- 5 ఏండ్లు పెంచుతూ ఉత్తర్వులు జారీ చేసిన ప్రభుత్వం
హైదరాబాద్,వెలుగు: రాష్ట్రంలోని యూనివర్సిటీల్లో పనిచేస్తున్న ప్రొఫెసర్ల పదవీ విరమణ వయస్సును 60 ఏండ్ల నుంచి 65కు పెంచుతూ ప్రభుత్వం నిర్ణయం తీసుకున్నది. ఈ మేరకు విద్యాశాఖ సెక్రెటరీ యోగితా రాణా గురువారం జీవో నెంబర్ 3 రిలీజ్ చేశారు. ఇటీవల సీఎం రేవంత్ రెడ్డి కూడా ప్రొఫెసర్ల రిటైర్మెంట్ ఏజ్ను పెంచుతామని ప్రకటించగా, దానికి అనుగుణంగా ఉత్తర్వులు జారీ అయ్యాయి. కాగా, సర్కారు తీసుకున్న నిర్ణయంతో శుక్రవారం రిటైర్ కావాల్సిన ఐదుగురు ప్రొఫెసర్ల పదవీ విరమణ సభలు వాయిదా పడ్డాయి. అనుభవం ఉన్న సీనియ ర్ ఫ్యాకల్టీ సేవలను ఉపయోగించుకునేందుకు ఈ నిర్ణయం తీసుకున్నట్టు సర్కారు ప్రకటించింది.
రిక్రూట్మెంట్పైనా కసరత్తు..
కొన్నేండ్లుగా వర్సిటీల్లో రిక్రూట్మెంట్ఆగిపోయింది. ప్రస్తుతం ఉన్నత విద్యా శాఖ పరిధిలోని 11 వర్సిటీల్లో 2,817 సాంక్షన్ ప్రొఫెసర్ పోస్టులు ఉండగా, వాటిలో కేవలం 757 మంది మాత్రమే పనిచేస్తున్నారు. 2,060 ఫ్యాకల్టీ పోస్టులు ఖాళీగా ఉన్నాయి. ఆయా పోస్టుల్లో కాంట్రాక్టు, పార్ట్ టైమ్ పద్ధతిలో పనిచేస్తున్నారు. ఈ క్రమంలో 7 వర్సిటీల్లో ఒక్క ప్రొఫెసర్ కూడా లేడు. ప్రొఫెసర్ల సంఖ్య తగ్గుతుండడంతో వర్సిటీల ర్యాంకులు పడిపోతున్నాయి. రిక్రూట్మెంట్ ప్ర క్రియపైనా సర్కారు కసరత్తు చేస్తున్నది. ఇదిలా ఉండగా.. దేశవ్యాప్తంగా కేవలం తెలంగాణ, తమిళనాడు, పంజాబ్ రాష్ట్రాల్లో మాత్రమే ప్రొఫెసర్ల రిటైర్మెంట్ ఏజ్ 60 ఏండ్లుగా ఉన్నది. ఇప్పటికే 10 రాష్ట్రాల్లో పదవీ విరమణ వయస్సు 65 ఉండగా, ఆ జాబితాలో ఇప్పుడు తెలంగాణ కూడా చేరింది. మరో 9 రాష్ట్రాల్లో 62 ఏండ్లుగా ఉంది. సెంట్రల్ వర్సిటీల్లో పదవీ విరమణ వయస్సు 65 ఏండ్లు. ఈ క్రమంలో హయ్యర్ ఎడ్యుకేషన్ కౌన్సిల్ చేసిన ప్రతిపాదనలను రాష్ట్ర సర్కారు ఆమోదించింది.
