తిరుమలలో భక్తుల రద్దీ పెరిగింది. వైకుంఠ క్యూ కంప్లెక్స్లోని కంపార్టుమెంట్లన్నీ ఫుల్ అయిపోయాయి. దీంతో శ్రీవారి దర్శనానికి 18 గంటల సమయం పడుతోంది. నారాయణగిరి షెడ్ల వరకు అన్ని కంపార్ట్మెంట్లు నిండిపోయాయి. భక్తులకు ఎలాంటి ఇబ్బంది కలగకుండా ఆలయ అధికారులు అన్ని ఏర్పాట్లు చేశారు. కాగా జూన్ 29వ తేదీ శనివారం రోజున శ్రీవారిని నిన్న 80 వేల 404 మంది భక్తులు దర్శించుకున్నారు. వారిలో 35 వేల825 మంది తలనీలాలు సమర్పించగా... హుండీ ఆదాయం రూ. 3.83 కోట్లు సమకూరిందని టీటీడీ అధికారులు వెల్లడించారు. మరోవైపు తిరుమలకు వచ్చే భక్తులకు మరింత నాణ్యమైన, రుచికరమైన, పరిశుభ్రమైన ఆహారాన్ని సరసమైన ధరలకు అందించడమే టీటీడీ లక్ష్యమని ఈవో జె శ్యామలరావు తెలిపారు. తిరుమలలోని పెద్ద, జనతా హోటళ్లపై నిర్వహించిన సమీక్షలో ఆయన మాట్లాడారు.
