కాజీపేట, వెలుగు: బ్యాంకులో డాక్యుమెంట్ల చలాన్లు కట్టేందుకు స్కూటీలో పెట్టిన రూ.5 లక్షలు చోరీకి గురైన ఘటన కాజీపేట పీఎస్లో జరిగింది. ఎస్సై ప్రమోద్ కుమార్ వివరాల ప్రకారం.. వరంగల్ ఎస్ఆర్ఆర్ తోటకు చెందిన పూల రాజు, గుండు శ్రీనివాస్ సిటీలోని పద్మ అరవింద్ అనే అడ్వకేట్ వద్ద అసిస్టెంట్ డాక్యుమెంట్ రైటర్లుగా పనిచేస్తున్నారు. సోమవారం డాక్యుమెంట్లకు సంబంధించిన చలాన్లు కట్టమని అడ్వకేట్ పద్మఅరవింద్.. రాజు, శ్రీనివాస్ కు రూ.5లక్షలు ఇచ్చారు.
వాటిని తీసుకుని ఇద్దరూ వడ్డేపల్లి ఎస్బీఐ బ్రాంచ్కు వెళ్లారు. సర్వర్ బిజీగా ఉందని బ్యాంక్ సిబ్బంది చెప్పడంతో రాజు డబ్బును స్కూటీ డిక్కీలో పెట్టుకుని ప్రశాంత్ నగర్లోని రిజిస్ట్రేషన్ ఆఫీసుకు వెళ్లాడు.తర్వాత సిటీలోని వేర్వేరు ప్రాంతాలకు వెళ్లాడు. రాత్రి 7.30కు ఇంటికి వచ్చిన రాజు డిక్కీ ఓపెన్ చేసి చూడగా డబ్బు కనిపించలేదు. వెంటనే బాధితుడు కాజీపేట పోలీసులకు ఫిర్యాదు చేశాడు.
