- కోర్టులో హాజరుపరిచి రిమాండ్కు తరలించిన పోలీసులు
- గిరబోయిన అంజయ్య పోలీసు కస్టడీ మరో 2 రోజులు పొడిగింపు
బచ్చన్నపేట, వెలుగు: జనగామ జిల్లా బచ్చన్నపేట మండలం పోచన్నపేటకు చెందిన రిటైర్డ్ఎంపీడీవో రామకిష్టయ్య, సుభద్ర హత్య కేసుల్లో మరో ముగ్గురిని అరెస్ట్ చేసి రిమాండ్పంపినట్లు పోలీసులు తెలిపారు. పోచన్నపేటకు చెందిన రిటైర్డ్ ఎంపీడీవో నల్ల రామకిష్టయ్యను జూన్ 15న రాత్రి కిడ్నాప్ చేసి, హత్య చేసి శవాన్ని జనగామ సమీపంలోని చంపక్హిల్స్లోయల్లో పడేశారు. అలాగే మండలంలోని సదాశివపేటకు చెందిన సుభద్రను గతేడాది అక్టోబర్లో హత్య చేశారు.
వీరి హత్యతో సంబంధం ఉన్న జనగామ జడ్పీ వైస్చైర్మన్ గిరబోయిన భాగ్యలక్ష్మి భర్త గిరబోయిన అంజయ్యను, మరో ఇద్దరిని ఇదివరకే అదుపులోకి తీసుకొని రిమాండ్ పంపించారు. తర్వాత అంజయ్యను రెండు రోజుల పాటు కస్టడీలోకి తీసుకున్న పోలీసులు పూర్తి సమాచారం సేకరించారు. అతడిచ్చిన సమాచారంతో గోపాల్నగర్ కు చెందిన పస్తం జలంధర్, పస్తం పెద్ద ఉప్పలయ్య, పోచన్నపేటకు చెందిన గట్టు మల్లేశంను అరెస్ట్ చేసి కోర్డులో హాజరు పరిచారు. ఈ రెండు కేసులకు సంబంధించి మరో నలుగురిని అరెస్ట్ చేసే అవకాశం ఉన్నట్లు తెలుస్తోంది. కాగా అంజయ్య కస్టడీని మరో రెండు రోజులు పొడిగించినట్లు సమాచారం.
