- అర్ధరాత్రి కత్తులతో బెదిరించి దోచుకుంటున్న దుండగులు
- పోలీసులను ఆశ్రయించిన బాధితులు
కూకట్పల్లి, వెలుగు : కేపీహెచ్బీ పరిధిలో అర్ధరాత్రి దారి దోపిడీ ముఠా హల్చల్ చేస్తోంది. ఈ నెల 12న అరగంట వ్యవధిలో ఇద్దరు వ్యక్తులను దుండగులు కత్తులతో బెదిరించి అందినంత దోచుకున్నారు. జగద్గిరిగుట్టలోని వెంకటేశ్వరనగర్కు చెందిన మురహరిశెట్టి అంకమరావు పనిమీద మూసాపేటలోని కైత్లాపూర్కు వెళ్లి ఇంటికి వెళ్తున్నాడు. మంగళవారం రాత్రి 12 గంటల సమయంలో లోథ అపార్ట్మెంట్స్ వద్ద అతడి బైక్ను కొందరు ట్రాన్స్జెండర్లుఆపారు. ఇక్కడ రౌడీలు తిరుగుతున్నారని, వెంటనే వెళ్లిపోవాలని సూచించారు.
దీంతో ఆయన వెంటనే బైక్ తీసుకుని కొద్ది దూరం వెళ్లగానే, బైక్ మీద ఇద్దరు వ్యక్తులు వచ్చి అంకమరావుకు అడ్డుపడ్డారు. మరో వ్యక్తి వెనుక నుంచి వచ్చి అతడిని కదలకుండా చేశాడు. అనంతరం బాధితుడిని కత్తులతో బెదిరించి ఒకటిన్నర తులం గోల్డ్చైన్, సెల్ఫోన్, బైక్కీస్ లాక్కుని పరారయ్యారు. ఇది జరిగిన కొద్దిసేపటి ఇదే రోడ్డులో మరో దోపిడీ జరిగింది. తూర్పు గోదావరి జిల్లా కపిలేశ్వరానికి చెందిన కె.వెంకట సురేశ్(28) ఇటీవల బోరబండ మోతీనగర్లోని తన ఫ్రెండ్ వద్దకు వచ్చాడు.
వీరిద్దరూ మంగళవారం రాత్రి డిన్నర్చేయడానికి కేపీహెచ్బీ కాలనీకి వెళ్లి తిరిగివస్తున్నారు. ఈ క్రమంలో వీరి బైక్ను నలుగురు వ్యక్తులు వెంబడించి ఆపారు. వారి వద్ద డబ్బులు లేకపోవడంతో బెదిరించి పరారయ్యారు. ఈ ఘటనలపై బాధితులు ఇచ్చిన ఫిర్యాదులతో కేపీహెచ్బీ పోలీసులు కేసు నమోదు చేసి
దర్యాప్తు చేస్తున్నారు.
