హైదరాబాద్, వెలుగు: ఆర్టీసీ బస్డ్రైవర్లు, కండక్టర్లు క్రమశిక్షణతో విధులు నిర్వర్తించాలని టీజీఎస్ ఆర్టీసీ ఎండీ సజ్జనార్ సూచించారు. ప్రతి ఉద్యోగి బాధ్యతగా ఉండాలని చెప్పారు. ప్రయాణికులతో దురుసుగా, అనుచితంగా ప్రవర్తిస్తే సీరియస్ యాక్షన్ ఉంటుందని హెచ్చరించారు. ఫరుఖ్‌నగర్‌ డిపోకు చెందిన ఓ కండక్టర్‌ బస్సులో తనతో ప్రవర్తించిన తీరు సరిగా లేదని ఒక యువతి సోషల్‌ మీడియా ద్వారా ఆర్టీసీ యాజమాన్యానికి ఫిర్యాదు చేసింది.
స్పందించిన సజ్జనార్ ఈ ఘటనపై సమగ్ర విచారణకు ఆదేశించినట్లు మంగళవారం ఎక్స్ లో ట్వీట్చేశారు. నివేదిక ఆధారంగా బాధ్యులపై శాఖాపరమైన చర్యలు తీసుకుంటామని తెలిపారు. మహిళా ప్రయాణికుల భద్రత విషయంలో రాజీపడేది లేదన్నారు.
