- గ్రేటర్లో దాదాపు 4 వేల బస్సులు 15 ఏండ్లు నిండినవే..
- విద్యా సంవత్సర ప్రారంభంలో అధికారుల హడావిడి
- తూతూ మంత్రపు చర్యలతో మమ..
- ఈ ఏడాది 50 శాతం బస్సులు ఫిట్నెస్టెస్టులకు రాలే
- మంత్రి పొన్నం ఆదేశాలతోనైనా చర్యలు తీసుకునేనా?
హైదరాబాద్సిటీ, వెలుగు: గ్రేటర్పరిధిలో ఫిట్నెస్ లేని స్కూల్బస్సులుయథేచ్ఛగా తిరుగుతున్నాయి. స్కూళ్లు, కాలేజీల యాజమాన్యాలు యేటా వాహనాలకు ఫిట్నెస్ టెస్టులు చేయించాల్సి ఉన్నా పట్టించుకోవడం లేదు. దీంతో విద్యార్థులు ప్రమాదపుటంచున ప్రయాణం చేస్తున్నారు. విద్యా సంవత్సరం ప్రారంభం కాగానే ఆర్టీఏ అధికారులు స్కూల్బస్సులు, వ్యాన్లకు ఫిట్నెస్పరీక్షలు చేయించుకోవాలని ఆదేశాలు జారీ చేస్తారు.
ఈసారి కూడా ఇలాగే ఆదేశాలు జారీ చేయగా యాజమాన్యాల నుంచి పెద్దగా స్పందన రాలేదు. దీంతో తనిఖీలు నిర్వహించి ఫిట్గా లేని 200 స్కూల్ బస్సుల ఓనర్లపై కేసులు నమోదు చేశారు. రవాణాశాఖ మంత్రి పొన్నం ప్రభాకర్మూడు రోజుల కింద నిర్వహించిన సమీక్షా సమావేశాల్లో గ్రేటర్పరిధిలో ఫిట్నెస్లేని, కాలం తీరిన వాహనాలను సీజ్చేయాలని అధికారులను ఆదేశించారు. ఈ నేపథ్యంలో ఫిట్నెస్లేని, కాలం చెల్లిన స్కూల్బస్సులు, వ్యాన్ల వ్యవహారం మరోసారి తెరపైకి వచ్చింది.
ఎందుకు ముందుకు రావట్లేదంటే?
గ్రేటర్లోని స్కూళ్లు, కాలేజీలకు సంబంధించి 12,635 బస్సులు ఉన్నాయి. వీటిలో ఈ ఏడాది 50 శాతం మాత్రమే ఫిట్నెస్ టెస్టులకు వచ్చాయి. మిగిలిన వాటిలో ఎక్కువ శాతం 15 ఏండ్లకు మించిన వాహనాలు ఉండడంతో ఫిట్నెస్పరీక్షలకు రాలేదని అధికారులు గుర్తించారు. అంతేగాక బస్సుల్లో పిల్లల భద్రత కోసం కొన్ని ముఖ్యమైన ఏర్పాట్లు చేయాల్సి ఉంటుంది. అందులో భాగంగా స్టూడెంట్లుసులభంగా ఎక్కి దిగడానికి మెట్లు ఏర్పాటు చేయాలి.
కిటికీల నుంచి చేతులు, తల బయటకు పెట్టకుండా జాలీలు బిగించాలి. ఫైర్సేఫ్టీ పరికరాలు, ఫస్ట్ఎయిడ్ బాక్సులు పెట్టించాలి. వాహనాలకు ఇన్స్యూరెన్స్ చేయించి ఉండడంతోపాటు ఆర్టీఏకు పన్ను చెల్లించి ఉండాలి. డ్రైవర్ కచ్చితంగా 60 ఏండ్ల లోపు వారై ఉండాలి. ఈ నిబంధనలేవీ పాటించని యాజమాన్యాలు ఫిట్నెస్ పరీక్షలకు వస్తే దొరికిపోతామనే ఉద్దేశంతో రావడం లేదని తెలుసుకున్నారు.
అధికారులు ఏం చేస్తున్నట్టు?
ఫిట్నెస్ పరీక్షలకు రాని స్కూళ్లు, కాలేజీల యాజమాన్యాలకు నోటీసులిచ్చి చర్యలు తీసుకోవాల్సిన అధికారులు సైలెన్స్గా ఉంటున్నారు. అప్పుడప్పుడు తనిఖీలు చేసినప్పుడు లోపాలు బయటపడితే కేవలం జరిమానాలతో సరిపెడుతున్నారు. 15 ఏండ్లు దాటిన స్కూల్, కాలేజీ బస్సులను, వ్యాన్లను తప్పనిసరిగా స్క్రాప్ చేయాల్సిందే.
ALSO READ : కారు డ్రైవర్ నిర్లక్ష్యం..ఆడుకుంటున్న చిన్నారి ప్రాణాలు తీసింది
అయినా, విద్యా సంవత్సరం ప్రారంభంలో తూతూ మంత్రంగా తనిఖీలు చేసి వదిలేస్తున్నారు గానీ, పూర్తిస్థాయి చర్యలు తీసుకోవడం లేదు. స్కూళ్లు, కాలేజీల నిర్వాహకులు ఫిట్నెస్ పరీక్షలకు బస్సులను తీసుకురాకుండా మ్యానేజ్ చేసుకుంటున్నారు. ఇప్పటికైనా అధికారులు స్పందించి మంత్రి ఆదేశించినట్టు చర్యలు తీసుకోవాలని విద్యార్థుల తల్లిదండ్రులు కోరుతున్నారు.
