జనరల్ ముషారఫ్కి ఇండియా అతిథి మర్యాదలు చేస్తే… ఆయన మనపై కార్గిల్లో సైన్యాన్ని ఉసిగొల్పారు. పాకిస్థాన్ని ఏడేళ్లపాటు మిలటరీ సాయంతో నడిపించారు. తనను అడ్డగోలుగా ప్రమోట్ చేసిన నవాజ్ షరీఫ్ను నానా తిప్పలు పెట్టారు. చివరకు దేశ ద్రోహం కింద మరణ శిక్షకు గురయ్యారు. చాలా ఏళ్లుగా దుబాయ్లో తలదాచుకుంటున్న ముషారఫ్… పాక్ చరిత్రలో ఈ క్యాపిటల్ పనిష్మెంట్కి గురైన రెండో లీడర్గా మిగిలారు.
పాకిస్థాన్ చరిత్రలో మరో స్ట్రాంగ్ లీడర్కి మరణ శిక్ష పడింది. గతంలో జుల్ఫికర్ అలీ భుట్టోకి మిలటరీ పాలనలో ఉరి శిక్ష పడితే, ఈసారి పర్వేజ్ ముషారఫ్కి పార్లమెంటరీ సిస్టమ్లో క్యాపిటల్ పనిష్మెంట్ పడింది. ఈ ఇద్దరూ కూడా పాకిస్థాన్కి ప్రెసిడెంట్లుగా పనిచేసినవాళ్లే. రిటైర్డ్ జనరల్ పర్వేజ్ ముషారఫ్పై దేశ ద్రోహ నేరం కింద ముగ్గురు జడ్జిల ధర్మాసనం మరణ దండన విధించింది. పాకిస్థాన్ను మిలటరీ రూల్తో నడిపించిన మూడో కమాండర్ ముషారఫ్. 1999లో ప్రజాస్వామికంగా ఎన్నికైన నవాజ్ షరీఫ్ని కూలదోసి, మిలటరీ పాలన ఏర్పాటు చేశారు. అధికారం చేజారే పరిస్థితులు రాగానే దేశంలో ఎమర్జెన్సీ విధించి, రాజ్యాంగాన్ని సస్పెండ్ చేశారు. గతంలో మిలటరీ తిరుగుబాటు చేసి ఎక్కువ కాలం పాలించిన జనరల్ ఆయూబ్ ఖాన్గానీ, జియావుల్ హక్గానీ మరణ శిక్షలకు గురి కాలేదు. దేశ ద్రోహ నేరంపై ఉరి శిక్షకు గురైన మొట్టమొదటి సైనిక పాలకుడు ముషార్రఫే. ఈ నిర్ణయం పాకిస్థాన్ వ్యవహారాలు తెలిసినవాళ్లకు అంతగా ఆశ్చర్యం కలిగించకపోవచ్చు. ఎందుకంటే… మన దేశంకంటే ఒక రోజు ముందే ఇండిపెండెన్స్ తెచ్చుకున్న పాకిస్థాన్…. ఇప్పటికీ స్థిరమైన ప్రజాస్వామ్య దేశంగా ఏర్పడలేక పోయింది. ఏ ప్రభుత్వమూ అయిదేళ్ల పూర్తి కాలం నడవలేదు. దాదాపు 73 ఏళ్ల స్వతంత్ర పాకిస్థాన్ హిస్టరీలో సుదీర్ఘకాలం నడిచింది జనరల్ జియావుల్ హక్ మిలటరీ ప్రభుత్వమే. ఆయన 1978 నుంచి 1988 వరకు 10 ఏళ్లపాటు సైనిక పాలన సాగించారు. ఆ తర్వాత రికార్డు జనరల్ పర్వేజ్ ముషారఫ్ (2001–08), ఆయూబ్ ఖాన్ (1958–63) సాధించారు. వీరిలో ఆయూబ్సెకండ్ టర్మ్ని (1965–69) ఎన్నికల్లో గెలిచి దక్కించుకున్నారు.
