బాన్సువాడ రూరల్, వెలుగు : బాన్సువాడ పట్టణంలో సినీ ఫక్కీలో చోరీ జరిగిన ఘటన ఆలస్యంగా వెలుగులోకి వచ్చింది. ఈ నెల 11వ తేదీన ఇబ్రహీంపేట్ తండాకు చెందిన కాంట్రోత్ చందర్ బాన్సువాడ ఎస్బీఐ నుంచి రూ. 2 లక్షలు డ్రా చేసుకుని కారు డిక్కీలో పెట్టి, కొబ్బరి కాయలు కొనేందుకు వెళ్లాడు. తిరిగి వచ్చి చూసేసరికి కారు డిక్కీ ఓపెన్ చేసి ఉండగా, అందులో డబ్బులు లేవు.
అక్కడున్న సీసీ ఫుటేజ్ను పరిశీలించగా ముగ్గురు దుండగులు చోరీ చేసినట్లు తెలిసింది. ఒకరు చందర్ ను ఫాలో చేయగా, మరొకరు కారులో ఉన్న డబ్బులు తీసుకుని బైక్ పై పరారయ్యాడు. బాధితుడు ఇచ్చిన ఫిర్యాదు మేరకు సీసీ ఫుటేజ్ ఆధారంగా పోలీసులు కేసు నమోదు చేసుకుని దర్యాప్తు చేస్తున్నారు.
