మేడారం జాతర నాటికి రోడ్డు డౌటే!

ఇంకా కొనసాగుతున్న మంథని రోడ్డు నిర్మాణం
ఇప్పటికే పెరిగిన భక్తుల రద్ధీ
రోడ్డు లేక వాహనదారుల ఇబ్బందులు

పెద్దపల్లి, వెలుగు: మేడారం జాతర కోసం మంథని, అడవి సోమన్పల్లి నడుమ జరుగుతున్న రోడ్డు నిర్మాణ పనులు జాతరనాటికి పూర్తయ్యేలా కనిపించడం లేదు. జాతర కు ఆర్నెళ్ల ముందే రోడ్లను, రిపేర్లను పూర్తి చేయాల్సింది. కానీ, ఆ దిశగా పనులు కాలేదు. మంథని నుంచిమేడారం వరకు 2016 కు ముందు రోడ్డు నిర్మించారు. ఈ రోడ్డులో ఇసుక లారీలు నడుస్తుండటంతో ఐదేళ్లలో రోడ్డు పూర్తిగా ధ్వంసమైంది.

ప్రస్తుతం రూ. 47 కోట్లతో 14 కిలోమీటర్ల రోడ్డు నిర్మాణం జరుగుతోంది. మేడారం జాతరకు ముందే రోడ్డు నిర్మాణం జరుగుతుందని భావించారు. కానీ గత బీఆర్ఎస్ ప్రభుత్వం నిర్లక్ష్యం చేసింది. తాజా అధికారులు పనులు ప్రారంభించినా జాతర నాటికి నిర్మాణం పూర్తవుతుందా అన్న అనుమానం నెలకొంది. రోడ్డు పూర్తి కాకుంటే జాతరకు వచ్చే వాహనదారులకు తీవ్ర ఇబ్బందులు ఉంటాయి.

ఫిబ్రవరి 21, 22, 23 న జాతర ఉండగా.. 15 రోజుల ముందు నుంచే జాతర కు భక్తుల తాకిడి ఉంటుంది. ప్రస్తుతం రోజుకు లక్ష మంది భక్తులు వనదేవతలను దర్శనం చేసుకుంటున్నారు. మంథని మీదుగా మేడారం పోయే భక్తుల సంఖ్యే అధికంగా ఉంటుంది. ఈ క్రమంలో రోడ్డు నిర్మాణంలో వేగం పెంచాలని భక్తులు కోరుతున్నారు. జాతర నాటికి రోడ్డు నిర్మాణం పూర్తి కాకపోయినా, ప్రయాణికులకు ఎలాంటి ఇబ్బందులు లేకుండా చూస్తామని ఆర్ అండ్ బీ అధికారులు చెప్తున్నారు. రోడ్డు పనులు పూర్తి స్థాయిలో కంప్లీట్ కావడానికి ఇంకా నాలుగు నెలలు పట్టే చాన్స్ ఉన్నట్లు తెలుస్తుంది. కానీ జాతర కోసం మాత్రం తాత్కాలికంగా రోడ్డును అందుబాటులోకి తీసుకురావడానికి అధికారులు ప్రయత్నాలు చేస్తున్నారు.

ఇప్పటికే లక్షల్లో భక్తులు...

జాతరకు తెలంగాణతో పాటు ఇతర రాష్ట్రాల నుంచి భక్తులు వచ్చి దర్శనం చేసుకుంటారు. ఈ క్రమంలో సర్కార్ ప్రతిష్టాత్మకంగా తీసుకొని ఏర్పాట్లు చేస్తుంది. రిపబ్లిక్ డే సందర్భంగా మూడు రోజుల వరుస సెలవులతో మేడారం జాతరకు భక్తుల తాకిడి పెరిగిపోయింది. రోడ్డు నిర్మాణంలో ఉండటంతో బస్సులు, కార్లల్లో ప్రయాణిస్తున్న భక్తులు చాలా సేపు ట్రాఫిక్లో ఇరుక్కుపోయారు.

మహరాష్ట్ర, ఆదిలాబాద్, నిజామాబాద్, జగిత్యాల, పెద్దపల్లి, కరీంనగర్ జిల్లాలకు చెందిన భక్తులు మంథని మీదుగానే మేడారం పోవాల్సి ఉంటుంది, దీంతో వేలాది వాహనాలు ఈ రోడ్డులో నడుస్తున్నాయి. రోడ్డు పరిస్థితి చూసి భక్తులు అసంతృప్తి వ్యక్తం చేయడంతో పాటు రోడ్డు నిర్మాణం వెంటనే పూర్తయ్యేలా చూడాలని కోరుతున్నారు.