- నగదు రిలీజ్కు ముగ్గురితో గ్రీవెన్స్ కమిటీ
- ప్రతిరోజు సాయంత్రం 4 గంటలకు మీటింగ్
- సరైన ఆధారాలు చూపిస్తే వెంటనే రిలీజ్
- రూ.10 లక్షలు దాటితే ఐటీకి అప్పగింత
మంచిర్యాల, వెలుగు: లోక్సభ ఎన్నికల షెడ్యూల్ శనివారం సాయంత్రం విడుదలైన వెంటనే రాష్ట్రవ్యాప్తంగా మోడల్ కోడ్ ఆఫ్ కండక్ట్ అమల్లోకి వచ్చింది. దీంతో రూ.50 వేలకు మించిన నగదు, బంగారం, వెండితోపాటు విలువైన వస్తువుల తరలింపుపై ఆంక్షలు కొనసాగుతాయి. ఎన్నికల్లో ధనప్రవాహాన్ని అరికట్టేందుకు చెక్ పోస్టులు ఏర్పాటు చేయడమే కాకుండా అధికారులు తనిఖీలు నిర్వహిస్తారు. రూ.50 వేలకు మించి నగదు, బంగారం, వెండి తరలించే క్రమంలో వాటికి సంబంధించిన ఆధారాలను చూపించాల్సి ఉంటుంది.
లేదంటే పట్టుబడిన నగదు, వస్తువులను అధికారులు స్వాధీనం చేసుకొని, సీజ్ చేస్తారు. రూ.10 లక్షలకు మించి పట్టుబడితే ఇన్కమ్ ట్యాక్స్అధికారులకు అప్పగిస్తారు. పెండ్లిళ్ల సీజన్ కావడంతో బట్టలు, బంగారం, ఇతర వస్తువుల కొనుగోళ్లకు సంబంధించిన బిల్స్ దగ్గర ఉంచుకోవాలి. హాస్పిటల్స్ లో వైద్య ఖర్చుల కోసం భారీగా డబ్బు తీసుకెళ్తున్న వారు కూడా వాటికి సంబంధించిన ఆధారాలను చూపించాల్సి ఉంటుంది.
నగదు రిలీజ్కు కమిటీ
సామాన్య ప్రజలు వివిధ అవసరాల కోసం తీసుకెళ్తున్న నగదు, బంగారం తనిఖీల్లో పట్టుబడితే ఆధారాలను పరిశీలించి రిలీజ్ చేసేందుకు రాష్ట్రవ్యాప్తంగా అన్ని జిల్లాల్లో గ్రీవెన్స్ కమిటీలను ఏర్పాటు చేశారు. ఇందులో జిల్లా పరిషత్ సీఈఓ, జిల్లా ఎన్నికల ఖర్చు పర్యవేక్షణ అధికారి, జిల్లా ట్రెజరీ ఆఫీసర్ సభ్యులుగా ఉంటారు. ఈ కమిటీ రోజూ సాయంత్రం 4 గంటలకు కలెక్టరేట్లో సమావేశమై పట్టుబడిన నగదు, బంగారంపై సమీక్షిస్తుంది. సరైన ఆధారాలు చూపిస్తే రిలీజ్ చేస్తారు. నగదు రూ.10 లక్షలకు మించితే ఇన్కమ్ ట్యాక్స్ అధికారులకు అప్పగిస్తారు. అనంతరం కోర్టుకు ఆధారాలు సమర్పించి నగదును విడిపించుకోవాల్సి ఉంటుంది.
