నిర్మల్, వెలుగు: ఆర్ఎస్ఎస్ శతాబ్ది ఉత్సవాల్లో భాగంగా గురువారం నిర్మల్ పట్టణంలో ప్రధాన వీధుల గుండా విజయ దశమి పథ సంచలన్ పేరిట భారీ ర్యాలీ నిర్వహించారు. ఈ కార్యక్రమానికి చీఫ్ గెస్ట్గా పడగెల కృష్ణ సంతోష్ హాజరు కాగా ఆర్ఎస్ఎస్ తెలంగాణ ప్రాంత కార్యవహ కాచం రమేశ్ ప్రసంగించారు. హిందూ మతం ఏ మతానికి వ్యతిరేకం కాదని, హిందుత్వం జీవనవిధానమన్నారు.
సమాజ ఐక్యత, సామాజిక సేవ కోసమే 99 ఏండ్లుగా ఆర్ఎస్ఎస్ హిందువులందరినీ సంఘటితం చేస్తోందన్నారు. ప్రతి రంగంలో ఆర్ఎస్ఎస్ భాగస్వామ్యమవుతోందని, దేశవ్యాప్తంగా లక్షకుపైగా శాఖలను నిర్వహిస్తోందని వివరించారు. మానవత్వమే హిందుత్వమని పేర్కొన్నారు. ఆర్ఎస్ఎస్ ను మరింత విస్తరించేందుకు ప్రతి ఒక్కరూ కృషి చేయాలన్నారు.
కార్యక్రమంలో ఆర్ఎస్ఎస్ జిల్లా సంఘచాలక్ నూకల విజయ్ కుమార్, నగర సంఘ చాలక డాక్టర్ ప్రమోద్ చంద్రారెడ్డి, జిల్లా కార్యవాహ బొద్దుల అశోక్, సీనియర్ ప్రతినిధులు అయ్యన్న గారి భూమయ్య, రావుల రామనాథ్ ,ఆడెపు సుధాకర్, పతికే రాజేందర్, సోలాపూర్ రాజేశ్వర్ పాల్గొన్నారు.
