చంద్రుడి పైకి రష్యా స్పేస్ క్రాఫ్ట్

• ఈ నెల 23 న ల్యాండయ్యే అవకాశం

మాస్కో: ఉక్రెయిన్​తో యుద్ధం కారణంగా ఓవైపు సతమతమవుతున్న రష్యా.. తాజాగా చంద్రుడిపైకి స్పేస్ క్రాఫ్ట్​ను పంపించింది. చంద్రుడి ఉపరితలంపై విజయవంతంగా ల్యాండర్​ను దింపి సత్తా చాటేందుకు ప్రయత్నిస్తోంది. ఇందులో భాగంగానే లూనా–25 స్పేస్ క్రాఫ్ట్ ను గురువారం అంతరిక్షంలోకి పంపించింది. ఈ స్పేస్ క్రాఫ్ట్  ఐదు రోజుల్లో చంద్రుడి కక్ష్యలోకి ఎంటర్ కానుంది. 

ఆపై మూడు నుంచి వారం రోజుల పాటు కక్ష్యలో తిరుగుతూ ఈ నెల 23 న చంద్రుడి ఉపరితలంపై ల్యాండ్ అయ్యే అవకాశం ఉందని రష్యా శాస్త్రవేత్తలు చెబుతున్నారు. చంద్రయాన్ -‌‌ 3 ప్రాజెక్ట్ లో భాగంగా భారత అంతరిక్ష పరిశోధనా సంస్థ(ఇస్రో) పంపించిన విక్రమ్ ల్యాండర్ కూడా ఈ నెల 23న చంద్రుడిపై ల్యాండ్​ కానుంది. కిందటి నెల 14న ఇస్రో స్పేస్​క్రాఫ్ట్ పంపించిన విషయం తెలిసిందే. అయితే, రష్యా వ్యోమనౌక మాత్రం గురువారం నాడే అంతరిక్ష ప్రయాణం మొదలు పెట్టింది. భూమి నుంచి నేరుగా చంద్రుడి కక్ష్య వరకు ఈ స్పేస్ క్రాఫ్ట్ ప్రయాణించనుంది. ఆపై చంద్రుడి కక్ష్యలోకి చేరి, ఎత్తు తగ్గించుకుంటూ చంద్రుడిపై ల్యాండ్​ కానుందని అధికారులు తెలిపారు. 

గతంలో సోవియట్ యూనియన్..

సోవియట్ యూనియన్ విచ్ఛిన్నం కాక ముందు చంద్రుడిపైకి ల్యాండర్​ను విజయవంతంగా పంపించిం ది. అప్పట్లో అమెరికా, సోవియట్ యూనియన్, చైనాలు మాత్రమే చంద్రుడిపై విజయవంతంగా స్పేస్ క్రాఫ్ట్​లను ల్యాండ్ చేయగలిగాయి. రష్యా తొలిసారిగా చంద్రుడిపైకి ల్యాండర్​ను పంపడం ఇదే మొదలు. తొలుత ఇందులో ఓ చిన్న రోవర్​ను కూడా పంపాలని భావించినా.. తర్వాత విరమించుకున్నట్లు తెలిపారు. చంద్రుడిపై విజయవంతంగా ల్యాండర్​ను దింపడమే లక్ష్యంగా ఈ ప్రయోగం చేపట్టినట్లు తెలిపారు.