జియా, ముషారఫ్ల మధ్య చాలా పోలికలు
జియావుల్ హక్, పర్వేజ్ ముషారఫ్ ఇద్దరికీ పోలికలున్నాయి. వీళ్లిద్దరూ ఇండియాలో పుట్టినవాళ్లే. జియావుల్ పంజాబ్లోని జలంధర్లో పుట్టగా, ముషారఫ్ ఢిల్లీలో పుట్టారు. అలాగే, తమకు ప్రమోషన్ ఇచ్చినవాళ్లను మిలటరీ తిరుగుబాటుతో దింపేసి జైలు పాలుచేశారు. లెఫ్టినెంట్ జనరల్గా ఉన్న జియావుల్కి 1976లో అప్పటి ప్రధానమంత్రి జుల్ఫికర్ అలీ భుట్టో చీఫ్ ఆఫ్ ఆర్మీ స్ఠాఫ్గా ప్రమోషన్ ఇచ్చారు. జియా కంటే ముందు వరుసలో ఆర్మీ చీఫ్ కాగలిన లెఫ్టినెంట్ జనరల్స్ ఆరుగురు ఉన్నప్పటికీ, వాళ్లను కాదని ఏడోవాడైన జియావుల్ని ప్రమోట్ చేశారు భుట్టో. అయితే, జనరల్ అయిన మర్నాటి నుంచే తన రంగు బయటపెట్టుకున్నారు జియా. ఆయన ఏనాడూ భుట్టోని ‘మిస్టర్ ప్రైమ్ మినిస్టర్’ అని గౌరవించలేదట! భుట్టోని ‘సార్’ అనే పిలిచేవాడంటారు. కేవలం రెండేళ్లకే భుట్టోని సైనిక తిరుగుబాటుద్వారా దింపేసి, చివరకు ఉరి శిక్ష పడేలా చేశారు. జనరల్ జియాకి రాజకీయాలపై ఆసక్తి లేదని, మత ఆచారాలపైనే ఎక్కువ ఇంట్రెస్ట్ చూపిస్తారని భుట్టో భావించి దెబ్బ తిన్నట్లు చెబుతారు.
ఇదే రకంగా 1998లో అప్పటి పాక్ ప్రధానమంత్రి నవాజ్ షరీఫ్కూడా జనరల్ ముషారఫ్ విషయంలో పప్పులో కాలేశారు. ముషారఫ్ కంటే ఇద్దరు లెఫ్టినెంట్ జనరల్స్ ఉన్నాగానీ, వాళ్లను కాదని ప్రమోషన్ ఇచ్చారు షరీఫ్. మిగతా ఇద్దరిలో లెఫ్టినెంట్ జనరల్ అలీ కులీ ఖాన్కి మహా సమర్థుడైన సైనికాధికారిగా పేరుండగా, మరొకరు ఖాలిద్ నవాజ్ ఖాన్కి చాలా స్ట్రిక్ట్ మిలటరీ ఆఫీసర్గా పేరుంది. వీళ్లిద్దరిలో ఎవరిని ప్రమోట్ చేసినా తనపై తిరుగుబాటు చేసే ప్రమాదముందని షరీఫ్ భావించారు. కేవలం రెండున్నరేళ్లకే సైనిక తిరుగుబాటుతో షరీఫ్ని దింపేశారు ముషారఫ్.
అసలు వీళ్ల మధ్య తగాదా రావడానికి కారణం… కార్గిల్ యుద్ధం. ప్రధానమంత్రిని అయిన తనకు చెప్పా పెట్టకుండా జనరల్ ముషారఫ్ సొంత నిర్ణయాలు తీసుకున్నాడని నవాజ్ షరీఫ్ బుకాయించినట్లు చెబుతారు. అయితే, ఎప్పటికప్పుడు సరిహద్దుల్లో జరుగుతున్న విషయాలను షరీఫ్ దృష్టికి తెచ్చానని జనరల్ ముషారఫ్ గట్టిగా వాదించారు. అందుకు సాక్ష్యంగా తనకు ఆయనకు మధ్య జరిగిన ఏడు సమావేశాల వివరాల్ని నోట్బుక్లో రాసుకున్నానని జనరల్ ముషారఫ్ బయటపెట్టారు. అయితే, కార్గిల్ యుద్ధంతో పాటుగా సైన్యంలో ప్రమోషన్లకు సంబంధించికూడా షరీఫ్, ముషారఫ్ల మధ్య విభేదాలు తలెత్తాయని పాకిస్థానీ పాలిటిక్స్పై ఎనలిస్టులు చెబుతున్నారు.
