నాగర్ కర్నూల్, వెలుగు : ప్రభుత్వం నుంచి తీసుకున్న వడ్లు పట్టించి ఎఫ్సీఐకి సీఎంఆర్ పెట్టని రైస్ మిల్లర్లకు డిఫాల్టర్, రెవెన్యూ రికవరీ యాక్ట్ కింద నోటీసులు అందించేందుకు సంబంధిత ఆఫీసర్లు నోటీసులు రెడీ చేశారు. సీఎంఆర్ పెట్టడానికి జనవరి 31తో గడువు ముగియడంతో జిల్లాలో 109 మిల్లుల్లో (1 ఏసీకే)29 టన్నుల కంటే ఎక్కువ సీఎంఆర్ బకాయి ఉన్న 90 రైస్ మిల్లులకు నోటీసులు ఇవ్వడానికి రెడీగా ఉన్నట్లు డీఎస్వో స్వామి కుమార్ తెలిపారు. ప్రభుత్వం మరోసారి గడువు పెంచుతుందన్న వార్తల నేపథ్యంలో శనివారం నోటీసులు ఇవ్వలేదని చెప్పుకొచ్చారు.
మూడేండ్ల లెక్కలు లేవు..
2023 ఖరీఫ్లో ప్రభుత్వం కొనుగోలు కేంద్రాల ద్వారా సేకరించిన వడ్లను మిల్లులకు అలాట్ చేసింది. జిల్లాలోని పారా బాయిల్డ్, రా రైస్ మిల్లులు కెపాసిటీ, ట్రాక్ రికార్డ్ పరిశీలించకుండా సివిల్ సప్లై ఆఫీసర్లు పైరవీలు చేసిన వాళ్లకు, నచ్చిన మిల్లర్లకు అడ్డగోలుగా వడ్లు అలాట్ చేశారు.2019-–20 నుంచి 2023 ఖరీఫ్, యాసంగిలో ఏ మిల్లుకు ఎంత వడ్లు ఇచ్చారు. సీఎంఆర్ ఎంత ఇచ్చారనే లెక్కాపత్రాలు లేవని సమాచారం.2020–-21కి సంబంధించి ఇంకా 11వేల మెట్రిక్ టన్నుల బియ్యం ఎఫ్సీఐకి పెట్టాల్సి ఉండగా, ఆ మిల్లుల నుంచి బియ్యం రికవరీ చేయలేదు.
అయినప్పటికీ నోటీసులు, కేసులు పెట్టలేదంటే బియ్యం దందా బంధం ఏ స్థాయిలో ఉందో అర్థం చేసుకోవచ్చు. రాష్ట్రంలో కాంగ్రెస్ ప్రభుత్వం ఏర్పడిన తర్వాత బియ్యం దందా, సీఎంఆర్పై ప్రత్యేక దృష్టి పెట్టడంతో పాటు ఎఫ్సీఐకి పెండింగ్ సీఎంఆర్పై వారానికోసారి రివ్యూ చేస్తున్నారు. బీఆర్ఎస్ సర్కార్ ప్రమోట్ చేసిన బియ్యం దందాతో ఒకే ఏడాదిలో నాగర్కర్నూల్ జిల్లాలో 53 కొత్త మిల్లులు పుట్టుకొచ్చాయి.
ధాన్యం, బియ్యం, తవుడు, నూకలు, మిల్లింగ్ చార్జీలు, చివరికి కరెంట్ బిల్లుల లెక్కలు కూడా సక్కగా లేనంతగా దందా నడిపించారు. నాగర్ కర్నూల్ జిల్లాలో ఐదేండ్లు పని చేసిన ఓ సివిల్ సప్లై ఆఫీసర్ అన్నీ తానై నడిపించాడనే ఆరోపణలున్నాయి. అప్పటి మంత్రి, ఎమ్మెల్యేల సపోర్ట్ కూడా ఉండడం ఆయనకు కలిసొచ్చిందని అంటున్నారు.
పొట్టు కూడా లేదు...
2023 ఖరీఫ్లో ఇచ్చిన వడ్లకు సంబంధించి ఇంకా 36 వేల మెట్రిక్ టన్నుల బియ్యం ఎఫ్సీఐకి పెట్టాల్సి ఉంది.2023 యాసంగికి సంబంధించి (95 వేల మెట్రిక్ టన్నుల బియ్యం) 1.30 లక్షల వడ్లు మిల్లుల్లో లేదు. ప్రభుత్వం వేలం వేసి అమ్మడానికి మిల్లుల్లో వడ్లు, పొట్టు కూడా లేదు. క్వింటాల్కు ఇంత అని ప్రభుత్వం రేట్ ఫైనల్ చేస్తే, ఆ రేట్ ప్రకారం డబ్బులు కట్టిస్తామని మిల్లర్లు చెబుతున్నారు. ఇదిలాఉంటే ప్రభుత్వం సీరియస్ యాక్షన్ తీసుకుంటే ఏం చేయాలనే దానికిపై మిల్లర్లు లీగల్ ఓపీనియన్ కోసం అడ్వకేట్ల చుట్టూ తిరుగుతున్నారు.
