- ఆర్టీసీకి రూ. 80లక్షలు ఇస్తామని రెండేండ్లుగా ఊరిస్తున్న మున్సిపాలిటీ
- అందుకే ఆర్టీసీ నుంచి ఆగిన ఫండ్స్
- సౌలత్లు లేక సతమతమవుతున్న ప్రయాణికులు
భద్రాద్రికొత్తగూడెం, వెలుగు : కొత్తగూడెం బస్టాండ్ శిథిలావస్థకు చేరుకుంది. ప్రయాణికులు ఇబ్బంది పడుతున్నారు. ఈ బస్టాండ్కు నిత్యం దాదాపు 500కు పైగా బస్సు ట్రిప్పులు ఉంటాయి. రోజూ దాదాపు 15వేల మంది ప్రయాణికులు రాకపోకలు సాగిస్తుంటారు. కానీ బస్టాండ్ నిర్మించి ఐదు దశాబ్దాలు దాటడంతో రిపేర్లు చేయాల్సి ఉంది. అడపా దడపా నామమాత్రపు ఫండ్స్ తో చిన్న, చిన్న రిపేర్లు చేస్తూ ఆర్టీసీ అధికారులు మమ అనిపిస్తున్నారు. కానీ వర్షం వస్తే స్లాబ్నుంచి లీక్అవుతోంది.
పెచ్చులూడి ప్రయాణికులపై పడుతున్నాయి. టాయిలెట్లు సరిగా లేవు. బస్టాండ్ అవరణంతా గుంతలమయంగా మారింది. ఈ పరిస్థితిని చూసిన అప్పటి కలెక్టర్అనుదీప్, అప్పటి ఎమ్మెల్యే వనమా వెంకటేశ్వరరావు మున్సిపల్ చైర్మన్ కె. సీతాలక్ష్మితో పాటు మున్సిపల్ ఆఫీసర్లు, కౌన్సిలర్లతో చర్చించారు. బస్టాండ్ అభివృద్ధికి రూ. 80లక్షలు ఆర్టీసీకి ఇచ్చేలా మున్సిపాలిటీ పాలకవర్గాన్ని, ఆఫీసర్లను ఒప్పించారు. ఎమ్మెల్యే, కలెక్టర్ సూచనలతో కౌన్సిల్ మీటింగ్లో ఆర్టీసీకి రూ. 80 లక్షలు ఇచ్చేలా తీర్మానం చేశారు. దీంతో ఆర్టీసీ ఆఫీసర్లు, సిబ్బందితో పాటు ప్రజలు ఆనందపడ్డారు. కానీ ఏండ్లు గడుస్తున్నా ఫండ్స్ మాత్రం రేపుమాపు అంటూ మున్సిపల్ పాలకులు, అధికారులు కాలం వెళ్లదీస్తున్నారు.
ఈ తీరుతో ఆర్టీసీ అధికారులు అయోమయానికి గురవుతున్నారు. ఆర్టీసీ పై స్థాయి నుంచి ఫండ్స్ పెద్ద మొత్తంలో రాకపోవడంతో మున్సిపాలిటీ ఇచ్చే ఫండ్స్తో బస్టాండ్ను సుందరంగా తీర్చి దిద్దవచ్చని ఆర్టీసీ ఆఫీసర్లు ఆశించారు. ఏండ్లు గడుస్తున్నా మున్సిపాలిటీ నుంచి పైసా రాలేదు. బస్టాండ్ అభివృద్ధికి నిధులు ఇస్తామని మున్సిపాలిటీ ప్రకటించడంతో ఆర్టీసీ ఉన్నతాధికారులు బస్టాండ్ డెవలప్మెంట్కు ఫండ్స్ను రిలీజ్ చేయడం లేదు. దీంతో ‘రెంటికి చెడ్డ రేవడిలా’ కొత్తగూడెం బస్టాండ్ తీరు మారిందని ప్రయాణికులు ఆగ్రహం వ్యక్తం చేస్తున్నారు. ఇప్పటికైనా బస్టాండ్ డెవలప్మెంట్పై కలెక్టర్ ప్రియాక అల ప్రత్యేక దృష్టి సారించాలని ప్రజలు కోరుతున్నారు.
ఫండ్స్ కేటాయించేందుకు పరిశీలిస్తున్నాం
కొత్తగూడెం బస్టాండ్ అభివృద్ధికి గతంలో రూ. 80లక్షలు కేటాయిస్తామని కౌన్సిల్ తీర్మానం చేసిన మాట వాస్తవమే. బస్టాండ్లో ఏ పనులు చేపట్టాలో మున్సిపల్ ఇంజినీరింగ్ ఆఫీసర్లు ఆర్టీసీ అధికారులతో చర్చించారు. ప్రస్తుతం మున్సిపాలిటీ ఫండ్స్ లేకపోవడంతో కొంత ఇబ్బంది కలిగింది.
రఘు, మున్సిపల్ కమిషనర్, కొత్తగూడెం
ఆర్టీసీ అందుకే నిధులు ఇవ్వడం లేదు
మున్సిపాలిటీ నుంచి బస్టాండ్ రిపేర్లకు రూ. 80 లక్షలు కేటాయిస్తామన్నందుకే ఆర్టీసీ నుంచి ఫండ్స్ రావడం లేదు. అప్పటి కలెక్టర్, ఎమ్మెల్యే కూడా ఫండ్స్ వస్తాయని చెప్పడంతో భరోసా మీద ఉన్నాం. కానీ మున్సిపాలిటీ ఇప్పటి వరకు పైస కూడా ఇవ్వలేదు.
బి. వెంకటేశ్వరరావు, ఆర్టీసీ డిపో మేనేజర్, కొత్తగూడెం
