- ప్రాజెక్టు పేరుతో లక్ష కోట్లు దోచుకుండు : రేవంత్
- ఉచిత కరెంట్ కాంగ్రెస్ పేటెంట్ హక్కు
- వ్యవసాయానికి ఐదు గంటల కరెంటే ఇస్తామని ఎక్కడ చెప్పినం?
- మీరు 24 గంటల కరెంటు ఇస్తున్నట్లు రుజువు చేస్తే నామినేషన్లు వేయం
- ఇస్తలేరని మేము నిరూపిస్తే నడిగడ్డలో ముక్కు నేలకు రాస్తరా?
- అధికారంలోకి రాగానే ధరణి స్థానంలో కొత్త యాప్ తెస్తం
- మూడోసారి అధికారం అడిగితే ప్రజలు మూతిపళ్లు రాలగొడతరు
- ఉమ్మడి మహబూబ్ నగర్ జిల్లా సభల్లో కేసీఆర్పై పీసీసీ చీఫ్ ఫైర్
మహబూబ్నగర్/గద్వాల/మక్తల్, వెలుగు : కాళేశ్వరం ప్రాజెక్టుతోనే కేసీఆర్ పాపం పండిందని పీసీసీ చీఫ్ రేవంత్రెడ్డి అన్నారు. ‘‘కాళేశ్వరం ద్వారా కోటి ఎకరాలకు నీళ్లు ఇస్తామని కట్టిన మేడిగడ్డ కుంగిపోయింది. అన్నారం పగిలిపోయింది. సుందిళ్ల రేపో, ఎల్లుండో కుప్పకూలేటట్లుంది. నీ అవినీతికి దేవుడిని కూడా వదల్లేదు. శివుడి మీద ఒట్టేసి ప్రాజెక్టు కట్టినవ్. దేవుడి పేరుతో లక్ష కోట్లు తిన్నవ్. గుడిని, గుడిలో లింగాన్ని మింగేటోన్ని ఇప్పుడే చూస్తున్న’’ అని కేసీఆర్పై మండిపడ్డారు. ఉమ్మడి మహబూబ్నగర్ జిల్లాలోని శాంతినగర్, గద్వాల, మక్తల్లో మంగళవారం నిర్వహించిన సభల్లో ఆయన మాట్లాడారు.
అంతకుముందు అలంపూర్లోని జోగులాంబ అమ్మవారికి ప్రత్యేక పూజలు చేశారు. ‘‘ఐదు గంటలు, మూడు గంటల కరెంటు అని నేను ఎక్కడన్నా? నీకు చీము, నెత్తురు ఉంటే కాంగ్రెస్ పార్టీ ఈ మాట ఎక్కడన్నదో నిరూపించు. అగ్రికల్చర్కు ఫ్రీ కరెంటు, రైతుల మీద పెట్టిన అక్రమ కేసులు తొలగించింది కాంగ్రెస్పార్టీనే. రూ.1,200 కోట్ల విద్యుత్ బకాయిలు మాఫీ చేసింది కాంగ్రెస్సే. ఉచిత కరెంట్ కాంగ్రెస్ పెటెంట్హక్కు. నడిగడ్డ, మక్తల్లో ఏ విద్యుత్సబ్ స్టేషన్కు అయినా పోదాం. లాగ్ బుక్కులను పరిశీలిద్దాం. మీరు 24 గంటల కరెంటు ఇస్తున్నట్లు రుజువైతే నేను నా క్యాండిడేట్లు నామినేషన్లు వేయం. ఇక్కడి నుంచి ఇండ్లకు వెళ్లిపోతం. 24 విద్యుత్ ఇవ్వడం లేదని నిరూపిస్తే నడిగడ్డలో కేసీఆర్ ముక్కు నేలకు రాసి, రైతులకు క్షమాపణ చెప్పాలి’’ అని రేవంత్ సవాల్ విసిరారు.
బెల్టు షాపుల తెలంగాణ చేసిండు
‘‘రెండుసార్లు గెలిపిస్తే లక్ష కోట్లు సంపాదించుకున్నావ్. మూడోసారి నీకు అధికారం ఇస్తే కృష్ణానదిలో కలిపేస్తవ్. పది వేల ఎకరాలు దోచుకున్నావ్. మీ ఇంట్లో నాలుగు పదవులు తీసుకున్నావ్. మూడోసారి ఇస్తే నీ మనువడిని కూడా పదవి ఇస్తవు. పదేండ్ల నీ పాలనలో పేదలకు డబుల్బెడ్ రూమ్ ఇండ్లు ఇచ్చినవా? దళితులకు మూడెకరాల భూమి పంచినవా? లక్ష ఎకరాలకు సాగునీరు అందించావా? కేజీ టు పీజీ ఉచిత విద్య ఏమైంది? వంద పడకల ఆస్పత్రి ఏడికి పాయే?’’ అని రేవంత్ కేసీఆర్ను ప్రశ్నించారు. మూడోసారి అధికారం అడిగితే ప్రజలు మూతిపళ్లు రాలగొడతారన్నారు.
