వర్షాలొచ్చినయ్. రైతును సంతోషంలో ముంచినయ్. దుక్కి దున్ని విత్తు నాటడానికి ఎన్నో రోజులుగా ఆకాశం వంక చూసిన రైతన్న ఇప్పుడు పొలం పనుల్లో బిజీ అయిపోయాడు. పంట వేయగానే సరిపోతుందా.. పొలం ఎదుగుతున్న కొద్దీ కలుపు పొలంలో పెనవేసుకుంటుంది. పంటను పాడు చేస్తుంది. కాబట్టి ఆ కలుపును కూలీలను పెట్టి తీయించేస్తుంటారు. అంతేకాదు, పురుగుమందులు పొలంపై కొట్టేస్తుంటారు. మరి, ఇటు రైతుకు, అటు పర్యావరణానికి మేలు చేసేలా ఏం చేయాలి? ఇదే ఆలోచన జపాన్కు చెందిన కార్ల కంపెనీ ఇంజనీర్లు ఓ రోబోను తయారు చేశారు. దాని పేరు ‘ఐగమో’. అంటే బాతు అని అర్థం. దానికి ఆ పేరు పెట్టడానికీ కారణం లేకపోలేదు. బాతులు పొలాల్లోని కలుపులు, అక్కడ పెరుగుతూ పంటకు నష్టం చేసే చిన్న చిన్న కీటకాలను తినేస్తుందట. అందుకే బాతును స్ఫూర్తిగా తీసుకుని పొలం పనులు చేసే ఈ రోబో బాతును కనిపెట్టారు.
బాతుకు అంటే కాళ్లుంటాయి.. ఈదుకుంటూ వెళుతుంది. మరి, ఇదెలా నీళ్లలో వెళుతుంది? అంటే, దాని కింది భాగంలో ప్లాస్టిక్ రడ్డర్స్ను ఏర్పాటు చేశారు. అదే ఈ రోబో బాతును ముందుకు నడిపిస్తుంది. అంతేకాదు, అవి తిరుగుతున్న కొద్దీ నీళ్లలో ఆక్సిజన్ తయారవుతూ ఉంటుంది. ఆ రడ్డర్లే పొలాల్లో కలుపు పెరగకుండా నిరోధిస్తుంటుంది. వైఫై, బ్యాటరీ, సౌర కరెంట్, జీపీఎస్లతో పొలాలను అది దున్నేస్తుంటుంది. 1.5 కిలోల బరువుండే ఈ రోబో బాతు, ఓ వాక్యూమ్ క్లీనర్ సైజులో ఉంటుంది. ప్రస్తుతం దీని ప్రొటోటైప్ను జపాన్లోని యమగత ప్రిఫెక్చర్లో టెస్ట్ చేశారు. పొలంలోకి దిగి అది చలాకీగా పనులు చేసేసింది.
