- జనగామ జిల్లా పెండియాల్ రైల్వేస్టేషన్ సమీపంలో ఘటన
- పనులు జరుగుతుండడంతో మెల్లిగా వెళ్లిన ట్రైన్
- కిటికీల దగ్గర పడుకున్న మహిళల మెడల్లోంచి ఆభరణాల అపహరణ
స్టేషన్ఘన్పూర్, వెలుగు: జనగామ జిల్లా చిల్పూరు మండలంలోని నష్కల్– పెండియాల్ రైల్వేస్టేషన్ల మధ్య నర్సాపూర్ సూపర్ ఫాస్ట్ఎక్స్ప్రెస్ రైలులో బుధవారం అర్ధరాత్రి దోపిడీ జరిగింది. కాజీపేట రైల్వే జీఆర్పీ పోలీసుల కథనం ప్రకారం..నాగర్సోల్ నుంచి నర్సాపూర్ వెళ్లే సూపర్ ఫాస్ట్ ఎక్స్ప్రెస్ రైలు జనగామ జిల్లా చిల్పూరు మండలం నష్కల్,పెండియాల్ రైల్వేస్టేషన్ల మధ్యకు రాగానే స్లో అయ్యింది. ఇక్కడ కొద్ది రోజులుగా రైల్వే లైన్ నిర్మాణం, రిపేర్ పనులు జరుగుతుండడంతో గంటకు 15-–20 కిలోమీటర్ల వేగంతో వెళ్తోంది.
ఇదే అదునుగా మాటువేసిన దొంగలు రిజర్వేషన్ బోగీల్లోని కిటికీల వద్ద ఆదమరిచి నిద్రిస్తున్న మహిళల మెడల్లోని పుస్తెలతాళ్లు, చైన్లు తెంపడం మొదలుపెట్టారు. పదుల సంఖ్యలో మహిళలకు చెందిన బంగారు ఆభరణాలను అపహరించారు. మహిళలు మేల్కొని గట్టిగా అరిచినా అప్పటికే దొంగలు పారిపోయారు. బాధితులు రైల్వే కంట్రోల్ రూమ్ టోల్ఫ్రీ నెంబర్139కి ఫోన్చేయడంతో స్టేషన్ఘన్పూర్ఏసీపీ భీమ్శర్మ, కాజీపేట జీఆర్పీ రైల్వే పోలీసులు అక్కడికి వచ్చి విచారణ జరిపారు. కేసు నమోదు చేసుకుని దర్యాప్తు చేస్తున్నట్లు కాజీపేట జీఆర్పీ రైల్వేపోలీసులు తెలిపారు. సుమారు 10 మంది మహిళల నుంచి ఆభరణాలు దోచుకోగా ఒక్కరే కంప్లయింట్ ఇచ్చినట్టు తెలిసింది.
