మార్టుల్లో కుళ్లిన ఫ్రూట్స్.. ఔట్ డేటెడ్ స్నాక్స్

మార్టుల్లో కాలం చెల్లిన ఆహార పదార్థాలు
ఎక్స్పైరీ ముగిసినా, కుళ్లిన వాటినే విక్రయిస్తున్న వైనం
మామూళ్ల మత్తులో ఫుడ్ సేఫ్టీ ఆఫీసర్లు!

వరంగల్, వెలుగు: ఫుడ్ సేఫ్టీ ఆఫీసర్ల పట్టింపులేని కారణంగా ప్రజారోగ్యం ప్రమాదంలో పడుతోంది. వరంగల్ సిటీలో వెలసిన కొన్ని హోటళ్లు, మార్టులు కాలం చెల్లిన, కుళ్లిపోయిన ఆహార పదార్థాలను విక్రయిస్తున్నారు. చర్యలు తీసుకోవాల్సిన ఆఫీసర్లు మామూళ్ల మత్తులో ఊగుతున్నారనే ఆరోపణలు వినిపిస్తున్నాయి. కొన్ని మాల్స్, మార్ట్ లు తమ సొంత లేబుళ్లతో ప్యాకెట్లు తయారు చేసి ఎక్స్పైరీ డేట్ లేకుండానే అమ్ముతున్నాయి. తేదీలను స్టిక్కర్ల రూపంలో అతికించి, కాలం చెల్లిన తరువాత మళ్లీ ఫ్రెష్ స్టిక్కర్లు వేసి నడిపిస్తున్నాయి.

తనిఖీల్లేవు..

సిటీలో ఉన్న హోటళ్లు, దుకాణాలు, వివిధ స్టోర్స్, మాల్స్ లో ఫుడ్ సేఫ్టీ ఆఫీసర్లు తరచూ తనిఖీ చేయాల్సి ఉంటుంది. ముఖ్యంగా ఐస్ క్రీమ్స్, కూల్ డ్రింక్స్, బ్రెడ్, మిల్స్, ఫ్రూట్స్, ఇతర ఫుడ్ ప్రొడక్ట్స్ పై ప్రత్యేక దృష్టి పెట్టాల్సి ఉంటుంది. కానీ నగరంలో వెలసిన కొన్ని మార్ట్లు ప్రజల ఆరోగ్యం కంటే బిజినెస్కే ప్రాధాన్యం ఇస్తూ ఫుడ్ ప్రొడక్ట్స్ గడువు ముగిసినా వాటిని తొలగించకుండా విక్రయిస్తున్నాయి. బాధితుల కంప్లైంట్ మేరకు ఇటీవల వెలుగు చూసిన ఘటనలే ఇందుకు నిదర్శనం. ఆయా స్టోర్ లలో నిత్యావసర సరకులతో పాటు ఫుడ్ ఐటమ్స్కు సంబంధించిన ఎక్స్పైరీ డేట్ ఎప్పటికప్పుడు పరిశీలించి వాటిని తొలగించాల్సిన యాజమాన్యాలు అదేమీ పట్టించుకోవడం లేదు. ఇక్కడి ఆఫీసర్లు అన్నీ తెలిసినా లైట్ తీసుకుంటున్నారనే ఆరోపణలు ఉన్నాయి. ఎవరైనా కంప్లయింట్ చేస్తే తనిఖీల పేరున హడావుడి చేసి దుకాణదారులకు ఎంతోకొంత ఫైన్ వేసి చేతులు దులుపేసుకుంటున్నారనే విమర్శలున్నాయి.

హోటళ్ల వైపు అసలే చూడట్లే..

నగరంలోని బడా హోటళ్లవైపు ఫుడ్ సేఫ్టీ ఆఫీసర్లు చూడరనే అపవాదు ఉంది. హోటళ్లలో ఫిష్, చికెన్, మటన్ బిర్యానీలు, ఇతర వెరైటీలు స్టోర్ చేసి అమ్ముతున్నా పట్టించుకోవడం లేదు. అప్పట్లో మున్సిపల్ ఆఫీసర్లు తనిఖీలు చేపట్టి ఫైన్లు విధించారు. కానీ ఇప్పటికీ కొన్ని హోటళ్ల తీరు అలాగే కొనసాగుతోంది. సంబంధిత ఆఫీసర్లు మాత్రం తనిఖీలు విస్మరించి కుర్చీలకే అతుక్కుపోయారనే విమర్శలు వినిపిస్తున్నాయి. ఫలితంగా గ్రేటర్ వరంగల్ పరిధిలో ప్రజారోగ్యం ప్రమాదంలో పడుతోంది.

సొంత లేబుల్స్.. స్టిక్కర్స్

గ్రేటర్ వరంగల్ పరిధిలో అన్నీ కలిపి దాదాపు 200 వరకు మార్ట్ లు ఉన్నాయి. నిత్యావసర సరుకులు, కూరగాయలు ఇలా అన్నీ ఓకే చోట లభిస్తుండడంతో వాటికి ఆదరణ పెరుగుతోంది. దీంతో కొన్ని మార్ట్లు సొంతంగా ఫుడ్ ప్రొడక్ట్స్ తయారు చేస్తున్నాయి. కానీ వాటిపై తయారీ, ఎక్స్పైరీ డేట్ మాత్రం ముద్రించడం లేదు. ఎవరైనా తనిఖీలకు వస్తే ప్యాకెట్లపై అంటించడానికి స్టిక్కర్లను రెడీగా పెట్టుకుంటున్నాయి. ఇంకొన్నింటిపై కేవలం ఎంఎఫ్జీ, ఎక్స్పైరీ డేట్ స్టిక్కర్లు తయారు చేసి అతికిస్తున్నారు. తీరా ఆ ఫుడ్ ప్రొడక్ట్స్ డేట్ ముగుస్తుందనగా.. దానిని తొలగించి కొత్త తేదీలతో స్టిక్కర్లు పెడుతున్నారు. కొన్ని సందర్భాల్లో కోడిగుడ్లు, పండ్లు, బ్రెడ్ తదితర గ్రాసరీస్ ఆఫర్లు పెట్టి ప్రజలకు అంటగడుతున్నాయి. ఇవేమీ తెలియని అమాయక ప్రజలు వాటినే కొనుగోలు చేస్తున్నారు.

జనవరి 20న కాజీపేటలోని ఓ మార్ట్ ఔట్ డేటెడ్బిస్కెట్ప్యాకెట్లు, ఇతర స్నాక్స్ అమ్ముతుండడంతో కొనుగోలుదారులు మున్సిపల్ ఆఫీసర్లకు సమాచారం ఇచ్చారు. దీంతో మున్సిపల్, ఫుడ్ సేఫ్టీ ఆఫీసర్లు రూ.20 వేల ఫైన్ విధించారు.

హన్మకొండ బాలసముద్రంలోని స్మార్ట్ స్టోర్లో ఓ వ్యక్తి గతేడాది డిసెంబర్ 15న కుళ్లిపోయిన యాపిల్స్ విక్రయించాడు. గుర్తించిన బాధితుడు మున్సిపల్ ఆఫీసర్లకు ఫిర్యాదు చేశాడు. దీంతో మున్సిపల్ చీఫ్ మెడికల్ ఆఫీసర్ రాజారెడ్డి.. ఫుడ్ సేఫ్టీ ఆఫీసర్ల సమక్షంలో తనిఖీలు చేపట్టి ఆ స్టోర్కు రూ.20 వేల ఫైన్ వేశారు.