కాంగ్రెస్ హయాంలోనే నాగార్జునసాగర్, శ్రీశైలం, జూరాల, భీమా, నెట్టెంపాడు, కల్వకుర్తి, కోయిల్సాగర్, శ్రీరామ్సాగర్, దమ్ముగూడెం, రాజీవ్సాగర్, ఇందిరా సాగర్, హైటెక్ సిటీ, ఔటర్రింగ్ రోడ్డు, ఇంటర్నేషనల్ఎయిర్పోర్ట్, మెట్రో సర్వీసులు వచ్చాయని గుర్తు చేశారు. కేసీఆర్కు రెండు సార్లు అధికారం ఇస్తే1,800 బార్షాపులు,62 వేల బెల్టులు షాపులు, 3 వేల వైన్ షాపులు వచ్చాయన్నారు. బంగారు తెలంగాణ కాదు బెల్టు షాపుల తెలంగాణగా మార్చి, తాగుబోతులను తయారు చేశారని మండిపడ్డారు.
ధరణి ఏటీఎంలా మారింది
‘‘ధరణిని రద్దు చేస్తే రైతుబంధు పోతదంట. రైతుబంధు 2018లో మొదలు పెడితే ధరణి పోర్టల్ 2020లో ప్రారంభించారు. కాంగ్రెస్ రైతులకు రుణమాఫీ చేసింది. వ్యవసాయ పనిముట్లు, సబ్సిడీ ఎరువులు, విత్తనాలు ఇచ్చింది. ధరణి పేరుతో దోపిడీ చేస్తున్నవ్. ఆ పోర్టల్ నీకు ఏటీఎంలా మారింది. ఈ పోర్టల్ను రద్దు చేస్తే దళారులు వస్తరంటున్నవ్? నీ కుటుంబమే ఒక దళారీ. రాష్ర్టాన్ని దోచుకుంటున్నారు. కాంగ్రెస్ అధికారంలోకి రాగానే ‘ధరణి’ స్థానంలో కొత్త యాప్ తెస్తాం’ అని రేవంత్ అన్నారు. మక్తల్లో ఇసుక రవాణా, భూ ఆక్రమణల్లో స్థానిక ఎమ్మెల్యే ప్రమేయం ఉందని ఆరోపించారు. సమస్యల మీద ప్రజలు ఎమ్మెల్యే ఇంటికెళ్తే.. గన్మెన్లతో మెడలు పట్టి గెంటిస్తున్నాడని ఫైర్అయ్యారు.
చల్లా వెంకట్రామిరెడ్డి తాత నీలం సంజీవరెడ్డిని రాష్ర్టపతిని చేసింది కాంగ్రెస్ పార్టీయే అని గుర్తు చేశారు. వెంకట్రామిరెడ్డి ప్రతిష్ట ఏమైందని, ఎమ్మెల్సీ పదవి కోసం తలవంచి దొర గడీలో ఆత్మగౌరవాన్ని ఎందుకు తాకట్టు పెట్టావో సమాధానం చెప్పాలన్నారు. నా ఇంటి గేట్లు ఎప్పుడు తెరిచే ఉంటాయని, రాహుల్, సోనియా ఎవరినీ కలువాలఋన్నా సాధ్యపడుతుందన్నారు. ఇది పాలమూరు ప్రజలు జీవన్మరణ సమస్య అని, కేసీఆర్, హరీశ్రావు, కేటీఆర్లు గొడ్డలి, కొడవళ్లు తీసుకొచ్చి ఓడించాలనే కుట్రలు చేస్తున్నారన్నారు.
పాలమూరు బిడ్డలంతా ఏకం కావాలని, ఉమ్మడి జిల్లాలోని14 అసెంబ్లీ స్థానాలను గెలిపించాలని కోరారు. మీటింగుల్లో కొల్లాపూర్, వనపర్తి, అలంపూర్, గద్వాల, మక్తల్ కాంగ్రెస్అభ్యర్థులు జూపల్లి కృష్ణారావు, మేఘారెడ్డి, సంపత్కుమార్, సరిత, వాటికి శ్రీహరి, పీసీసీ ఉపాధ్యక్షుడు మల్లు రవి, మాజీ ఎమ్మెల్యే సీతా దయాకర్రెడ్డి, బండ్ల చంద్రశేఖర్రెడ్డి, ప్రశాంత్రెడ్డి, సిద్ధార్థ్రెడ్డి, నాగరాజుగౌడ్ తదితరులు పాల్గొన్నారు.
బోయలు, ముదిరాజ్లకు మోసం
బోయలకు ఎమ్మెల్సీ ఇస్తామని, ఎస్టీ జాబితాలో చేర్చుతామని చెప్పి కేసీఆర్మోసం చేసిండని రేవంత్ విమర్శించారు. సరితకు టికెట్ ఇవ్వడం వల్ల బోయలకు టికెట్ ఇవ్వలేకపోయామని, ఆమెను గెలిపిస్తే బోయలను ఎమ్మెల్సీ చేస్తామన్నారు. బోయలను ఎస్టీ జాబితాలో చేర్చే బాధ్యతను తాను తీసుకుంటానన్నారు. రాష్ట్రంలో 11% ఉన్న ముదిరాజ్లకు బీఆర్ఎస్ ఒక్క టికెట్ కూడా ఇవ్వలేదన్నారు.
కాంగ్రెస్ ముదిరాజ్లకు అవకాశాలు కల్పిస్తోందన్నారు. తుమ్మిళ్లను పూర్తి చేస్తామని 2014లో కేసీఆర్ మాట ఇచ్చి చేయలేదన్నారు, కాంగ్రెస్ అధికారంలోకి రాగానే ఆర్డీఎస్ పంచాయితీ తెంచుతామన్నారు. కృష్ణా పుష్కరాల సందర్భంగా అలంపూర్ ఆలయ అభివృద్ధికి వంద కోట్లు కేటాయిస్తామని హామీ ఇచ్చి కేసీఆర్ మోసం చేశారని ఫైర్ అయ్యారు.
