చండూరు, వెలుగు : కాంగ్రెస్ పార్టీ ఆఫీసు, కార్యకర్తల జోలికి వస్తే బంగారిగడ్డలో చెట్టుకు కట్టేసి కొడతామని టీపీసీసీ చీఫ్రేవంత్రెడ్డి హెచ్చరించారు. మంగళవారం ఎన్నికల ప్రచారంలో భాగంగా నల్గొండ జిల్లా చండూరు మండలం బంగారిగడ్డలో పర్యటించి మాట్లాడారు. ఓడిపోతామనే భయంతోనే కాంగ్రెస్ ఆఫీసును తగలబెట్టారని, ఇలాంటి చర్యలను సహించేది లేదన్నారు.
ఈ ఎన్నికలు ప్రజలు కోరుకుంటేనో, ఎమ్మెల్యే చనిపోతేనో రాలేదని కాంట్రాక్టుల కోసం అమ్ముడుపోయిన కోమటిరెడ్డి రాజగోపాల్ రెడ్డి కోసమే వచ్చాయన్నారు. 22 వేల కోట్లకు అమ్ముడుపోయిన రాజగోపాల్ రెడ్డి ఏ ముఖం పెట్టుకొని ఓట్ల అడగడానికి వస్తున్నారని ప్రశ్నించారు. ఆర్టీసీ కార్మికులు 60 మంది చనిపోయినా ముఖ్యమంత్రి కేసీఆర్ పట్టించుకోలేదన్నారు. అభివృద్ధి కోసం ఆడబిడ్డగా ముందుకు వచ్చిన పాల్వాయి స్రవంతిని గెలిపించాలని కోరారు.
