలంటే డిజిటల్ క్రెడిట్ కార్డులు, లైన్ ఆఫ్ క్రెడిట్ఇచ్చే కంపెనీలకు లైసెన్స్ అవసరం ఉండకూడదని డిజిటల్ లెండింగ్పై ఆర్బీఐ వర్కింగ్ గ్రూప్ రిపోర్టు వెల్లడించింది.
