హైదరాబాద్, వెలుగు: పీసీసీ చీఫ్గా రేవంత్రెడ్డి బుధవారం మధ్యాహ్నం 1.30 గంటలకు బాధ్యతలు తీసుకోనున్నారు. అంతకన్నా ముందు ఉదయం 10 గంటలకు జూబ్లీహిల్స్లోని పెద్దమ్మ టెంపుల్కు వెళ్లి పూజలు చేయనున్నారు. అక్కడి నుంచి నాంపల్లిలోని యూసుఫ్బాబా దర్గాకు వెళ్లి ప్రార్థనలు చేస్తారు. తర్వాత గాంధీ భవన్కు వెళ్లి బాధ్యతలు తీసుకుంటారు. కార్యక్రమానికి కాంగ్రెస్ ముఖ్య నేతలతో పాటు వేరే రాష్ట్రాల నేతలూ హాజరవుతారని గాంధీ భవన్ వర్గాలు వెల్లడించాయి. తర్వాత అక్కడే బహరింగ సభ నిర్వహిస్తారు. పీసీసీకి కొత్త చీఫ్తో పాటే గాంధీ భవన్ కూడా కొత్తగా ముస్తాబైంది. బిల్డింగ్కు సున్నాలు, రంగులు వేసి తీర్చిదిద్దారు. గాంధీభవన్లో వాస్తు మార్పులు చేశారు. పీసీసీ మునుపటి చీఫ్ చాంబర్కు పక్కనే ఉన్న మీటింగ్ హాల్, ప్రస్తుత సీఎల్పీ నేత భట్టి విక్రమార్క చాంబర్ను కలిపి పీసీసీ ప్రెసిడెంట్చాంబర్ చేశారు. పీసీసీ మాజీ చీఫ్ ఉత్తమ్ వాస్తుకు తగ్గట్టు మూసేసిన గేటును ఇప్పుడు తెరిచి రెండు గేట్లను అందుబాటులోకి తేనున్నారు.
పార్టీ కోసం జోడెద్దుల్లా పనిచేస్తం: రేవంత్
పీసీసీ పదవి దక్కిన వెంటనే రేవంత్ పార్టీ సీనియర్ నేతలతో వరుసగా భేటీ అవుతున్నారు. అసంతృప్తులనూ కలిసి కొత్త ఉత్సాహాన్ని నింపుతున్నారు. మంగళవారం పీసీసీ మాజీ చీఫ్ ఉత్తమ్కుమార్ రెడ్డి దంపతులు, సీఎల్పీ నేత భట్టి విక్రమార్క, పీసీసీకి కొత్తగా ఎన్నికైన వర్కింగ్ ప్రెసిడెంట్ జగ్గారెడ్డి, మర్రిశశిధర్ రెడ్డిలను వారి వారి ఇండ్లలో రేవంత్ మర్యాదపూర్వకంగా కలిశారు. భట్టి ఇంట్లో రేవంత్ను భద్రాచలం ఎమ్మెల్యే పోడెం వీరయ్య సత్కరించారు. పార్టీకి సీఎల్పీ, పీసీసీ రెండు కళ్లలాంటివని, తామిద్దరం పార్టీ కోసం జోడెద్దుల్లా పనిచేస్తామని రేవంత్అన్నారు. తెలంగాణ ఆకాంక్షల కోసం కలిసి పనిచేస్తామని చెప్పారు. రేవంత్ పదవీ స్వీకార కార్యక్రమానికి పార్టీ కార్యకర్తలు పెద్ద సంఖ్యలో తరలి రావాలని భట్టి పిలుపునిచ్చారు. కార్యకర్తలను కలుపుకునిపోయి పార్టీని బలోపేతం చేయాల్సిందిగా రేవంత్కు సూచించారు. కాగా, అంతకుముందు బెంగళూరు నుంచి ఉదయం హైదరాబాద్కు వచ్చిన రేవంత్.. నేరుగా రామోజీ ఫిలిం సిటీకి వెళ్లి ఈనాడు సంస్థల అధినేత రామోజీరావుతో సమావేశమయ్యారు.
