- మాస్టర్ ప్లాన్ బాధితులు కొట్లాడుతుంటే బీఆర్ఎస్ లీడర్లు ఎటుపొయిర్రు
- వాళ్లకు ప్రజల సమస్యలు పట్టవు
- కాంగ్రెస్ జమానాలోనే కామారెడ్డికి తాగునీళ్లు
- ఎన్నికల ప్రచారంలో పీసీసీ ప్రెసిడెంట్ రేవంత్రెడ్డి
కామారెడ్డి, వెలుగు : కామారెడ్డి రైతులు మాస్టర్ప్లాన్కు వ్యతిరేకంగా పోరాడినప్పుడు, కలెక్టరేట్ ముందు ధర్నా చేసినప్పుడు రైతులపై పోలీసులు లాఠీ చార్జ్ చేస్తే బీఆర్ఎస్ పార్టీ వాళ్లు ఒక్కరైనా వచ్చరా అని పీసీసీ ప్రెసిడెంట్ రేవంత్రెడ్డి ప్రశ్నించారు. రైతులు చనిపోయినా, ఉద్యోగాలు రాక పిల్లలు ఆత్మహత్యలు చేసుకున్నా మంత్రులు, ఎమ్మెల్యేలు ఒక్కరైనా పలకరించలేదన్నారు. ప్రజల కష్టాలతో బీఆర్ఎస్ లీడర్లకు సంబంధం లేదని, వాళ్లకు కావాల్సిందల్లా ఓట్లేనన్నారు. కామారెడ్డి నియోజకవర్గం నుంచి కాంగ్రెస్ అభ్యర్థిగా టీపీసీసీ ప్రెసిడెంట్ రేవంత్రెడ్డి పోటీ చేస్తున్నారు. ఈ నెల 10న నామినేషన్ వేశారు. ఆ తర్వాత మంగళవారం నియోజకవర్గంలో ఆయన ఎన్నికల ప్రచారం షూరు చేశారు.
ఇందులో భాగంగా రామారెడ్డి మండలం రెడ్డిపేట, పాల్వంచ మండలం ఇసాయిపేట, ఫరీద్పేట, మాచారెడ్డి మండలం చుక్కాపూర్, మాచారెడ్డి చౌరస్తాల్లో ప్రచారం చేశారు. స్థానికంగా నిర్వహించిన కార్నర్ మీటింగ్స్లో మాట్లాడారు. కేసీఆర్ ప్రభుత్వంపై విమర్శలు చేస్తూనే ఇక్కడ పోటీ చేయడానికి గల కారణాలను ప్రజలకు వివరించారు. రేవంత్రెడ్డి మాట్లాడుతూ.. కామారెడ్డి ప్రజల మీద ప్రేమతో కేసీఆర్ ఇక్కడ పోటీ చేయడం లేదని, పేదల భూములు లాక్కునేందుకే ఇక్కడికి వస్తున్నారన్నారు. ఇక్కడి రైతుల భూములను కేసీఆర్ నుంచి కాపాడేందుకే తాను పోటీ చేస్తున్నట్లు రేవంత్ చెప్పారు. అంతా ఏకమై కేసీఆర్పై కొట్లాడుదామన్నారు. కాంగ్రెస్ప్రభుత్వ హయాంలో మంత్రిగా ఉన్న షబ్బీర్అలీ కామారెడ్డికి తాగునీళ్లు తీసుకొచ్చారన్నారు.
కాంగ్రెస్అధికారంలోకి రాగానే ఆరు గ్యారంటీలను అమలు చేస్తామన్నారు. షబ్బీర్అలీ మాట్లాడుతూ.. స్థానికంగా ఉన్న మద్దికుంట గుడిని అభివృద్ధి చేస్తామన్నారు. మహిళా కాంగ్రెస్ మాజీ ప్రెసిడెంట్ శారద, మాజీ ఎమ్మెల్సీ అరికెల నర్సారెడ్డి, మాజీ ఎమ్మెల్యే యూసుఫ్అలీ, డీసీసీ ప్రెసిడెంట్ కైలాస్ శ్రీనివాస్రావు, జడ్పీ ఫ్లోర్లీడర్ మోహన్రెడ్డి, లీడర్లు గీరెడ్డి మహేందర్రెడ్డి, గణేశ్, చంద్రకాంత్రెడ్డి, భీమ్రెడ్డి పాల్గొన్నారు.
నేడు కార్యకర్తలతో మీటింగ్
కామారెడ్డి నియోజకవర్గ కాంగ్రెస్ పార్టీ ముఖ్య లీడర్లు, కార్యకర్తలతో బుధవారం రేవంత్రెడ్డి సమావేశం కానున్నారు. మంగళవారం రాత్రి జనగామలో బస చేశారు. ముఖ్య నేతలకు ప్రచారంపై పలు సూచనలు చేశారు. బుధవారం జరిగే మీటింగ్లో నాయకులకు ప్రచార బాధ్యతలు అప్పగించే అవకాశముంది.
