బెంగళూరులో ప్రస్తుతం నీటి కొరత మాములుగా లేదు. అసలు ఎండకాలం మొదలు కాకముందే కన్నడ ప్రజలకు నీటి కష్టాలు అప్పుడే స్టార్ట్ అయ్యాయి. దీంతో నీటి కోసం కన్నడిగులు తీవ్ర అవస్థలు పడుతున్నారు. ఈ క్రమంలో బెంగళూరు నగరంలోని ఒక హౌసింగ్ సొసైటీ సంచలన నిర్ణయం తీసుకుంది. నీటిని వృథా చేస్తే రూ. 5 వేలు విధించాలని నిర్ణయించింది. అంతేకాకుండా నీటిని వృథా చేస్తున్న వారిని గుర్తించేందుకు సెక్యూరిటీని కూడా ఏర్పాటు చేసేందుకు సిద్దమైంది. నీటి వృథాను కట్టడి చేసేందుకు ఈ నిర్ణయం తీసుకున్నట్లుగా వెల్లడించింది.
వీటితో పాటుగా తాగునీటి సరఫరాను 20 శాతం తగ్గిస్తూ వైట్‌ఫీల్డ్‌ ప్రాంతంలోని పామ్ మిడోస్ హౌసింగ్ సొసైటీ.. ఆ సొసైటీలో నివసించే వారికి నోటీసులు జారీ చేసింది.వేసవి ముదిరే కొద్దీ 40 శాతానికి పెరుగుతుందని హెచ్చరికలు జారీ చేసింది. బెంగళూరు నగరపాలక సంస్థ వాటర్‌ బోర్డు నుంచి గత 4 రోజులుగా నీరు రావడం లేదని పామ్ మిడోస్ హౌసింగ్ సొసైటీ తెలిపింది. ప్రస్తుతం బోర్ల ద్వారా అక్కడి వారికి నీరు అందిస్తున్నామని తెలిపింది.
ఇదిలా ఉంటే ఈ నీటి సమస్యను కొందరు ట్యాంకర్ ఓనర్లు ఆసరాగా తీసుకుని జనాల దగ్గర అధికంగా డబ్బులు వసూలు చేస్తున్నారు. ఒక్కో ట్యాంకర్‌ను రెట్టింపు, 3 రెట్ల ధరలకు విక్రయిస్తున్నారు. ఈ పరిస్థితిని ఎదుర్కొనేందుకు అన్ని రకాల చర్యలు తీసుకుంటున్నామని కర్ణాటక డిప్యూటీ సీఎం డీకే శివకుమార్ వెల్లడించారు.
