- ఉమ్మడి పాలమూరుపై పట్టు సాధించేందుకు కాంగ్రెస్ ప్రయత్నాలు
- మాజీ ఎమ్మెల్యేలు, నియోజకవర్గాల లీడర్లతో మంతనాలు
- అధికారంలోకి వస్తే నామినేటెడ్ పదవులు ఇస్తామని హామీలు
మహబూబ్నగర్, వెలుగు : ఉమ్మడి పాలమూరు జిల్లాపై టీపీసీసీ చీఫ్ రేవంత్రెడ్డి ఫుల్ ఫోకస్ పెట్టారు. సొంత నియోజకవర్గమైన కొడంగల్ సెగ్మెంట్ నుంచి పోటీ చేస్తున్నట్లు కన్ఫాం చేయడంతో పాటు ఉమ్మడి జిల్లాలోని 14 స్థానాల్లో మెజార్టీ సీట్లను సాధించాలని స్కెచ్వేశారు. తన డైరెక్షన్లోనే జిల్లాకు చెందిన టీపీసీసీ ఉపాధ్యక్షుడు మల్లు రవిని యాక్షన్లోకి దింపారు. ఆయన ద్వారా మాజీ ఎమ్మెల్యేలు, అసెంబ్లీ సెగ్మెంట్లలో పలుకుబడి, బలం ఉన్న లీడర్లను కాంగ్రెస్లోకి తీసుకొచ్చేలా ప్లాన్ చేస్తున్నారు.
ఇప్పటికే జోగుళాంబ గద్వాల జడ్పీ చైర్పర్సన్ సరితను పార్టీలోకి తీసుకురావడంలో కీ రోల్ పోషించారు. అలాగే నాగర్కర్నూల్ జిల్లాకు చెందిన ఎమ్మెల్సీ కూచకుళ్ల దామోదర్రెడ్డి కుమారుడు రాజేశ్ను పార్టీలోకి ఆహ్వానించారు. దీనికితోడు 'పాత, కొత్త' లీడర్ల మధ్య ఉన్న పంచాయితీలు సద్దుమణిగేలా చేసి, రానున్న ఎన్నికల్లో కలిసికట్టుగా పని చేయాలనే 'కర్ణాటక' ఫార్ములాను రేవంత్ తెరముందుకు తెస్తున్నారు.
సీతా దయాకర్రెడ్డితో చర్చలు
దేవరకద్ర మాజీ ఎమ్మెల్యే కొత్తకోట సీతా దయాకర్రెడ్డిని కాంగ్రెస్ లోకి తీసుకొచ్చేందుకు కొద్ది రోజులు గా ప్రయత్నాలు జరుగుతున్నాయి. రెండు రోజుల కిందట హైదరాబాద్లో ఆమెను మల్లు రవితో పాటు మహబూబ్నగర్ డీసీసీ అధ్యక్షుడు మధుసూదన్రెడ్డి , రేవంత్రెడ్డి సోదరుడు కొండల్రెడ్డి కలిసి పార్టీలోకి రావాలని కోరారు. అయితే ఆమె మక్తల్ అసెంబ్లీ టికెట్ కోరినట్లు తెలిసింది. కానీ పార్టీ హైకమాండ్ మాత్రం దేవరకద్ర టికెట్ ఆఫర్య చేసినట్లు సమాచారం. మక్తల్ సెగ్మెంట్ నుంచి ఇండిపెండెంట్గా అయినా పోటీ చేసేందుకు సిద్ధంగా ఉన్నట్లు ఆమె సమాధానం ఇచ్చినట్లు తెలిసింది.
బీసీ లీడర్ను తిరిగి రమ్మంటున్నారు..
గతంలో కాంగ్రెస్లో ఉండి బీజేపీలో చేరిన మహ బూబ్నగర్ నియోజకవర్గానికి చెందిన బీసీ లీడర్ ఎన్పీ వెంకటేశ్ను తిరిగి సొంత గూటికి తీసుకొచ్చేందుకు కాంగ్రెస్ లీడర్లు ప్రయత్నాలు మొదలు పెట్టారు. ఈ నియోజకవర్గంలో 53 శాతం ఓటర్లు బీసీలే ఉన్నారు. పాలమూరు సెగ్మెంట్లో అత్యధికంగా ఉన్న ముదిరాజ్ సామాజిక వర్గానికి చెందిన వెంకటేశ్ను పార్టీలోకి ఆహ్వానించడం ద్వారా ఓటు బ్యాంకును పెంచుకోవచ్చనే ఆలోచన చేస్తున్నారు. ఈ క్రమంలో గురువారం సాయంత్రం వెంకటేశ్ను తీసుకొని మల్లు రవి, చిన్నారెడ్డి హైదరాబాద్లో రేవంత్ ను కలిసినట్లు సమాచారం. సర్వేలు, పొలిటికల్ ఈక్వేషన్స్ ప్రకారం ఈ సెగ్మెంట్ నుంచి ఆయనకు టికెట్ ఇచ్చే చాన్స్ కూడా ఉన్నట్లు చర్చ నడుస్తోంది.
మరికొందరి కోసం ప్రయత్నాలు..
దేవరకద్ర నుంచి గతంలో రెండు సార్లు కాంగ్రెస్ నుంచి పోటీ చేసిన ఓ లీడర్ బీజేపీలో చేరారు. ఆయనను తిరిగి కాంగ్రెస్లోకి తీసుకొచ్చేందుకు దాదాపు రెండు నెలలుగా ప్రయత్నాలు జరుగుతున్నాయి. కాంగ్రెస్ నిర్వహించిన సర్వేల్లో ఆయనకు ఓటర్లలో సానుభూతి ఉండటంతో పాటు రానున్న ఎన్నికల్లో టఫ్ ఫైట్ ఇస్తారని తేలింది. దీంతో ఆయనను కాంగ్రెస్లోకి తీసుకొచ్చేందుకు మంతనాలు జరుపుతున్నారు.
ఈయనతో పాటు గతంలో మహబూబ్నగర్ జిల్లాలో పోలీస్ ఆఫీసర్గా పని చేసిన ఓ అధికారితో కూడా సంప్రదింపులు జరుపుతున్నట్లు తెలిసింది. వీరితో పాటు గతంలో కాంగ్రెస్లో పని చేసి ఇతర పార్టీల్లోకి వెళ్లిన లీడర్లను కలుస్తున్నారు. తిరిగి కాంగ్రెస్ కోసం పని చేయాలని కోరుతున్నారు. అధికాంలోకి వస్తే పదవులు ఇప్పిస్తామంటూ మాట కూడా ఇస్తున్నారు. అలాగే నియోజకవర్గాల్లో టికెట్ల కోసం ఆశలు పెట్టుకున్న వారికి సైతం కాంగ్రెస్ అధికారంలోకి వస్తే నామినేడెట్ పదవులు ఇప్పిస్తామనే హామీలు ఇస్తున్నట్లు సమాచారం.
