హుస్నాబాద్, వెలుగు : తమకు సీఎం రేవంత్రెడ్డి గౌరవవేతనం ఇస్తామనడంపై ఆర్ఎంపీలు హర్షం వ్యక్తం చేశారు. బీఆర్ఎస్ పదేండ్ల పాలనలో తమను ఓటుబ్యాంకుగా వాడుకొని వదిలేసిందని, కాంగ్రెస్ ప్రభుత్వం తమ బాగోగులను పట్టించుకోవడం సంతోషకరమన్నారు. వైఎస్ రాజశేఖరరెడ్డి తర్వాత ఇన్నేండ్లకు తమను ఆదుకునేవారు రావడం శుభపరిణామమని బుధవారం సిద్దిపేట జిల్లా హుస్నాబాద్లో స్వీట్లు పంచుకొని సంబరాలు జరుపుకున్నారు.
అంబేద్కర్ చౌరస్తాలో సీఎం రేవంత్రెడ్డి, వైద్యారోగ్య శాఖ మంత్రి దామోదర రాజనరసింహ, రవాణా, బీసీ సంక్షేమ శాఖ మంత్రి పొన్నం ప్రభాకర్ ఫొటోలకు క్షీరాభిషేకం చేశారు. వైఎస్ రాజశేఖర్రెడ్డి సీఎంగా ఉన్నప్పుడు తమకు ట్రైనింగ్ ఇప్పించారన్నారు. ప్రభుత్వం నుంచి గౌరవవేతనాలు ఇచ్చి తమను వైద్యసేవల్లో భాగంచేద్దామనుకునే ప్రక్రియ ఆయన మరణంతో ఆగిపోయిందన్నారు.
కార్యక్రమంలో ఆర్ఎంపీల సంఘం హుస్నాబాద్ మండల అధ్యక్షుడు వెంకటేశ్వర్లు, గౌరవ అధ్యక్షుడు సుదర్శన్, ఆర్ఎంపీలు బంక చందు, ముంతాజ్, శ్రీను, బాలయ్య, ఆంజనేయులు, ప్రకాశ్, కృష్ణ, పరశురాములు పాల్గొన్నారు.