పాకిస్థాన్పై చెరగని ముద్రలు వేసిన ఇద్దరు జనరల్స్కిగల మరో పోలిక చెప్పాలంటే… వీళ్లిద్దరికీ సహజ మరణాలు లేవనే చెప్పాలి. జనరల్ జియావుల్ హక్ 1988లో విమాన ప్రమాదంలో దుర్మరణం పాలయ్యారు. తాజాగా, ముషారఫ్కి పాక్ సుప్రీం కోర్టు ముగ్గురు హైకోర్టు జడ్జీలతో నియమించిన బెంచ్ మరణ శిక్ష వేసింది. జనరల్ ముషారఫ్ 2001లో అధికారానికొచ్చాక ఎలక్షన్ల జోలికి వెళ్లలేదు. ఎప్పటికప్పుడు సాకులతో వాయిదా వేస్తూ వచ్చారు. దేశంలో పొలిటికల్ పార్టీల వత్తిడి పెరగడంతో 2007లో ఎమర్జెన్సీ విధించి ప్రజాస్వామ్య హక్కుల్ని కాలరాశాడన్నది ప్రధాన ఆరోపణ.
ఆయన పరోక్షంలోనే కోర్టు మరణ శిక్ష విధించింది. అలాగే, ముషారఫ్ చేతిలో నానా ఇబ్బందులు పడి, ప్రస్తుతం అవినీతి కేసులో పదేళ్ల జైలు శిక్షకు గురైన నవాజ్ షరీఫ్ కూడా లండన్లో గడుపుతున్నారు. దుబాయ్ నుంచి ముషారఫ్ని, లండన్ నుంచి షరీఫ్ని రప్పించడానికి ఆయా దేశాలు అంగీకరించక పోవచ్చని ఎనలిస్టులు చెబుతున్నారు.
అరెస్టులు, మరణ శిక్షలు
జుల్ఫీకర్ అలీ భుట్టో 1971 నుంచి 73 వరకు ప్రెసిడెంట్గా పనిచేసి, ఆ తర్వాత పార్లమెంటరీ సిస్టమ్ ద్వారా ఎన్నికలు జరిపించి ప్రధాని అయ్యారు. 1977లో ఆయన నియమించిన ఆర్మీ చీఫ్ జనరల్ జియావుల్ హక్ తిరుగుబాటుతో పదవి కోల్పోయారు. ప్రతిపక్షానికి చెందిన ఒక యువ నాయకుడిని హత్య చేయించడానికి కుట్ర పన్నారన్న ఆరోపణపై జనరల్ జియా ఆయనను అరెస్టు చేశారు. ఆ తర్వాత భుట్టోకి కోర్టు మరణ శిక్ష విధించగా, అయిదు నెలల తర్వాత రావల్పిండిలో ఉరి తీసేశారు.
నవాజ్ షరీఫ్ ప్రభుత్వాన్ని కూలదోయగానే ఆయనను హౌస్ అరెస్టు చేయించారు ముషారఫ్. ఆయనపై హైజాకింగ్, కిడ్నాపింగ్, హత్యాయత్నం, ముషారఫ్ విమానం కరాచీలో దిగకుండా కుట్ర చేశారన్న ఆరోపణలు మోపారు. యాంటీ కరప్షన్ కోర్టు ఆయనకు పదేళ్ల జైలు శిక్ష విధించింది.
