బషీర్ బాగ్, వెలుగు: బంధువుగా నమ్మించి ఓ బిజినెస్ మ్యాన్ను సైబర్ చీటర్స్ మోసగించారు. సిటీకి చెందిన 52 ఏండ్ల వ్యాపారవేత్తకు తొలుత ఫేస్బుక్ మెసెంజర్లో అతని బంధువు పేరిట ఎమర్జెన్సీగా రూ.5.70 లక్షలు అవసరం ఉన్నాయని మెసేజ్ వచ్చింది. ఆ మెసేజ్ను క్లిక్ చేయగా, అతని బంధువు ప్రొఫైల్తో ఉన్న వాట్సాప్కు రీ డైరెక్ట్ అయ్యింది.
దీంతో మెసేజ్ చేసింది తన బంధువేనని అనుకున్న బాధితుడు.. తన దగ్గర అంత డబ్బులు లేవని, ఒక్కరోజు సమయం ఇవ్వాలని కోరాడు. కనీసం రూ.2 లక్షలైనా పంపించాలని ఒత్తిడి చేయగా, నమ్మిన బాధితుడు తన అకౌంట్లో ఉన్న రూ. 1.79 లక్షలు బదిలీ చేశాడు. అనంతరం ఆ నంబర్ నుంచి ఎలాంటి స్పందన రాకపోవడంతో, తన బంధువుకు ఫోన్ చేయగా అసలు విషయం బయటపడింది. దీంతో బాధితుడు ఫిర్యాదుతో సైబర్ క్రైమ్ పోలీసులు కేసు నమోదు చేసి దర్యాప్తు చేస్తున్నారు.
