రాయ్పూర్: ఛత్తీస్ గఢ్లో మరో దారుణం జరిగింది. అవినీతిని వెలికి తీశాడన్న కోపంతో ఇటీవల ఓ జర్నలిస్టును కిరాతకంగా హత్య చేసిన ఘటన మరుకవముందే.. తాజాగా మరో జర్నలిస్టు ఫ్యామిలీపై దాడి చేసి హతమార్చారు దుండగులు. పోలీసుల వివరాల ప్రకారం.. సూరజ్‌పూర్‌ జిల్లాకు చెందిన సంతోష్ కుమార్ ఓ మీడియా ఛానెల్లో జర్నలిస్టుగా పని చేస్తున్నాడు. సంతోష్ ఫ్యామిలీకి జగన్నాథ్‌పూర్ ప్రాంతంలో కొంత భూమి ఉండగా.. ఈ ల్యాండ్కు సంబంధించి కొన్నాళ్లుగా కుటుంబ కలహాలు కొనసాగుతున్నాయి. ప్రస్తుతం ఈ భూ వివాదం కోర్టు పరిధిలో ఉంది.
శుక్రవారం (జనవరి 10) ఈ వివాదస్పద భూమి దగ్గరికి సంతోష్ తల్లిదండ్రులు మాఘే తోప్పో (57), బసంతి టోప్పో (55), సోదరుడు నరేష్‌ టోప్పో (30) వెళ్లారు. ఈ సమయంలో అక్కడికి వచ్చిన ప్రత్యర్థులు సంతోష్ కుమార్ ఫ్యామిలీ మెంబర్స్పై గొడ్డళ్లు, కర్రలతో విచక్షణరహితంగా దాడి చేశారు. ఈ దాడిలో సంతోష్ తల్లి బసంతి, సోదరుడి తలకు తీవ్రంగా గాయాలు కావడంతో వారు స్పాట్లోనే చనిపోయారు. తీవ్రంగా గాయపడిన మాఘేను అంబికాపూర్ మెడికల్ కాలేజీకి తరలించగా చికిత్స పొందుతూ మృతి చెందాడు. సంతోష్ మరో సోదరుడు ఉమేష్ టోప్పో ఈ దాడి నుంచి తప్పించుకుని గ్రామస్థులకు ఈ విషయం చెప్పాడు.
స్థానికుల ద్వారా సమాచారం అందుకున్న పోలీసులు హుటాహుటిన ఘటన స్థలానికి చేరుకున్నారు. పోలీసులు వెళ్లే లోపే నిందితులు పారిపోయారు. సంతోష్ ఫిర్యాదు మేరకు కేసు నమోదు చేసినట్లు దర్యాప్తు చేపట్టినట్లు ప్రతాప్పూర్ పోలీసులు తెలిపారు. పరారీలో ఉన్న నిందితుల కోసం ప్రత్యేక బృందాలను రంగంలోకి దించి గాలింపు చర్యలు చేపట్టామన్నారు. వివాదస్పదమైన ఈ భూమికి సంబంధించి కోర్టు తీర్పు ఇవ్వకముందే సంతోష్ కుటుంబపై దాడి చేసిన వారు వ్యవసాయం చేయడంతోనే ఘర్షణలు చెలరేగినట్లు పోలీసులు ప్రాథమికంగా గుర్తించారు.
