- ఉద్యోగుల ఖాతాల్లో వేయాల్సిన డీఏ, ఏరియల్స్ నిధుల మళ్లింపు
- వోచర్లను మార్చి చెక్కులను దిద్ది వేరే అకౌంట్లలోకి ట్రాన్స్ఫర్
- ఉద్యోగి, ఆఫీసర్ పాత్ర?
- టీవీవీపీ కమిషనర్ కు డీసీహెచ్ఎస్ ఫిర్యాదు
జగిత్యాల, వెలుగు: జగిత్యాల జిల్లా వైద్య విధాన పరిషత్ పరిధిలో పని చేసే ఉద్యోగుల జీపీఎఫ్, సీపీఎఫ్ ఖాతాల్లో వేయాల్సిన నిధులను కొందరు అక్రమార్కులు వోచర్లను మార్చి, చెక్కులను దిద్ది పక్కదారి పట్టించినట్టు తెలిసింది. డీఏ, ఏరియర్స్, సీపీఎస్ ఏరియర్స్, రెగ్యులర్సీపీఎస్, వివిధ డిడక్షన్స్ కు సంబంధించిన నిధులు జమ చేయకుండా దాదాపు రూ.50 నుంచి రూ. 60 లక్షల నిధులను మరో అకౌంట్లోకి ట్రాన్స్ఫర్ చేసుకున్నారు. ఈ తతంగం నాలుగైదేండ్లుగా నడుస్తున్నట్టు తెలుస్తుండగా రెండు రోజుల కింద జగిత్యాల డీసీహెచ్ఎస్సుదక్షిణా దేవికి తెలిసింది. దీంతో ఆమె వెంటనే టీవీవీపీ కమిషనర్ కు ఫిర్యాదు చేయడంతో పాటు కలెక్టర్ దృష్టికి తీసుకువెళ్లారు.
చెక్కులను దిద్దినా నో అబ్జక్షన్
వైద్య విధాన పరిషత్ సూపరింటెండెంట్ఆకౌంట్ లో జమయిన నిధులను ఆయా ఉద్యోగులకు సంబంధించిన జీపీఎఫ్ ఖాతాల్లో జమ చేస్తుంటారు. ఇందులో భాగంగా ఉద్యోగుల డబ్బుల వివరాలు, అకౌంట్ వివరాలను నమోదు చేసి చెక్తో పాటు వోచర్లను జత పరిచి ఎంప్లాయీస్ బ్యాంక్ ఖాతాల్లో జమ చేస్తుంటారు. కానీ, వైద్య విధాన పరిషత్ ఆఫీసులో పని చేసే ఓ ఉద్యోగి..ఆఫీస్ సూపరింటెండెంట్ఖాతాలో జమ చేయకుండా అతడి కుటుంబసభ్యులు, తెలిసిన కింది స్థాయి సిబ్బంది అకౌంట్లలో జమ చేసినట్లు తెలిసింది.
ఈ విషయం ఎలాగో డీసీహెచ్ఎస్ సుదాక్షిణా దేవి, ఆర్ఎంవో రామకృష్ణకు తెలియడంతో రెండు రోజుల కిందే బ్యాంకులో వివరాలడిగి తెలుసుకున్నారు. మరిన్ని డిటెయిల్స్ ఇవ్వాలని కోరగా సెలవులు రావడంతో మంగళవారం ఇస్తామని చెప్పినట్టు తెలిసింది. నిధుల మళ్లింపులో టీవీవీపీ ఆఫీసులో పని చేసే ఓ ఆఫీసర్ హస్తం కూడా ఉందన్న ఆరోపణలు వినిపిస్తున్నాయి. అయితే, రూ.8 వేల చెక్కును రూ.8 లక్షలుగా మార్చినట్లు తెలుస్తుండగా.. ఎలాంటి కరెక్షన్స్ ఉన్నా చెక్కులను రిజెక్ట్ చేసే బ్యాంకర్లు ఎలా అప్రూవ్చేశారన్న దానిపై అనుమానాలు కలుగుతున్నాయి.
