కామారెడ్డి , వెలుగు: మూడు నెలల కిందట కురిసిన వానలకు జిల్లాలో రోడ్లు, కల్వర్టులు దెబ్బతిన్నాయి. రోజులు గడుస్తున్నా అధికారులు మాత్రం పట్టించుకోవడం లేదు. మాచారెడ్డి మండలం ఎల్లంపేట మైసమమ్మ చెరువు తండా- సోమార్పేట గ్రామాల మధ్య కల్వర్టు, రోడ్డు కొట్టుకుపోయింది. 100 మీటర్ల దాక కోతకు గురై ప్రమాదకరంగా మారింది. ఈ మార్గం రోజూ మాచారెడ్డి, ఎల్లంపేట నుంచి సోమార్పేట, బంజపల్లి, రత్నగిరిపల్లి, రాజన్న సిరిసిల్లా జిల్లాలోని ఊర్లకు ఈ మార్గంలో వస్తూ, పోతుంటారు. తాత్కలికంగా రిపేర్లు అయినా చేయించకపోవడంతో స్థానికులు అధికారులపై ఆగ్రహం వ్యక్తం చేస్తున్నారు. దీంతో పాటు వరదలకు మాచారెడ్డి, రాజంపేట, గాంధారి, తాడ్వాయి, నాగిరెడ్డిపేట, జుక్కల్, బిచ్కుంద, కామారెడ్డి మండలాల్లో భారీ వరదలకు రోడ్లు దెబ్బతిన్నాయి. సుమారు10 కల్వర్టుల వద్ద రోడ్డు కోతకు గురైంది. ఆఫీసర్లు వివరాలు సేకరించినా.. ఇప్పటికీ రిపేర్లు మాత్రం చేయలేదు.
ఇదీ పరిస్థితి..
రాజంపేట మండలం కొండాపూర్, గుండారం, ఎల్లారెడ్డిపల్లి శివారుల్లో ఉన్న కల్వర్టులు, కాజ్వేల దగ్గర కోతకు గురయ్యాయి. కొండాపూర్- ఎల్లారెడ్డిపల్లి మధ్య ఉన్న కాజ్వేపై పెద్ద గుంత ఏర్పడింది. మాచారెడ్డి మండలం సోమార్పేట, బంజపల్లి, రత్నగిరిపల్లిల మధ్య ఉన్న రోడ్డు వరదకు ధ్వంసమైంది. దోమకొండ, ముత్యంపేట, క్యాసంపల్లి మధ్య రోడ్డు దెబ్బతిన్నది. బిచ్కుంద, జుక్కల్, మద్నూర్ మండలాల్లో పలు ఊర్లకు వెళ్లే రోడ్లు, కాజ్వేలు అధిక వానలకు ప్రమాదకరంగా మారాయి.
ఈ కల్వర్టు పక్కనుంచి పోవాలంటే భయం
ఎల్లంపేట నుంచి సోమార్పేట వైపు వెళ్లే రోడ్డులో కల్వర్టు వానలకు సగం కొట్టుకుపోయింది. రోడ్డు కూడా సగం కోస్కపోయింది. ఇప్పటి వరకు రిపేర్ చేయలేదు. ఆ రోడ్డు నుంచి వెహికల్పై వెళ్ళాలంటే భయమవుతోంది. బస్సు కూడా బంద్ చేసిండ్రు.
- సురేశ్, ఎల్లంపేట
రాత్రి టైం అయితే ప్రమాదమే
ఎల్లంపేట నుంచి సోమార్పేట వచ్చే రోడ్డులో వానలకు కల్వర్టు కొట్టుకుపోయి పైపులు పైకి లేచాయి. పగలు, రాత్రి టైంలో కొత్తవాళ్లు ఎవరైనా బైక్లు, కార్లపై వస్తే యాక్సిడెంట్ జరిగేలా ఉంది. అంచుకు వెహికిల్స్ పోకుండా కనీసం బోర్డు కూడా పెట్టలేదు. వానలు పోయినా ఇంకా రిపేర్ చేస్తలేరు.
- నారాయణ, సోమార్పేట
